އިނގިރޭސި ޕްރިމިއާ ލީގުގެ އެއްވަނައިގައި އޮތް ލިވަޕޫލުން އިޕްސްވިޗް ޓައުން ބަލިކޮށްފިއެވެ.
ލިވަޕޫލްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 4-1 އިންނެވެ.
މެޗުގެ 11 ވަނަ މިނެޓުގައި ލިވަޕޫލުން ވަނީ ލީޑު ނަގައިފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑޮމިނީކް ސޮބޯޒްލައިއެވެ. މެޗުގެ 35 ވަނަ މިނެޓުގައި މުހައްމަދު ސަލާހް ވަނީ ލިވަޕޫލްގެ ލީޑު ފުޅާކޮށްފައެވެ. މިއީ މި ފަހަރު ލީގުގައި އޭނާ ކާމިޔާބުކުރި 18 ވަނަ ލަނޑެވެ. ފުރަތަމަ ހާފު ނިމެން އެއް މިނެޓަށް ވެފައިވަނިކޮށް ކޯޑީ ގަކްޕޯވަނީ ލިވަޕޫލްގެ ތިންވަނަ ލަނޑު ޖަހައިދީފައެވެ.
ލިވަޕޫލްގެ ފަހު ލަނޑު މެޗުގެ 66 ވަނަ މިނެޓުގައި ކާމިޔާބުކޮށްދިނީ ވެސް ގަކްޕޯއެވެ. އިޕްސްވިޗުން މެޗުގައި ކާމިޔާބުކުރި ހަމައެކަނި ލަނޑު މެޗުގެ ފަހު މިނެޓުގައި އެ ޓީމަށް ކާމިޔާބުކޮށްދިނީ ޖޭކޮބް ގްރީވެސްއެވެ.
މި ކާމިޔާބީއާ އެކު ލިވަޕޫލް މިހާރު އޮތީ 53 ޕޮއިންޓާ އެކު އެއްވަނައިގައެވެ. ދެވަނައިގައ އޮތް އާސެނަލާ ދެމެދު ހަ ޕޮއިންޓްގެ ލީޑު އެ ޓީމުން އަދިވެސް އަންނަނީ ދަމަހައްޓަމުންނެވެ. އިޕްސްވިޗް އޮތީ 16 ޕޮއިންޓާ އެކު 18 ވަނައިގައެވެ.
މުބާރާތުގައި އެވަޓަންއާއި ބްރައިޓަން ބައްދަލުކުރި މެޗު ރަށުން ބޭރުގައި 1-0 އިން ކާމިޔާބުކޮށްފައިވަނީ އެވަޓަންއިންނެވެ. މެޗުގައި އެވަޓަންއިން ކާމިޔާބުކުރި ހަމައެކަނި ލަނޑު މެޗުގެ 42 ވަނަ މިނެޓުގައި ލިބުނު ޕެނަލްޓީއަކުން އެވަޓަންއަށް ކާމިޔާބުކޮށްދިނީ އިލިމާން އެންޑިއާޔޭއެވެ. މެޗު ވެގެންދިޔައީ އެވަޓަންގެ ކޯޗު ޑޭވިޑް މޮޔޭސް ޕްރިމިއާ ލީގުގައި ކޯޗު ކޮށްދިން 700 ވަނަ މެޗަށެވެ.
މި ކާމިޔާބީއާ އެކު އެވަޓަން މިހާރު އޮތީ 23 ޕޮއިންޓާ އެކު 16 ވަނައިގައެވެ. ބްރައިޓަން އޮތީ 34 ޕޮއިންޓާ އެކު ނުވަވަނައިގައެވެ.