އާސަންދަ ކުންފުނީގެ ކޭސް ޕްރޮސެސިން ޑިޕާޓްމެންޓާއި ސުޕަވައިޒަރުންގެ ރޯލު އުވާލުމަށް ނިންމާފައިވާތީ، އެ ކަމާ ކަންބޮޑުވުން ފާޅުކޮށް އެ ކުންފުނީގެ މުވައްޒަފުން ޕެޓިޝަނެއް ރައީސް ޑރ. މުޙައްމަދު މުއިއްޒަށް ހުށަހަޅައިފިއެވެ.
އާސަންދައިގެ 50 މުވައްޒަފުން ސޮއިކޮށް ހުށަހެޅި ޕެޓިޝަނުގައި ބުނެފައިވަނީ މި ފެށޭ ފެބްރުއަރީ އެއްވަނަ ދުވަހުން ފެށިގެން އެ ބަދަލުތައް ތަންފީޒު ކުރުމަށް އާސަންދައިން ނިންމާފައިވާ ކަމަށެވެ. އެކަމުގެ ސަބަބުން އެ ތަނުގެ ގާތްގަނޑަކަށް 60 މުވައްޒަފުންގެ ދިރިއުޅުމަށް ދަތިތައް ދިމާވުމުގެ އިތުރުން، އާސަންދަ އޮޕަރޭޝަނާމެދު އޮތް އިތުބާރު ވެސް ގެއްލިގެންދާ ކަމަށް ފާހަގަކޮށްފައިވެއެވެ.
ސުޕަވައިޒަރުންގެ ރޯލު ޝިފްޓް އިންޗާޖުގެ މަގާމަށް ބަދަލު ކުރުމުގެ ސަބަބުން ވަޒީފާއާ ދޭތެރޭގައި މުވައްޒަފުން ޑީމޯޓިވޭޓްވެފައިވާކަމަށް ޕެޓިޝަނުގައި ވެއެވެ.
މި ބަދަލުތަކާއެކު މުވައްޒަފުންގެ އެލަވެންސްތައް ވެސް އުނިކުރަން ނިންމާފައި އޮތީ މުވައްޒަފުންނާ މަޝްވަރާނުކޮށް، ދެފުށް ފެންނަ އަދި އިންސާފުވެރި ގޮތަކަށް ވެސް ނޫންކަން ފާހަގަކޮށްފައިވެއެވެ.
މުވައްޒަފުންގެ ފަރާތުން ހުށަހެޅި ޕެޓިޝަނުގައިވަނީ، އެ ކުންފުނީގެ މެނޭޖްމެންޓުން ނިންމާ ނިންމުންތަކާއި ކޮށި ލީޑަޝިޕާއި، ކްރިޓިކަލް އޮޕަރޭޝަންތަކުގައި ބައިވެރިނުވުމުގެ ސަބަބުން ކުންފުންޏަށް ބޮޑެތި ގެއްލުންތަކާ ކުރިމަތިލާންޖެހިފައިވާ ކަމަށެވެ.
އެ ޕެޓިޝަނުގައިވަނީ ކަސްޓަމާ ސާވިސް ޑިޕާޓްމެންޓުގައި، މުވައްޒަފުންގެ ދަތިކަމާއެކު ހެވީ ލޯޑުގައި މަސައްކަތްކުރި ނަމަވެސް، މެނޭޖިން ޑިރެކްޓަރު ޒީނިޔާވަނީ ސިސްޓަމެޓިކް މައްސަލަތަކަށް ހައްލު ހޯދުމުގެ ބަދަލުގައި އެ ޑިޕާޓްމެންޓު ކުށްވެރިކޮށް، ބަދަލުތައް ގެންނަންޖެހޭ ކަމަށް ބުނެފައެވެ.
އެ މުވައްޒަފުންގެ ބުނެފައިވަނީ ކުންފުނީގައި ދިގުދެމިގެންދާ ގޮންޖެހުންތަކަކީ މެނޭޖްމަންޓުގެ ނާގާބިލްކަމާއި، ގޯސް ނިންމުންތަކުގެ ސީދާ ނަތީޖާއެއް ކަމުން، ކަސްޓަމާ ސާވިސް ޑިޕާޓްމަންޓަށް ދުވަހުން ދުވަހަށް ދިމާވާ އުނދަގޫތަކާ ކުރިމަތިލާން ޖެހެނީ އެކަށީގެންވާ ސަޕޯޓެއް ނުވަތަ ޒަމާނީ ހައްލުތަކެއް ނެތި ކަމަށެވެ.
މިކަންކަން ބިނާކުރަނިވި ގޮތެއްގައި ހައްލުކުރުމުގެ ބަދަލުގައި، ބަދަލުތަކެއް ގެންނަން ޖެހޭކަން ނިސްބަތްކޮށްފައިވަނީ ޑިޕާޓްމަންޓުން ކޭޕީއައި ފުރިހަމަ ނުކުރުމުން ކަމަށް އެ ޕެޓިޝަނުގައިވެއެވެ.
އެ ކުންފުނީގެ މުވައްޒަފުން ހުށަހަޅާފައިވާ ކަންތައްތަކުގެ ތެރޭގައި:
- ކޭސް ޕްރޮސެސިން ޑިޕާޓްމެންޓް އުވައިނުލުން
- ސުޕަވައިޒަރުންގެ ރޯލު އުވައިނުލުން
- ތަޖުރިބާހުރި މުވައްޒަފުންގެ މަސައްކަތް ބަލައިގަތުން
- ސުޕަވައިޒަރީ އެލޮވެންސްގެ ގޮތުގައި ދޭ 1000 ރުފިޔާ ކަނޑައިނުލުން
- މަސައްކަތުގެ ވޯކްލޯޑު މުވައްޒަފުންގެ މެދުގައި ހަމަހަމަކަމާއެކު ބަހައިލުން
- ނިންމުންތައް ނިންމުމުގައި ދެ ފުށް ފެންނަ ގޮތަށް މުވައްޒަފުންނާ މަޝްވަރާ ކުރުން
މި ޕެޓިޝަނުގައިވަނީ ރައީސުލްޖުމްހުރިއްޔާއާއި ކަމާގުޅުންހުރި އިދާރާތަކުން މި މައްސަލަތަކަށް ހައްލު ހޯދައިދިނުމަށް އެދިފައެވެ.
ކޭސް ޕްރޮސެސިން ޑިޕާޓްމަންޓް އުވާލުމާއި، ސުޕަވައިޒަރުގެ ދައުރުތައް އުނިކުރުމާއި،
އެއާ ގުޅުންހުރި މާލީ އަދި ޕްރޮފެޝަނަލް ދަތިތަކުގެ ސަބަބުން މުވައްޒަފުން ޑިމޯޓިވޭޓްވެ، މެނޭޖްމަންޓަށް އިތުބާރު ކުޑަވެފައިވާ ކަމަށް ވަނީ ބުނެފައެވެ. އަދި އާންމުންނަށް ފޯރުކޮށްދޭ ހިދުމަތްތަކުގެ ފެންވަރު ދަށްވެފައިވާކަން ވެސް ފާހަގަކޮށްފައިވެއެވެ.
މި ބަދަލުތައް ފަހަތަށް ޖައްސައި، އިންސާފުވެރި ލީޑަޝިޕް ސްޓްރަކްޗަރތައް އަލުން ގާއިމްކޮށް، މުވައްޒަފުންގެ ޙިއްސާ ދެނެގަނެ، އާސަންދައަކީ ސްޓޭބަލް، އެފިޝަންޓް، އަދި ފައިދާހުރި އާންމު ޚިދުމަތްތައް ފޯރުކޮށްދޭ ފަރާތެއްގެ ގޮތުގައި މެނޭޖްމަންޓުން އަވަސް ފިޔަވަޅުތަކެއް އެޅުމަކީ ވަރަށް މުހިންމު ކަމެއް ކަމަށް ވެސް ވަނީ ބުނެފައެވެ.