ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން 2013 ވަނަ އަހަރު ޕޮލިސް ކޯޕަރޭޓިވް ސޮސައިޓީ (ޕޮލްކޯ)ގެ ބޮޑު ޚިޔާނާތުގެ މައްސަލަ މިއަދު ފެންމަތިވުމާ އެއްކޮށް، ފުލުހުންނާއި ސިފައިންގެ ވިޔަފާރި ހުއްޓާލަން ގިނަ ބަޔަކު ގޮވާލަން ފަށައިފިއެވެ.
ފުލުހުންގެ ފުލެޓުތައް އަޅަން ޕޮލްކޯއާ ހަވާލުކުރުމުން އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެ، އެ ކުންފުނީގެ ނާގާބިލުކަމާއި ކޮރަޕްޝަންގެ ސަބަބުން ދައުލަތަށް 354.7 މިލިއަން ރުފިޔާ ގެއްލުނު ކަމަށް އޮޑިޓު ރިޕޯޓުން ވަނީ ދައްކާފައެވެ.
މި މައްސަލަ މިއަދު މީޑިއާތަކުގައި ފެންމަތި ކުރުމާ އެއްކޮށް، ސޯޝަލްމީޑިއާގައި ގިނަ ބަޔަކު އަންނަނީ އެކަމާ ނުރުހުން ފާޅުކޮށް ޝުއޫރު ފާޅުކުރަމުންނެވެ. އޭގެތެރޭގައި، ރައްޔިތުންގެ މަޖިލީހުގެ ބައެއް މެންބަރުން ވެސް ހިމެނެއެވެ.
ސިފްކޯ ހިޔާ ފްލެޓުތަކުގެ މޮކްއަޕް ކޮޓަރިއެއް -- ފޮޓޯ/ އެމްއެންޑީއެފް
އެގޮތުން، ކަނޑިތީމު ދާއިރާގެ މެންބަރު އަމީން ފައިސަލް އެކްސްގައި ކުރެއްވި ޕޯސްޓެއްގައި ވަނީ، އެއް ބިލިއަން ރުފިޔާ ޚަރަދުކޮށްގެން 300 ފުލެޓުގެ މަސައްކަތް 12 އަހަރުން ވެސް ނުނިމުމުން "އިތުރަށް ދައްކާނެ ވާހަކައެއް ނެތް" ކަމަށް ވިދާޅުވެފައެވެ.
އެއާއެކު ސިފައިންނާއި ފުލުހުންގެ ނަމުގައި ކުރާ ވިޔަފާރި ހުއްޓާލަން ގޮވާލައި ފުލެޓުތަކުގެ މައްސަލާގައި އިހުމާލުވި ފަރާތްތަކާ މެދު ފިޔަވަޅު އަޅަން އޭނާ ގޮވާލެއްވިއެވެ.
މި މައްސަލައިގައި ކެންދޫ ދާއިރާގެ ކުރީގެ މަޖިލިސް މެންބަރު އަދި ތަޖުރިބާކާރު ގާނޫނީ ވަކީލު އަލީ ހުސައިން ވިދާޅުވީ، ފުރަތަމަ ނޫމަޑިޔާ ހެދީ ދެކޮޅު ކަމަށް ވިޔަސް ޕްރޮޖެކްޓުތައް ހަވާލުކުރި ކަމަށެވެ. ނަމަވެސް، އޭގެފަހުން އަނެއްކާ ވެސް ނޫމަޑިޔާ ދެކޮޅުވެ އެއްބަސްވުންތައް ބާތިލުކުރުމަށް ފަހުގައި ނޫމަޑިޔާ އެއްކޮޅަށް އެރީ ކަމަށެވެ.
ފުލުހުން ތަކެއް -- ސަން ފޮޓޯ: މޫސާ ނަދީމް
އެކަން ފާހަގަކުރައްވައި، އޭނާ ވަނީ ހުރިހާ ގެއްލުމެއް ލިބުނީ ދައުލަތަށް ކަމަށާއި އެެއިން ފައިދާއެއްވީ ކާކަށްތޯ ސުވާލު އުފައްދަވައިފައެވެ.
"ތި ކުންފުންފުނިތަކަކީ ކޮރަޕްޝަންގެ ހާއްޔެއް. ދައުލަތަށް ބޮޑެތި ގެއްލުން ދެނީ. މި މީހުން އަތުން މި ކަންކަން އަތުލާފައި ދެ ފުށް ބެލޭ ކަހަލަ ބޭރު ބަޔަކާ ހަވާލުކުރަންވީ،" އިތުރު މީހަކު ޝުއޫރު ފާޅުކޮށް ބުނެފައިވެއެވެ.
އެހެން މީހަކު މިކަމާ ގުޅުވައި ޖެހި ޚަބަރެއްގެ ކޮމެންޓެއްގައި ބުނެފައި ވަނީ، ފުލުހުންގެ މުއައްސަސާގެ ހުރިހާ އެންމެންގެ އެކައުންޓުތަކަށް ވަދެފައި ހުރީ ކިހާ ނަހަމަ ފައިސާއެއް ތޯ ބަލަން ޖެހޭ ކަމަށެވެ.
"ޕޮލިހާއި ސިފައިންގެ ކުންފުނި ހަދައިގެން ކުރާ ކަމަކީ ވައްކަން ކުރުން. މިކަން ބަލާ ފިޔަވަޅެއް އަޅަން ކެރޭނެ ބަޔަކު ނެތް،" އެހެން މީހަކު ކޮމެންޓެއްގައި ބުނެފައިވެއެވެ.
އޮޑިޓް ރިޕޯޓުގައި ބުނީ، މާލީ ވުޒާރާގެ ޓެންޑާ އިވެލުއޭޝަން ބޯޑުން ހޯދި މައުލޫމާތުތަކަށް ބަލާއިރު އާންމު ގޮތެއްގައި ކޮންސްޓްރަކްޝަން މަސައްކަތް ކޮށްދޭ އަމިއްލަ ކުންފުނިތަކުން އަކަފޫޓަކަށް 1،300 ރުފިޔާއާއި 1،500 ރުފިޔާއާ ދެމެދުގެ އަގެއްގައި އެ ފަދަ ކޮންސްޓްރަކްޝަން މަސައްކަތް ކޮށްދޭ ކަމަށެވެ.
ސިފައިންތަކެއް މަގުމަތީގައި --- ސަން ފޮޓޯ/ މުހައްމަދު މުޒައްޔިން ނާޒިމް
އެ ރޭޓުތަކަށް ބަލާނަމަ، އެ މަޝްރޫއުގެ އަގަށް ޖެހެނީ 745.3 މިލިއަން ރުފިޔާއެވެ. އެންމެ ބޮޑުވެގެން ވެސް 859.9 މިލިއަން ރުފިޔާއަށް އެ މަޝްރޫއު ނިންމާލެވޭނެ ކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.
އޮޑިޓް ރިޕޯޓުގައި ބުނީ، އެ މަޝްރޫއު ހިންގާފައިވަނީ ކަނޑައެޅިގެން ނޫމަޑީގެ ރެޕްރެޒެންޓޭޓިވަށް ފައިދާވާ ގޮތަށް ކަމަށެވެ. އެކަމަކު، އެއީ ކާކު ކަމެއް އޮޑިޓް ރިޕޯޓުގައި ބުނެފައެއް ނުވެއެވެ.
އެ މީހާއަކީ އޮޑިޓް ރިޕޯޓުގައި ފާހަގަކުރި ގޮތުގައި ނޫމަޑީގެ ރެޕްރެޒެންޓޭޓިވެވެ. އެ މީހާއަކީ މަޝްރޫއުގައި ހިމެނޭ އައިލެންޑް އެކްސްޕާޓްގެ މެނޭޖިން ޑިރެކްޓަރެވެ. އަދި، މި މަޝްރޫއުގައި ހިމެނޭ ދެކޯމަސްގެ މެނޭޖިން ޑިރެކްޓަރާ އެ މީހާއާ ވެސް އާއިލީ ގުޅުން އޮންނަ ކަމަށް އޮޑިޓް ރިޕޯޓުގައި ވަނީ ފާހަގަކޮށްފައެވެ.
ސިފައިންތަކެއް --- ސަން ފޮޓޯ/ މުހައްމަދު މުޒައްޔިން ނާޒިމް
އެ މީހާއަށް ސީދާ ގޮތުންނާއި ނުސީދާ ގޮތުން 682 މިލިއަން ރުފިޔާ ދައްކާފައިވާ ކަމަށް އޮޑިޓް ރިޕޯޓުގައި ބުންޏެވެ. މި މައްސަލާގައި ފިޔަވަޅު އަޅަން މިހާރު އޮޑިޓް އޮފީހުން ވަނީ އަންގާފައެވެ.
ފާހަގަކޮށްލެވޭ ގޮތުގައި، ސިފައިންނާއި ފުލުހުންގެ ވެލްފެއާއަށް ސަރުކާރުން އެތައް ސަތޭކަ މިލިއަން ރުފިޔާއެއް ޚަރަދު ކުރެއެވެ. އެކަމަކު، އެ މުއައްސަސާތަކުން އެހެނިހެން ވިޔަފާރިތައް ހިންގައިގެން ފައިދާ ހޯދައެވެ.
އެގޮތުން، ފުލުހުން ކުރާ ވިޔަފާރިތަކުގެ ތެރޭގައި ރީޓެއިލްއާ ހޯލް ސޭލް ވިޔަފާރިތައް ހިމެނެެއެވެ.