މާދަމާއިން ފެށިގެން ހޮނިހިރު ދުވަސްތަކުގައި ވެސް ދެން ޕާސްޕޯޓު ދޫކުރާނެކަމަށް އިމިގްރޭޝަނުން މިއަދު ބުނެފިއެވެ.
އިމިގްރޭޝަންގެ ކޮންޓްރޯލާ ޖެނެރަލް މުޙައްމަދު ޝައްމާން ވަހީދު މިއަދު ވިދާޅުވީ، މީގެކުރިން ޕާސްޕޯޓު ދޫކުރަމުންއައީ ހަމައެކަނި ރަސްމީ ދުވަސްތަކުގައި އެކަނި ކަމަށެވެ.
ނަމަވެސް، މާދަމާއިން ފެށިގެން ހޮނިހިރު ދުވަހު ވެސް ޕާސްޕޯޓު ދޫކުރާނެ ކަމަށާއި މާލެ ސަރަހައްދުގައި ހިމެނޭ އިމިގްރޭޝަންގެ ތިން އޮފީހަކުން ކޮންމެ ހޮނިހިރު ދުވަހެއްގައި ވެސް ޕާސްޕޯޓު ދޫކުރާނެ ކަމަށް ޝައްމާން ވިދާޅުވިއެވެ.
އެގޮތުން ވެލާނާގެ އެއްވަނަ ފަންގިފިލާއިންނާއި އުމަރު ޒާހިރު ބިލްޑިންގެ އިތުރުން ވިނަރެސް ޓަވަރު ދޭއްގެ އެއްވަނަ ފަންފިލާގައި ހުންނަ އޮފީހުން ޕާސްޕޯޓު ދޫކުރާނެ ކަމަށް ޝައްމާން ވިދާޅުވިއެވެ.
ޝައްމާން ވިދާޅުވީ މީގެ މަގުސަދަކީ ރައީސް ޑރ. މުޙައްމަދު މުޢިއްޒުގެ އިރުޝާދާ އެއްގޮތަށް، ޚިދުމަތް ދޭ ވަގުތު އިތުރުކޮށް، ރައްޔިތުންނާ ގާތުން އަވަސް ޚިދުމަތެއް ފޯރުކޮށްދިނުން ކަމަށެވެ.
މި ބަދަލާއެކު ވެސް ސިއްހީ ކުއްލި ހާލަތެއްގައި ރާއްޖެއިން ބޭރަށް ދާ މީހުންނަށް ކުރިއެކޭ ވެސް އެއްގޮތަށް 24 ގަޑިއިރު ޚިދުމަތް ލިބޭނެކަމަށް ކޮންޓްރޯލާ ޝައްމާން ފާހަގަކުރެއްވިއެވެ.
އައިޑީ ކާޑާއި ޕާސްޕޯޓު ރައްޔިތުންނާ ގާތުން، އަވަހަށް ފޯރުކޮށްދިނުމުގެ ޚިދުމަތް މުޅި ރާއްޖެއަށް ފުޅާކުރުމަކީ މި ސަރުކާރުގެ ސިޔާސަތެކެވެ.
މި މަސައްކަތުގެ ދަށުން މާލެ ސިޓީގެ ހުރިހާ ސަރަޙައްދެއްގެ އިތުރުން ލ. އަތޮޅާއި ދ. އަތޮޅަށް މި މަސައްކަތް ވަނީ ފުޅާކޮށްފައެވެ.
އެގޮތުން ހުޅުމާލޭ ފުރަތަމަ ފިޔަވައްސާއި، ދެވަނަ ފިޔަވައްސާއި، ވިލިމާލެ، ދ. ކުޑަހުވަދޫ އަދި ލ. ފޮނަދޫއިން ޕާސްޕޯޓުގެ ޚިދުމަތް ފޯރުކޮށްދިނުމުގެ މަސައްކަތް މިދިޔަ ނޮވެމްބަރު މަހުވަނީ ފަށައިފައެވެ.