ދުނިޔޭގެ ސިއްޚަތު ޖަމިއްޔާ (ޑަބްލިޔުއެޗްއޯ)އިން އަންނަ އަހަރުގެ ޖެނުއަރީ މަހު އެމެރިކާ ވަކިވާނެ ކަމަށް އެ ޖަމިއްޔާއިން ބުނެފިއެވެ.
ޑަބްލިޔުއެޗްއޯއިން އެގޮތަށް ބުނީ، އެމެރިކާއިން ރަސްމީކޮށް އެ ޖަމިއްޔާއިން ވަކިވާން ނިންމާފައިވާ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕްގެ ސިޓީފުޅެއް މި ހަފުތާގައި ލިބުމުންނެވެ.
އދގެ ޑެޕިއުޓީ ސްޕޯކްސްޕާސަން ފަރުހާން ހައްގު ބުރާސްފަތި ދުވަހު ވިދާޅުވީ، ޑަބްލިޔު އެޗްއޯއިން އެމެރިކާ ވަކި ކުރުމުގެ މަސައްކަތް ފަށާފައިވަނީ އެމެރިކާގެ ރައީސްކަމާ ހަވާލުވެވަޑައިގެން ދުވަހު ޑަބްލިއުއެޗްއޯއިން އެމެރިކާ ވަކިކޮށް، ކުރިއަށް އޮތްތަނުގައި އެ ޖަމިއްޔާއަށް ދޭ ފައިސާ ނުދޭނެ ކަމަށް ވިދާޅުވުމުންނެވެ.
"އަޅުގަނޑަށް ކަށަވަރުކުރެވޭ ގޮތުގައި އަޅުގަނޑުމެންނަށް މިހާރު ލިބިއްޖެ ޑަބްލިޔުއެޗްއޯ ވަކިވުމާ ބެހޭ ގޮތުން އެމެރިކާގެ ސިޓީ. އެއީ، ޖެނުއަރީ 22، 2025 ވަނަ ދުވަހުގެ ސިޓީއެއް. ވީމާ އޭގެ އެއް އަހަރު ފަހުން 22 ޖެނުއަރީ 2026 އިން ފެށިގެން ޑަބްލިޔުއެޗްއޯއިން އެމެރިކާ ވަކިވާނެ،" ހައްގު ވިދާޅުވިއެވެ.
ޓްރަމްޕް ވަނީ ސެކްރެޓަރީ އޮފް ސްޓޭޓް މާކޯ ރޫބިއޯއާއި އެމެރިކާ ސަރުކާރުގެ އޮފީސް އޮފް މެނޭޖްމަންޓް އެންޑް ބަޖެޓްގެ ޑިރެކްޓަރަށް "އެމެރިކާ ސަރުކާރުގެ އެއްވެސް ފައިސާއެއް، ސަޕޯޓެއް ނުވަތަ ވަސީލަތެއް ކުރިއަށް އޮތްތަނުގައި ޑަބްލިޔުއެޗްއޯއަށް ފޯރުކޮށްދިނުން ހުއްޓާލުމަށް،" އަމުރު ކުރައްވާފައެވެ.
އެމެރިކާއިން ވަނީ ޑަބްލިޔުއެޗްއޯއާ ގުޅިގެން މަސައްކަތްކުރާ އެމެރިކާ ސަރުކާރުގެ ހުރިހާ މުވައްޒަފުން އަނބުރާ ގެނެސް، ޑަބްލިއުއެޗްއޯ އިސްވެ އޮވެ، ބަލިމަޑުކަމާބެހޭ ދުނިޔޭގެ މުއާހަދާއެއްގެ މަޝްވަރާތަކުގައި ބައިވެރިވުން ހުއްޓާލުމަށް ވެސް އަމުރުކޮށްފައެވެ.
ޑަބްލިޔުއެޗްއޯއިން އެމެރިކާ ވަކިވުމުން އެ ޖަމިއްޔާއަށް ލިބޭ އެންމެ މުހިންމު މާލީ އެހީތެރިކަން ގެއްލޭނެއެވެ.
އެ ޖަމިއްޔާގެ ފަންޑުގެ ގާތްގަނޑަކަށް 18 ޕަސެންޓް އެމެރިކާއިން ފޯރުކޮށްދެއެވެ. އެއީ، 2024 އާއި 2025 އާ ދެމެދު ގާތްގަނޑަކަށް 261 މިލިއަން ޑޮލަރެވެ. އެމެރިކާ ވަކިވުމުން ޓިއުބާކިއުލޯސިސްއިން ފެށިގެން އެޗްއައިވީ/އެއިޑްސް އަދި އެހެނިހެން ބަލިތަކާއި ބޮޑެތި ދަތިތައް ހައްލުކުރުމަށް ވެސް ޑަބްލިޔުއެޗްއޯއަށް ދަތިވާނެ ކަމަށް ތަޖުރިބާކާރުން ބުނެއެވެ.
ޑަބްލިޔުއެޗްއޯއިން ކޮވިޑް-19ގެ ދުވަސްވަރު ގެންގުޅުނު ސިޔާސަތުތަކަށް ފާޑުވިދާޅުވެ، އެ ޖަމިއްޔާއިން ވަކިވުމުގެ މަރުހަލާ ޓްރަމްޕް ފައްޓަވާފައިވަނީ ކޮވިޑް-19ގެ ދުވަސްވަރެވެ. އެ ނިންމުން ރައީސް ޖޯ ބައިޑަން ފަހުން ވަނީ އަނބުރާ ގެންދަވާފައެވެ.
އެ އަމުރުގައިވާ ގޮތުން އެމެރިކާއިން ޑަބްލިޔުއެޗްއޯގެ މެންބަރުކަމުން ދުރުވާން ބޭނުންވަނީ، ކޮވިޑް ބަލިމަޑުކަމުގެ ތެރޭގައި ގެންގުޅުނު ސިޔާސަތުތައް ކަމުނުދާތީއާއި އެ ޖަމިއްޔާއިން ގައުމުތަކަށް ސިޔާސީ ނުފޫޒު ފޯރުވާކަމަށް ތުހުމަތުވާތީއެވެ.
އެމެރިކާ ޑަބްލިޔުއެޗްއޯއާ ގުޅުނީ 1948 ވަނަ އަހަރު ކޮންގްރެސްގެ ދެ ގެކޮޅުގެ ޖޮއިންޓް ގަރާރެއްގެ ދަށުންނެވެ. އެހެންވެ، ކޮންގްރެސްގެ ރުހުން ނެތި ޓްރަމްޕަށް އެ ޖަމިއްޔާއިން ވަކިވުމުގެ އަމުރު ނެރުއްވޭނެތޯ އެއީ ސުވާލު އުފެދޭ ކަމެއް ކަމަށް މަސްރަހު ދިރާސާކުރާ ފަރާތްތަކުން ބުނެއެވެ.