ހިރިޔާ ސްކޫލު ބެލެނިވެރިންގެ މެދުގައި ބޭއްވި ފުޓްބޯޅަ މުބާރާތެއްގައި ކުޅެނިކޮށް ބެލެނިވެރިއަކު ކުއްލިއަކަށް ނިޔާވެއްޖެއެވެ.
މި މުބާރާތް ކުޅުނީ ރޭ ހިރިޔާ ސްކޫލު ޓާފުގައެވެ. މިއީ ހިރިޔާ ސްކޫލުގެ ޕީޓީއޭއިން އިންތިޒާމުކޮށްގެން ކުރިއަށް ގެންދިޔަ މުބަރާތެކެވެ. މައުލޫމާތު ލިބިފައިވާ ގޮތުގައި އެމީހާ އައިޖީއެމްއެޗަށް ގެންދިޔަ އިރު ވެސް ވަނީ ނިޔާވެފައެވެ.
"ސަން"އާ މައުލޫމާތު ހިއްސާކުރި އެ ސްކޫލްގެ ބެލެނިވެރިއަކު ބުނީ އެ މެޗަކީ ބެލެނިވެރިންނަށް ޚާއްސަކޮށްގެން ބޭއްވި މުބާރާތެއްގެ ތެރެއިން ކުޅުނު މެޗެއް ކަމަށެވެ. އަދި މިރޭ ކުޅުނު މެޗުގައި ވާދަކުރީ ފިރިހެން ބެލެނިވެރިންނެވެ.
މި ހާދިސާއާ ގުޅިގެން އެޑިއުކޭޝަން މިނިސްޓްރީން ހިއްސާކުރި މެސެޖެއްގައި ވަނީ، މެޗަށް ފަހު ދަނޑުމަތީގައި އޮށޯތް ބެލެނިވެރިއަކަށް ސިއްހީ މައްސަލައެއް ދިމާވިކަން ފާހަގަވެގެން އައިޖީއެމްއެޗަށް ގެންދިޔަ ކަމަށް ސްކޫލުން މިނިސްޓްރީއަށް މައުލޫމާތު ދީފައި ވާކަމަށެވެ. އަދި މި ބެލެނިވެރިޔާ ނިޔާވެފައި ވާކަމަށް މިނިސްޓްރީގެ މެސެޖުގައި ފާހަގަކޮށްފައި ވެއެވެ.
މިނިސްޓްރީން ވަނީ ނިޔާވި ބެލެނިވެރިޔާގެ އާއިލާއަށް ތައުޒިޔާ ކިޔާފައެވެ.