ދަނޑުވެރިކަމުގެ އެކި ދާއިރާތަކުން ރާއްޖޭން ބޭރުގައި މަތީ ތައުލީމަށް ކިޔަވަން ފުރުސަތުތަކެއް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން މިއަދު ހުޅުވާލައިފިއެވެ.
މިނިސްޓްރީން ބުނީ، މިއީ ދިވެހި ސަރުކާރާއި ވޯލްޑް ބޭންކާ ގުޅިގެން ހިންގާ ޓްރާންސްފޯމިން ފިޝަރީޒް މެނޭޖްމަންޓް އިން ސައުތު ވެސްޓް އިންޑިއަން އޯޝަން ރީޖަން އެންޑް މޯލްޑިވްސް ޕްރޮޖެކްޓްގެ، ދަށުން ހުޅުވާލި ފުރުސަތުތަކެއް ކަމަށެވެ.
މިގޮތުން، ބެޗެލާސް އަދި މާސްޓާސް ޑިގްރީ ހިމެނޭހެން ޖުމުލަ ހަތް ދާއިރާއަކުން އެއް ފުރުސަތު އެ މިނިސްޓްރީން ވަނީ ހުޅުވާލާފައެވެ.
މާސްޓާސް ޑިގްރީން ފުރުސަތު ހުޅުވާލި ދާއިރާތައް:
- ޕްރޮޓެކްޝަން
- އެންޓޮމޮލޮޖީ
- ޕްލާންޓް ޕެތޮލޮޖީ
ބެޗެލާސް ޑިގްރީއިން ފުރުސަތު ހުޅުވާލި ދާއިރާތައް:
- އެގްރިކަލްޗަރަލް ސައިންސް
- ވެޓެރިނަރީ/ ޒޫލޮޖީ އެނިމަލް ސައިންސް
- އެގްރިކަލްޗާ (ބޮޓާނީ އެންޑް އެންޓޮމޮލޮޖީ)
- ނެޗުރަލް ރިސޯސަސް މެނޭޖްމަންޓް / ބެޗެލާސް އޮފް އިކޮނޮމިކްސް
އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ: މި ސްކޮލަޝިޕްގެ ދަށުން ހުޅުވާލި ފުރުސަތުތަކަށް މިނިސްޓްރީގައި މަސައްކަތްކުރާ މުވައްޒަފުންނަށް އިސްކަންދޭނެ -- ފޮޓޯ/ ހަޔާ އެޑިއުކޭޝަން މިނިސްޓްރީ
މިނިސްޓްރީން ބުނީ، އެ ދާއިރާތަކުގެ ތެރެއިން މާސްޓާސް ޑިގްރީއަށް ޝަރުތު ހަމަ ވާނީ ކޯހުގެ ދާއިރާއާ ގުޅުން ހުރި ދާއިރާއަކުން ބެޗެލާސް ޑިގްރީއެއް ހާސިލުކޮށް، ގުޅުން ހުރި ދާއިރާއެއްގައި ދެ އަހަރުގެ ތަޖުރިބާ ހާސިލުކޮށްފައިވާ ނަމަ ކަމަށެވެ.
ބެޗެލާސް ޑިގްރީގެ ކޯހަކަށް ކުރިމަތިލާނަމަ ޖީސީއީ އޯލެވެލްގެ ފަސް މާއްދާއިން 'ސީ'އިން ފެށިގެން މަތީ ގްރޭޑެއް ހާސިލުކޮށް، ޖީސީއީ އޯލެވެލްގެ ތިން މާއްދާއިން 'ސީ' އިން ފެށިގެން މަތީ ގްރޭޑެއް ހާސިލުކޮށްފައިވުން ލާޒިމުކަން މިނިސްޓްރީން ފާހަގަކުރިއެވެ.
ކޯހަށް ހުށަހަޅަން ޖެހޭ ލިޔުންތަކަކީ:
-
ތައުލީމީ ސެޓުފިކެޓުތަކުގެ ކޮޕީ (އެޓެސްޓް ކުރަންޖެހޭ ލިޔުމެއް ނަމަ އެޓެސްޓް ކުރެވިފައިވާ ކޮޕީ)
-
ގްރޭޑިން ކްރައިޓީރިއާ އެނގޭހެން ފުލް ޓްރާންސްކްރިޕްޓްގެ ކޮޕީ
-
އައިލްސް އިން އޯވަރޯލް ސްކޯ 6 ނުވަތަ ޓެފްލްސް ސްކޯއިން 550 އެއް ހާސިލުކޮށްފައިވުން
-
ދިވެހި ރައްޔިތެއްކަން އަންގައިދޭ ކާޑުގެ ކޮޕީ (މުއްދަތު ހަމަނުވާ)
-
މިހާރު ހާސިލް ކޮށްފައިވާ އެންމެ މަތީ ސެޓްފިކެޓް ހާސިލް ކުރުމަށްފަހު ރާއްޖެއަށް ޚިދުމަތް ކޮށްފައިވާ މުއްދަތު އެނގޭނެ ރަސްމީ ލިޔުމެއް، ރަސްމީ ލިޔުމެއް ނުލިބިއްޖެނަމަ ސަބަބާއި މުއްދަތު އިނގޭނެ އަމިއްލަ ލިޔުމެއް.
-
ސްކޮލާޝިޕް ލިބިއްޖެ ނަމަ ކޯސް ފުރިހަމަ ކުރުމަށްފަހު މިނިސްޓްރީގައި ޚިދުމަތް ކުރުމަށް ބޮންޑުކުރެވޭއިރު، އެހެން ޚިދުމަތުގެ ބޮންޑެއް އޮތްނަމަ ބޮންޑުކުރި ތަނަކުން ބޮންޑު އެއްކޮށް ރިލީޒްކުރާނެ ކަމުގެ ލިޔުން
މީގެއިތުރުން، މިކޯސްތަކަށް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީގައި މަސައްކަތް ކުރާ މުވައްޒަފުންނަށް އިސްކަން ދޭނެ ކަމަށް ބުނެފައިވެއެވެ.
މި ކޯސްތަކަށް އެޕްލިކޭޝަން ހުށަހެޅޭނީ އަންނަ މަހުގެ 20 ވަނަ ދުވަހުގެ 12:00ގެ ކުރިން މިނިސްޓްރީގެ ޕްރޮޖެކްޓް މެނޭޖްމަންޓް ޔުނިޓު ހިންގާ ހ. ޕަލްމޭރާގެ ތިން ވަނަ ފަންގިފިލާއަށެވެ. އެފްލިކޭޝަނާ އެއްކޮށް ހުށަހަޅަން ޖެހޭ ހުރިހާ ލިޔުމެއް ހަމަނުވާނަމަ އެޕްލިކޭޝަން ބާތިލުކުރާނެ ކަމަށް މިނިސްޓްރީން ވަނީ ބުނެފައެވެ.