މާލޭގެ މަޖީދީ މަގުގައި ހުރި ގުދަނެއްގައި ރޯވެ، ހިނގި އަލިފާނުގެ ހާދިސާއާ ގުޅިގެން 14 ދިވެހީންނާއި 19 ބިދޭސީން ވަގުތީ ބޯހިޔާވަހިކަން ހޯދައިފިއެވެ.
އެމްއެންޑީއެފުން ބުނެފައި ވަނީ، އަލިފާން ރޯވީ ފުރުޓް އެންޑް ޓްރީ އެޕަލް ކިޔާ ފިހާރައިން ގުދަނެއްގެ ގޮތުގައި ބޭނުން ކުރާ ތަނެއްގައި ކަމަށެވެ. އެ ހާދިސާ މައުލޫމާތު ލިބުނީ 04:20 ހާއިރު ކަމަށާއި އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރު ކަމަށް ސިފައިން ބުންޏެވެ.
ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން ބުނީ އެ ހާދިސާގައި ދުމުގެ ސަބަބުންނާއި އިމާރާތަށް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއެއްގެ 33 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ.
ގުދަނުގައި ރޯވެ، އަނދައިފައި: އެ ހާދިސާއާ ގުޅިގެން 14 ދިވެހީންނާއި 19 ބިދޭސީން ވަގުތީ ބޯހިޔާވަހިކަމަށް ބަދަލުކޮށްފައިވޭ -- ސަން ފޮޓޯ/ މޫސާ ނަދީމް
އެންޑީއެމްއޭއިން އެކްސްގައި ކުރި ޕޯސްޓްއެއްގައި ވަނީ ވަގުތީ ބޯހިޔާވަހިކަމަށް ބަދަލުކުރި މީހުންގެ ތެރެއިން ފަސް ގޭބިސީއެއްގެ 14 ދިވެހިން އަދި އަށް ބިދޭސީންނަށް މިހާރު އަންނަނީ ވަގުތީ ބޯހިޔާވަހިކަމާއި ކެއިންބުއިން ހަމަޖައްސަމުންކަމަށާއި ބިދޭސީ އެއް އާއިލާ މިހާރު ވަނީ އަމިއްލަ ވަގުތީ ބޯހިޔާވަހިކަމަށް ބަދަލުވެފައިކަމަށެވެ.
މީގެ އިތުރުން 11 ބިދޭސީއަކަށް އެ މީހުން ނިސްބަތްވާ ކުންފުނިތަކުން ވަނީ އެހީތެރިކަން ފޯރުކޮށްދީފައިކަން ވެސް އެ އޮތޯރިޓީން ފާހަގަކުރިއެވެ.
އެ ހާދިސާގައި އެއްވެސް މީހަކަށް އަނިޔާވެފައި ނުވާ ކަމަށް އެމްއެންޑީއެފުން ބުންޏެވެ.