މި އަހަރުގެ ޅެންވެރީންގެ ދުވަހަށް ޚާއްސަކޮށް ނެރުނު ދެ ފޮތެއް ދިވެހިބަހުގެ އެކެޑާމީން ވިއްކަން ފަށައިފިކަމަށް އެ އެކަޑަމީން ބުނެފިއެވެ.
ޅެންވެރީންގެ ދުވަހަށް ޚާއްސަ މި ދެ ފޮތަކީ މި އަހަރުގެ ޅެންވެރީންގެ ދުވަސް ތަޚުޞީޞް ކުރައްވާފައިވާ އަބްދުﷲ ޞާދިޤުގެ "ޞާދިޤުގެ ޅެންބަހުރުވަ-3" އަދި އަލްމަރްޙޫމް ސުމުއްވުލްއަމީރު މުޙައްމަދު އަމީން ދޮށިމޭނާ ކިލެގެފާނުގެ "އަމީންގެ ޅެންތައް" މި ދެ ފޮތެވެ.
"ޞާދިޤުގެ ޅެންބަހުރުވަ-3" މި ފޮތަކީ ޞާދިޤުގެ އާއިލާއިން އެއްކުރައްވައި، ޓައިޕްކޮށް ދިވެހިބަހުގެ އެކެޑަމީން ނެރުމަށް ހަދިޔާކުރެއްވި ފޮތެއްކަމަށާއި މި ފޮތުގައި އެމަނިކުފާނުގެ މަސައްކަތްޕުޅުތަކުގެ ތެރެއިން ޅެމާއި ލަވައާއި ބަނދީގެ ރީތި ސިފަކުރުންތައް ހުންނާނެ ކަމަށް އެކެޑަމީން ބުންޏެވެ.
އަދި ލޯތްބާއި ނަސޭހަތާއި، ކުލުނާއި، ދިވެހި ވެށްޓާއި، ކުޑަކުދީންނާއި ޒުވާނުންނަށް ޚާއްސަ އެތައް މެސެޖުތަކެއް ގެނެސްދީފައިވާ ކަމަށް އެ އެކަޑަމީން ވަނީ ބުނެފައެވެ.
ޅެންވެރީންގެ ދުވަހަށް ޚާއްސަ ފޮތް ----
މީގެ އިތުރުން " އަމީންގެ ޅެންތައް" މި ފޮތަކީ ސުމުއްވުލްއަމީރު މުޙައްމަދު އަމީން ދޮށިމޭނާ ކިލެގެފާނު ހައްދަވައި، "ސަރުކާރުގެ ޚަބަރު"ގައްޔާއި އަންޖަމަން އަމީންގެ އިދާރާއިން 1958ގައި ނެރުއްވި
"ޅެންވެރިކަމުގެ ބަގީޗާގައި..އޯކިޑް"ގައި ހުރި ޅެމާއި "ޅެންވެރީންގެ ގުލްޒާރުގެ ނޫރާނީ މާ"ގައި ޝާއިޢުކުރައްވާފައިވާ ޅެންތައް ހިމެނޭ ފޮތެއްކަން ވެސް ވަނީ ބުނެފައެވެ.
އެ ކަޑަމީން ބުނީ މި ފޮތުގައި ޙުއްބުލްވަޠަންގެ ލޯތްބާއި، މަތިވެރިކަމާއި، އިޝްޤީ ލޯބީގެ ދިލައާއި ހުވަފެނުގެ އަސަރު ހިތްތަކުގެ އެންމެ ފުނަށް ފޯރާފަދަ އެތައް ޅެމެއްވާކަމަށެވެ.
"ޞާދިޤުގެ ޅެންބަހުރުވަ 3" 75 ރުފިޔާއަށް، އަދި "އަމީންގެ ޅެންތައް" 70 ރުފިޔާއަށް ދިވެހިބަހުގެ އެކެޑަމީގެ ފޮތް ފިހާރައިން ގަންނަން ލިބެން ހުންނާނެ ކަމަށް އެކަޑަމީން ބުންޏެވެ.
މި ފޮތް ފިހާރަ ހުޅުވިފައި ހުންނާނީ ރަސްމީ ދުވަސްތަކުގައި ހެނދުނު 8:00 ފެށިގެން މެންދުރުފަހު 13:30 އަށެވެ.
މިއަހަރުގެ ޅެންވެރިންގެ ދުވަސް ޚާއްސަކުރައްވާފައި ވަނީ ޢަބްދުﷲ ސާދިގު (ސޯދުބެ)އަށެވެ.
މި އަހަރު ފާހަގަކުރީ 37 ވަނަ ޅެންވެރީންގެ ދުވަހެވެ. އެ ގޮތުން މި އަހަރުގެ ޅެންވެރީންގެ ދުވަހުގެ ޝިއާރަކީ "އަހަންނަކީ ދިވެއްސަކީން. ދިވެހި އުޅުމުގެ ވެއްސަކީން''އެވެ.