ދުވަސްތަކަކަށްފަހު ބަތަލާ ޔާމީ ގޯތަމްގެ އާ ފިލްމެއް ނެޓްފްލިކްސްގައި ޕްރީމިއާކުރަން ނިންމައި ފިލްމުގެ ފުރަތަމަ ޓީޒާ ޓްރެއިލާ ބެލުންތެރިންނަށް ދައްކާލައިފިއެވެ.
ޔާމީއާ އެކު އެކްޓަރު ޕްރަތީކް ގާނދީ ލީޑް ރޯލްއިން ފެންނަ މި ފިލްމުގެ ނަމަކީ "ދޫމް ދާމް"އެވެ. ޔާމީގެ ފިރިމީހާ އަދިތިޔާ އަދި ލޮކޭޝް ދަރު ޕްރޮޑިއުސްކޮށްފައިވާ މި ފިލްމުގެ ޑައިރެކްޓަރަކީ ރިޝަބް ސެތުއެވެ.
ކުރިއަށް އޮތް ފެބްރުއަރީ މަހުގެ 14 ވަނަ ދުވަހު ނެޓްފްލިކްސްގައި ޕްރީމިއާކުރާ މި ފިލްމަކީ އަލަށް ކައިވެނި ކުރާ ޒުވާޏް ޖޯޑަކަށް ކުރިމަތިވާ ހާދިސާތަކަކުން ސަލާމަތްވުމަށް ކުރާ މަސައްކަތްތަކުގެތެރޭ ހިނގާ ހެއްވާ މަޖާ ހާދިސާތައް ދައްކުވައިދޭ ފިލްމެކެވެ.
ފިލްމު "ދޫމް ދާމް"ގެ ޕޯސްޓަރެއް--ފޮޓޯ/ބޮލީވުޑްހަންގާމާ
ފިލްމުގައި ޔާމީ އާއި ޕްރަތީކް ކުޅެފައިވާ ކެރެކްޓާ އަކީ މުޅިން ތަފާތު ދެ މިޒާޖެއްގެ ކެރެކްޓާއަށް ވެފައި ކައިވެންޏާ ހަމައަށް ދެ މީހުންގެ ގުޅުން ދިއުމުން އުފެދޭ މައްސަލަތައް ވެސް ފިލްމުން ދައްކުވައިދޭނެއެވެ.
ފިލްމުގެ ޕްރޮޑިއުސަރުން ކަމަށްވާ އަދިތިޔަ އަދި ލޮކޭޝް ދަރު މި ފިލްމު ބިނާކޮށްފައިވާ ވާހަކައާ ގުޅޭގޮތުން ބުނެފައި ވަނީ، "ދޫމް ދާމް" މެދުވެރިކޮށް ބޭނުންވީ ވަރަށް ޔުނީކް ވާހަކައެއް ބެލުންތެރިންނަށް ގެނެސްދިނުމަށް ކަމަށާއި ހަމައެއާއެކު އެކްޝަންއާ އެއްވަރަށް ފިލްމުގައި ކޮމެޑީ ބައި ވެސް ގެނެސްދޭން ބޭނުންވި ކަމަށް ދެ ޕްރޮޑިއުސަރުން ވަނީ ބުނެފައެވެ.
މިދިޔަ އަހަރުގެ މެއި މަހު އަލަތު ދަރިފުޅު ލިބުމާ ގުޅިގެން ބަތަލާ ޔާމީ ވަނީ ދުވަސްކޮޅަކަށް ފިލްމީ މަސައްކަތާ ދުރަށްޖެހިލާފައެވެ. ބަތަލާ އެންމެ ފަހުން ބެލުންތެރިންނަށް ފެނިފައި ވަނީ މިދިޔަ އަހަރުގެ ފެބްރުއަރީ މަހު ރިލީޒްކުރި ޕޮލިޓިކަލް އެކްޝަން ފިލްމު "އާޓިކަލް 370"އިންނެވެ.
މި ފިލްމަކީ ވެސް ޔާމީގެ ފިރިމީހާ އަދިތިޔާ އަދި ލޮކޭޝް ދަރު ޕްރޮޑިއުސްކުރި ފިލްމެކެވެ.