ސިޔާސީ ޕާޓީތަކަށް ދައުލަތުން ފައިސާދޭއިރު، ހަމަ އެކަނި މެންބަރުންގެ އަދަދަށް ރިއާޔަތް ކުރުމަކީ އެންމެ ރަނގަޅު ގޮތް ނޫން ކަމަށް އިލެކްޝަންސް ކޮމިޝަން (އީސީ)ގެ މެންބަރު ހަސަން ޒަކަރިއްޔާ ވިދާޅުވެއްޖެއެވެ.
ރާއްޖޭގައި ގިނަ ސިޔާސީ ޕާޓީ އެކުލެވޭ ނިޒާމެއް ފެށުނީއްސުރެން، އެ ނިޒާމު ކުރިއެރުވުމުގެ ގޮތުން ދައުލަތުގެ ބަޖެޓުން ކޮންމެ އަހަރަކު ވެސް ޕާޓީތަކަށް ފައިސާ ދޫކުރެއެވެ. އެ ފައިސާ ދޫކުރަނީ 10،000 މެންބަރުން ހަމަވާ ޕާޓީތަކުގެ މެދުގައެވެ.
އެސްއެސްޓީވީގެ "ބާރު ހަތަރެއް"ގައި ވާހަކަ ދައްކަވަމުން ޒަކަރިއްޔާ ވިދާޅުވީ، "އަދިވެސް ސިޔާސީ ޕާޓީތަކަށް ދައުލަތުގެ ބަޖެޓުން ފައިސާ ދޭންވީތޯ؟" މިއީ އީސީން އުފައްދާ ސުވާލެއް ކަމަށެވެ.
ޑިމޮކްރެޓިކް ނިޒާމު ކުރިއެރުވުމަށް ޓަކައި ދައުލަތުގެ ފަރާތުން ސިޔާސީ ޕާޓީތަކަށް ފައިސާދީ، އެހީތެރިވެދިނުމަކީ މުހިންމު ކަމެއް ކަމަށް އީސީން ވެސް ދެކެއެވެ.
އެހެން ނަމަވެސް ދައުލަތުގެ ބަޖެޓުން ޕާޓީތަކަށް ފައިސާދޭއިރު، ހަމައެކަނި 10،000 މެންބަރުން ހަމަވާ ޕާޓީތަކަށް ފައިސާދިނުމާއި، މެންބަރުންގެ ނިސްބަތަށް އެކަނި ބަލައިގެން ފައިސާ ދޫކުރުމަކީ އެންމެ ރަނގަޅު ގޮތް ނޫން ކަމަށް ޒަކަރިއްޔާ ވިދާޅުވިއެވެ. ދައުލަތުން ޕާޓީތަކަށް ފައިސާ ދޭނަމަ، 10،000 މެންބަރުން ހަމަނުވާ ޕާޓީތަކަށް ވެސް ފައިސާދޭންވާނެކަން އޭނާ ފާހަގަ ކުރެއްވިއެވެ.
"ކުދި ޕާޓީތަކަކީ ވެސް ހަމަ އޭގެ މައްޗަށް ރައްޔިތުންގެ ޚިޔާލާއި ފިކުރު ނިސްބަތްވާ، ރައްޔިތުންގެ ވިސްނުން ނެރޭ ޕާޓީތަކެއް. އެހެން ވެއްޖެ ނަމަ، ދައުލަތެއްގެ ސިފައިގައި އެހީތެރިވެދޭ ކަމަށްވަންޏާ، މައިނޯރިޓީ ކުދި ޕާޓީތަކަށް ވެސް ދައުލަތުން އެހީތެރިވެދިނުމަކީ މަލްޓި ޕާޓީ ޑިމޮކްރަސީ ނިޒާމެއް ކުރިއެރުވުމަށް އެހީތެރިވެދޭންޖެހޭނެ އަސާސެއް،" ޒަކަރިއްޔާ ވިދާޅުވިއެވެ.
ސިޔާސީ ޕާޓީތަކުގެ ގާނޫނަށް އިސްލާހުތަކެއް ގެނައުމަށް ޓަކައި އީސީންވަނީ މީގެ ތިން އަހަރު ކުރިން ޑްރާފްޓެއް ތައްޔާރުކޮށް ބަންޑާރަނައިބަށް ފޮނުވައިފައެވެ.
ޒަކަރިއްޔާ ވިދާޅުވި ގޮތުގައި އެ ޑްރާފްޓުގައި ސިޔާސީ ޕާޓީތަކަށް ފައިސާދޭން ކަނޑައަޅާފައިވަނީ މައިގަނޑު ތިން ކަމަކަށް ރިއާޔަތްކޮށްގެންނެވެ. އެއީ ދައުލަތުގެ ބަޖެޓުން ޕާޓީތަކަށް ޚާއްސަކޮށްފައިވާ އަދަދުގެ ތެރެއިން:
- ރެޖިސްޓާ ކުރެވިފައިވާ ކޮންމެ ސިޔާސީ ޕާޓީއަކަށް 20 ޕަސެންޓު
- ޕާޓީތަކުގައި ތިބި މެންބަރުންގެ އަދަދަށް 30 ޕަސެންޓު
- އިންތިޚާބުތަކުގައި ޕާޓީތަކަށް ލިބޭ ވޯޓުގެ ނިސްބަތަށް 50 ޕަސެންޓު
ޒަކަރިއްޔާ ފާހަގަ ކުރައްވާ ގޮތުގައި، މި ބަދަލާއެކު ކުދި ޕާޓީތަކަށް އިންތިޚާބުތަކުގައި ވާދަކުރުމަށް ހިތްވަރު ލިބި، އެ ޕާޓީތަކުގެ ހަރަކާތްތެރިކަން އިތުރުކުރުމަށް މަގުފަހިވާނެއެވެ.
ސިޔާސީ ޕާޓީތަކަށް ވަގަށް މީހުން ވައްދާ މައްސަލަ މި ފަހުން ވެސް ފެންމަތިވިއިރު، އެއީ ޕާޓީތަކަށް ލިބޭ ފައިސާގެ އަދަދު އިތުރު ކުރުމަށް ކުރާ ކަމެކެވެ. އެ މައްސަލައިގައި ސަރުކާރު ހިންގާ ޕީއެންސީއަށް ތުހުމަތު ކުރެވޭއިރު، އެހެން ބައެއް ޕާޓީތަކުންނާއި ބައެއް ޖަމިއްޔާތަކުން ވެސް ވަނީ އެ ކަން ކުށްވެރިކޮށް، ފިޔަވަޅު އެޅުމަށް ސަރުކާރަށް ގޮވާލައިފައެވެ.
ޕާޓީތަކަށް ފައިސާ ދޫކުރުމުގެ ކުރިން، ޕާޓީތަކުގެ ދަފުތަރު އިއުލާންކޮށް، ޝަކުވާ ހުށަހެޅުމުގެ ފުރުސަތު އީސީން ހުޅުވައިލާނެއެވެ. އެއީ މެމްބަރުންގެ އަދަދަށް ބަލައިގެން ފައިސާދޭއިރު، ކޮންމެ ޕާޓީއަކަށް ވެސް ދެވެނީ ރަނގަޅު އަދަދުތޯ ބެލުމަށެވެ.