އައްޑޫ ސިޓީ ހިތަދޫގެ ގެއެއްގައި އަލިފާނުގެ ހާދިސާއެއް ހިނގައި، އެ ގޭގައި ދިރިއުޅުނު މީހުން ވަގުތީ ހިޔާއަށް މިއަދު ބަދަލުކޮށްފިއެވެ.
އަލިފާނުގެ ހާދިސާ ހިނގައިފައިވަނީ އައްޑޫ ސިޓީ ހިތަދޫ، ގުލްކަނދުގޭގައެވެ.
އެމްއެންޑީއެފުން ބުނީ، ހާދިސާގެ ރިޕޯޓު ލިބުނީ މިއަދު ހެނދުނު 9:16 އެހާކަންހާއިރެވެ. އެއާ އެކު ފަޔާ ފައިޓަރުން އެ ސަރަހައްދަށް ގޮސް ކުރި މަަސައްކަތުން 9:40 އެހާކަންހާއިރު އަލިފާން ނިއްވާލެވުނު ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ، މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށެވެ. ނަމަވެސް، އެ ގޭގެ ވަރަށް ބޮޑު ބައެއް އަނދާފައިވާ ކަމަށް މައުލޫމާތު ދިނެވެ.
"ސަން"އަށް މައުލޫމާތުދެމުން އައްޑޫ ސިޓީ ހިތަދޫގެ ކައުންސިލަރު އާމިނަތު އަދާލާ ރަޝީދު ވިދާޅުވީ، ހާދިސާ ހިނގި ގޭގެ ސިޓިންރޫމް ބޭނުންނުކުރެވޭ ވަރަށް އަނދާފައިވާ ކަމަށެވެ. އަދި، ބަދިގެއަށް ވެސް އަލިފާނުގެ އަސަރުކޮށްފައިވާ ކަމަށް އޭނާ ވިދާޅުވިއެވެ.
އެ ގޭގައި ދިރިއުޅުނު މީހުން މިހާރު ވަގުތީ ހިޔާއަށް ބަދަލުކޮށްފައިވާ ކަމަށް އޭނާ ވިދާޅުވިއެވެ. އެއީ، އެ ގޭގައި އުޅުނު ތިން މީހުންނާއި ކުޑަ ކުއްޖެކެވެ.
މި ހާދިސާ ހިނގަން މެދުވެރިވި ސަބަބެއް މިހާތަނަށް އެނގިފައެއް ނުވެއެވެ. ފުލުހުން އަންނަނީ މި ހާދިސާއާ ގުޅިގެން އިތުރަށް ބަލަންޖެހޭ ކަންކަން ބަލަމުންނެވެ.