ޖުމުލަ 470 ދުވަހުގެ ހަނގުރާމައަށް ފަހު، އިސްރާއީލާއި ހަމާސްއާ ދެމެދު އެއްބަސްވެފައިވާ ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ފަށައިފިއެވެ.
ގާތްގަނޑަކަށް ތިން ގަޑިއިރު ލަސްވުމަކަށް ފަހު އެއްބަސްވުމަށް އަމަލުކުރަން ފަށާފައިވާކަން އިސްރާއީލުން އިއުލާނުކޮށްފައިވަނީ ހަމާސްއިން މިނިވަންކުރަން ހަމަޖެހިފައިވާ އަސީރުންގެ ލިސްޓް އިސްރާއީލަށް ލިބުމުންނެވެ.
ހަނގުރާމަ ހުއްޓާލުމުގެ އެއްބަސްވުމަށް ފުރަތަމަ އަމަލު ކުރަން ފެށުމަށް ހަމަޖެހިފައި އޮތީ މިއަދު ހެނދުނުއެވެ. ނަމަވެސް, ހަމާސްއިން ރަހީނުކުރި މީހުންގެ ލިސްޓު އިސްރާއީލަށް ފޯރުކޮށްދީފައިނުވާ ކަމަށްބުނެ އިސްރާއީލުން ވަނީ އެއްބަސްވުމަށް އަމަލު ކުރަން ނުފަށާނެ ކަމަށް ބުނެފައެވެ.
ލިސްޓު ފޯރުކޮށްދީފައިނުވާ ކަމަށްބުނެ ފާއިތުވެ ދިޔަ ތިން ގަޑިއިރު ތެރޭގައި އިސްރާއީލުން ވަނީ ޣައްޒާއަށް ހަމަލާދީ 19 މީހުން ޝަހީދުކޮށްލާ، 36 މީހުން ވަނީ ޒަޚަމްކޮށްލާފައެވެ.
އެއްބަސްވުމުގެ ދަށުން ހަނގުރާމަ ހުއްޓާލާ ފުރަތަމަ ދުވަހު މިނިވަން ކުރާނެ ތިން އަސީރުންގެ ނަން އިސްރާއީލަށް ލިބިފައިވާކަން ވަނީ ކަށަވަރުކޮށްދީފައެވެ. އެ މީހުން ދޫކޮށްލާނީ ރާއްޖެ ގަޑިން މިރޭ 17:00 (ޖީއެމްޓީ 14:00) ގެ ފަހުން ކަމަށް ވެސް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫގެ އޮފީހުން ވަނީ ބުނެފައެވެ.
އެއްބަސްވުމަށް އަމަލު ކުރަން ފަށާތާ ހަތް ދުވަސް ފަހުން ހަތަރު އަންހެން އަސީރުން މިނިވަންކުރާނެ ކަމަށް ވެސް އެ އޮފީހުން ހާމަކޮށްފައިވެއެވެ.
އެ އެއްބަސްވުމުގައިވަނީ ހަނގުރާމަ މަޑުޖައްސާލައި އިސްރާއީލުގެ ތިން އަސީރުންނާއި ފަލަސްތީނުގެ ގާތްގަނޑަކަށް 95 ގައިދީން ފުރަތަމަ ދުވަހު ދޫކޮށްލުމަށެވެ.
ހަ ހަފުތާގެ މުއްދަތެއް ހިމެނޭ އެއްބަސްވުމުގެ ފުރަތަމަ މަރުހަލާގައި ޣައްޒާގެ މެދުތެރެއިން އިސްރާއީލު ސިފައިން ފޭބުމާއި، ގެދޮރު ގެއްލިފައިވާ ފަލަސްތީނުގެ އާންމުން ޣައްޒާގެ އުތުރަށް އެނބުރި ދިއުން ހިމެނެއެވެ.
އެ އެއްބަސްވުމުގެ ދަށުން ހަނގުރާމަ ހުއްޓާލާފައި އޮންނަ ކޮންމެ ދުވަހަކު 600 ޓްރަކްގެ އިންސާނީ އެހީ ޣައްޒާއަށް ފޯރުކޮށްދޭންޖެހެއެވެ.
ޖުމުލަ 470 ދުވަސް ވަންދެން މެދުކެނޑުމެއްނެތި ދިން ހަމަލާތަކަށް ފަހު، ލިބުނު ހަމަޖެހުމުގެ ނޭވާގައި ޣައްޒާގެ ދެކުނުގައި އޮންނަ ޚާން ޔޫނިސްގައި ތިބި ފަލަސްތީނުގެ އާންމުން އަންނަނީ ރަފަޙްއަށް އެނބުރި ދިއުމަށް ތައްޔާރުވަމުންނެވެ.