އަސީރުން ތިބި ތަންތަނުގެ މައުލޫމާތު އެއްކޮށް ލިސްޓެއް ތައްޔާރުކުރަން ފާއިތުވެ ދިޔަ ދެ ދުވަހު ޣައްޒާއަށް ހަމަލާތައް ދިނުން މެދުކަނޑައިލުމަށް އިސްރާއީލު ސިފައިންނަށް ޤަތަރުގައި ތިއްބެވި މަޝްވަރާތަކުގެ ބައިވެރިން އެދުނު ކަމަށާއި ނަމަވެސް އިސްރާއީލުން އެކަން އެގޮތަށް ކޮށްފައިނުވާ ކަމަށް ދޯހާ އިންސްޓިޓިއުޓް ފޯ ގްރެޖުއޭޓް ސްޓަޑީޒްގެ ޕަބްލިކް ޕޮލިސީގެ އެސޯސިއޭޓް ޕްރޮފެސަރު ތަމަރު ޤަރުމައުތު ވިދާޅުވެއްޖެއެވެ.
ޤަރުމައުތު އަލްޖަޒީރާއަށް ވިދާޅުވި ގޮތުގައި އިސްރާއީލުގެ އަސީރުން ތިބިތަންތަން ސިއްރު ކުރުމަށް ކުރި މަސައްކަތް ހަމާސްއަށް ކާމިޔާބުވެފައިވާ ކަމަށާއި އެކަން އެގޮތަށް ކުރީ އިސްރާއީލުން އަސީރުން ހޯދައި އެ މީހުން މިނިވަންކޮށްފާނެ ކަމަށެވެ.
"ހަމާސްއިން ބޭނުންވަނީ ބާކީ ތިބި އަސީރުން ތިބި ތަން ހާމަ ނުކުރަން. ސަބަބަކީ މި ހަނގުރާމަ ނިމުމަކަށް ގެނައުމަށް އަޅުގަނޑުމެން މި ދައްކަނީ އެތައް މަރުހަލާތަކެއްގެ ވާހަކަ. އެއްވެސް ބަޔަކު އެބައެއްގެ އަތުގައި އޮންނަ އެއްޗެއް އެހާ ފަސޭހައިން ދޫކޮށެއް ނުލާނެ. ހަމާސްގެ ބެލުމުގެ ދަށުގައި ތިބީ އަސީރުން," ޤަރުމައުތު ވިދާޅުވިއެވެ.
ނަމަވެސް, އިސްރާއީލުން ޣައްޒާގައި ތިބުމާއި ގިނަ ސަރަހައްދުތަކެއްގެ ކޮންޓްރޯލު އެ މީހުންގެ އަތުގައި އޮތުމުގެ ސަބަބުން އަސީރުންގެ ތެރެއިން ދިރިތިބި މީހުންނާއި، ބައެއް އަސީރުން އެ މީހުން ތިބި ތަނުގައި ތިބިކަން ކަށަވަރުކުރަން އުދަގޫވި ކަމަށް ޤަރުމުއަތު ވިދާޅުވިއެވެ.
ހަނގުރާމަ ހުއްޓާލުމުގެ އެއްބަސްވުމުގެ ދަށުން ދޫކޮށްލާނެ އަސީރުންގެ ލިސްޓް ވަރަށް އަވަހަށް ހަވާލުކުރާނެ ކަމަށާއި ނަމަވެސް ޣައްޒާއަށް އިސްރާއީލުން ހަމަލާތައް ދޭތީ ލަސްތަކެއް ކުރިމަތިވެފައިވާ ކަމަށް ހަމާސްގެ އޮފިޝަލަކު މިހާރު ވަނީ ވިދާޅުވެފައެވެ.
ހަމާސްއިން މިހާތަނަށް ލިސްޓް އާންމުކޮށްފައި ނެތް ނަމަވެސް، ޣައްޒާގައި ހަމަލާތައް ހުއްޓާލުމަށް ވި އެއްބަސްވުމުގެ ފުރަތަމަ ފިޔަވަހީގައި އިސްރާއީލުގެ 33 ރަހީނުންގެ ބަދަލުގައި ފަލަސްތީނުގެ 1،890 އަށް ވުރެ ގިނަ ގައިދީން ދޫކޮށްލަން ނިންމާފައިވާ ކަމަށް މިސްރުން ވަނީ ބުނެފައެވެ.
ރަހީނުން ސަލާމަތް ނުކުރެވޭނަމަ، ހަމަލާތައް އަލުން ފެށުމުގެ ހައްގު އިސްރާއީލަށް އޮންނާނެ ކަމަށް ވެސް އެ ގައުމުގެ ބޮޑު ވަޒީރު ބެންޖަމިން ނަތަންޔާހޫ ވަނީ ވިދާޅުވެފައެވެ. އެކަން ކުރާނީ އެމެރިކާގެ އެހީގައި ކަމަށް ވެސް ނަތަންޔާހޫ ވަނީ ވިދާޅުވެފައެވެ.