އަނބިމީހާއަށް އަނިޔާކޮށްގެން ހައްޔަރުކުރި މީހަކު އިއްޔެ ކްރިމިނަލް ކޯޓުން ބަންދުން ދޫކޮށްލައިފިއެވެ.
މި މައްސަލައިގައި ހައްޔަރުކޮށްފައި ހުއްޓައި ދޫކޮށްލީ 32 އަހަރުގެ ދިވެހި ފިރިހެނެކެވެ.
އެ މީހާ ހައްޔަރުކުރީ އަނބިމީހާއަށް އަނިޔާކުރިކަމުގެ ތުހުމަތުގައެވެ. ކްރިމިނަލް ކޯޓުގެ އަމުރުގައި ބުނީ، އެ މީހާއާއި އަނބިމީހާއާ ދެމެދު ޖެހުނީ ދިރިއުޅުމުގެ މައްސަލައެއް ކަމަށާއި އެ ކަމާ ގުޅިގެން ފެމިލީ ކޯޓުން މިހާރު ގެވެށި އަނިޔާއިން ރައްކާތެރިކުރުމުގެ އަވަސް އަމުރެއް ނެރެދީފައިވާ ކަމަށެވެ.
އެ ފިރިހެން މީހާ ބަލަހައްޓައި، ޚަރަދުކުރަން ޖެހޭ ދެ ކުދިން ތިބޭ ކަމަށާއި އެ މީހާ އުޅެނީ ވަޒީފާއެއްގައި ކަމަށް ވެސް ކޯޓު އަމުރުގައިވެއެވެ.
އެހެންވެ، ޝަރުތުތަކެއް ކުރުމަށް ފަހު އެ މީހާ ބަންދުން ދޫކޮށްލަން އިއްޔެ ކްރިމިނަލް ކޯޓުން ވަނީ އަމުރުކޮށްފައެވެ.