މަގުމަތީގައި މަސްތުގެ ހާލަތުގައި އުޅޭ މީހުންނަށް ފަރުވާ ދިނުމަށް ހިންގާ ރިމާންޑް އޮޕަރޭޝަންގެ ތެރެއިން މިހާތަނަށް 74 މީހުން ރިމާންޑް ސެންޓަރުތަކަށް ނަގާފައި ވާކަމަށް ނެޝަނަލް ޑްރަގް އެޖެންސީ (އެންޑީއޭ)ގެ ޗެއާޕާސަން ލުބްނާ ޒާހިރު ވިދާޅުވެއްޖެއެވެ.
"ސަރުކާރު" ވެބްސައިޓުގައި ވާގޮތުން، ޑްރަގުގެ ފަރުވާ ބޭނުންވާ ގިނަ ބަޔަކު ތިބިކަން ލުބުނާ ވަނީ ފާހަގަކުރައްވާފައެވެ. އެގޮތުން އެމީހުން ވޮލަންޓިއަރުންގެ ގޮތުގައާއި ޑްރަގް ކޯޓު މެދުވެރިކޮށް އަދި ރިމާންޑް އޮޕަރޭޝަނުން ފަރުވާގެ ތެރެއަށް ވައްދަމުން ދާކަމަށް އޭނާ ވިދާޅުވިއެވެ.
"މީގެ ތެރޭގައި އަޅުގަނޑު ހަމަ ފާހަގަކޮށްލަން މިއަދާއި ހަމައަށް މަގުމަތިން އަޅުގަނޑުމެން 74 މީހަކު ވާނީ [ފަރުވާއަށް] ވައްދާފަ. މީގެ ތެރެއިން ގާތްގަނޑަކަށް 50 މީހުން ވަނީ ރިމާންޑްގެ މުއްދަތު ހަމަކޮށް އެންޑީއޭގެ ފަރުވާގެ ނިޒާމުގެ ތެރެއަަށް ޑްރަގް ރީހެބިލިޓޭޝަނަށް ވަދެފަ. އެއީ އަޅުގަނޑުމެންނަށް ލިބޭ ވަރަށް ބޮޑު ކާމިޔާބީއެއް،" ލުބްނާ ވިދާޅުވިއެވެ.
އޭނާ ވިދާޅުވީ، މަސްތުވާތަކެތި ބޭނުންކުރާ މީހުންގެ ހާލަތަށް ބަލައި، އަވަހަށް ފަރުވާ ބޭނުންވާ މީހުންނަށް އެންޑީއޭއިން އައުޓްރީޗް ކުރައްވާ ކަމަށާއި މި މަސައްކަތުގައި މޯލްޑިވްސް ޕޮލިސް ސާވިސްގެ އެއްބާރުލުން ވަރަށް ބޮޑަށް ލިބޭ ކަމަށެވެ.
މަސްތުވާތަކެތީގެ ވަބާގައި ޖެހިފައިވާ މީހުން މުޖުތަމައުގައި ބައިތިއްބައިގެން ދޭ ފުރަތަމަ ފަރުވާއަކީ ޑިޓޮކްސިފިކޭޝަން ކަން ފާހަގަކުރައްވައި، ލުބުނާ ވިދާޅުވީ މި ފަރުވާ ހޮސްޕިޓަލްތައް މެދުވެރިކޮށް ފަށާނީ ޑޮކްޓަރުންގެ އެހީގައި ބޭސް ދީގެން ކަމަށެވެ.
"ޑިޓޮކްސިފިކޭޝަން ޕްރޮސެސް އަޅުގަނޑުމެން ހިންގާނީ ހެލްތު ފެސިލިޓީތަކާ ގުޅިގެން. މިހާރު އަޅުގަނޑުމެންނަށް ވަނީ ހެލްތު މިނިސްޓްރީން މީގެ ފެހި ސިގްނަލް ދެއްވާފަ. އެހެންވީމަ އަޅުގަނޑުމެން ހަމަ ހޮސްޕިޓަލްތަކާ ގުޅިގެން ޑޮކްޓަރުން ވެސް ޓްރެއިންވެގެން މި ޓްރީޓްމެންޓް މިފަށަނީ،" އޭނާ ވިދާޅުވިއެވެ.
މިއަހަރުގެ މަސައްކަތަށް އަލި އަޅުއްވާލައްވައި ލުބުނާ ވިދާޅުވީ، މިއަހަރު އެންމެ ބޮޑު އިސްކަމެއް ދެއްވާނީ އެންޑީއޭގެ ސެންޓަރުތަކުގެ ފެންވަރު ރަނގަޅު ކުރުމަށް ކަމަށެވެ.
އެގޮތުން، ސެންޓަރުތަކުގެ ޖާގަ އިތުރުކޮށް އެތަންތަނުގެ ހާލަތު ރަނގަޅު ކުރަން މަަސައްކަތް ކުރައްވާނެކަމަށް ލުބުނާ ވިދާޅުވިއެވެ.
ވޭތުވެދިޔަ 10 އަހަރު، އެންޑީއޭގެ ސެންޓަރުތަކުގެ ސްޓްރަކްޗާތަކަށް އެއްވެސް ބަދަލެއް ގެނެސްފައި ނުވާކަން ފާހަގަކުރައްވައި ލުބުނާ ވަނީ އެކަމާ ކަންބޮޑުވުން ފާޅުކުރައްވާފައެވެ.
މާލޭގެ މަގުތަކުގައި މަސްތުގެ ހާލަތުގައި އުޅޭ މީހުންނާއި މަސްތުގެ ހާލަތުގައި ހުރެ ކުށްތަކަށް އަރައިގަންނަ މީހުން ބަންދުކޮށް ފަރުވާ ދިނުމުގެ މަސައްކަތް އެންޑީއޭއާއި ފުލުހުން ގުޅިގެން ފެށީ މިދިޔަ އަހަރުގެ އޮކްޓޯބަރު 20ވަނަ ދުވަހުއެވެ.
މި ހަރަކާތުގެ ދަށުން، މަގުމަތީ ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި، ވައްކަމާ ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި، މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާހަދާ މަސްތުވާތަކެތި ބޭނުންކުރާ މީހުން ބަންދުކޮށް ރިމާންޑް ސެންޓަރުތަކަށް ގެންދާނެކަމަށް އޭރު ފުލުހުން ވަނީ ބުނެފައެވެ.