މާލޭގެ މަގުތަކުގައި މަސްތުގެ ހާލަތުގައި އުޅޭ މީހުންނާއި މަސްތުގެ ހާލަތުގައި ހުރެ ކުށްތަކަށް އަރައިގަންނަ މީހުން ބަންދުކޮށް ފަރުވާ ދިނުމުގެ މަސައްކަތް ނެޝަނަލް ޑްރަގް އެޖެންސީ (އެންޑީއޭ) އާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓް ގުޅިގެން ފަށައިފިއެވެ.
އެންޑީއޭ އާއި ފުލުހުން ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ސުޕްރިޓެންޑެންޓް އޮފް ޕޮލިސް އަދި ޑްރަގު އެންފޯސްމެންޓް ޑިޕާޓްމަންޓުގެ ހެޑް، ނާހިދު ހުސެއިން ވިދާޅުވީ މިއީ މަސްތުވާތަކެއްޗާ ބެހޭ ގާނޫނުގެ 103ވަނަ މާއްދާގެ ދަށުން ކުރިއަށް ގެންދާ ހަރަކާތެއް ކަމަށެވެ.
މި ހަރަކާތުގެ ދަށުން، މަގުމަތީ ސަލާންޖަހަން އުޅޭ މަސްތުވާތަކެތި ބޭނުންކުރާ މީހުންނާއި، ވައްކަމާ ފޭރުމުގައި ހަރަކާތްތެރިވާ މަސްތުވާތަކެތި ބޭނުންކުރާ މީހުންނާއި، މަގުމަތީ މަސްތުގެ ހާލަތުގައި އުޅޭ މީހުންގެ އިތުރުން މިސްކިތްތަކުގައި ނިދާހަދާ މަސްތުވާތަކެތި ބޭނުންކުރާ މީހުން ބަންދުކޮށް ރިމާންޑް ސެންޓަރުތަކަށް ގެންދާނެކަމަށް އޭނާ ވިދާޅުވިއެވެ.
އެގޮތުން، މި ހަރަކާތުގެ ދަށުން ނުވައެއް އޮކްޓޯބަރުން ފެށިގެން 14 މީހުން ބަންދުކޮށްފައިވާ ކަމަށް ނިހާދު ވިދާޅުވިއެވެ.
"އަދި މަސްތުވާތަކެއްޗާ ބެހޭ ގާނޫނުގެ ދަށުން ބަންދުން ނުވީއްލި މިފަރާތްތަކުގެ ފަރުވާގެ ކަންކަން ކުރިއަށްގެންދަން ކުރަންޖެހޭ ކަންކަން ކަމާގުޅުންހުރި އިދާރާތަކާ ގުޅިގެން ދަނީ ކުރަމުން. މި ފެށުނު މަސައްކަތުން ކުރިއަށްއޮތް ތަނުގައި ރައްޔިތުންނަށް މަގުމަތިން ހެޔޮ ބަދަލުތަކެއް ފެންނާނެކަމަކީ އަޅުގަނޑު ޔަގީންކުރާކަމެއް،" ނާހިދު ވިދާޅުވިއެވެ.
އެންޑީއޭ އާއި ފުލުހުން ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން -- ސަން ފޮޓޯ/ އަމަން ލަތީފް
މަސްތުވާތަކއްޗާ ބެހޭ ގާނޫނުގެ 103ވަނަ މާއްދާއަކީ މީގެ ކުރިން އެއްވެސް ވަރަކަށް ބޭނުންކުރެވިފައި ނުވާ މާއްދާއެއްކަން އޭނާ ވަނީ ފާހަގަ ކުރައްވައިފައެވެ.
މީގެކުރިން މަސްތުވާތަކެތީގެ ފަރުވާދީފައި ވަނި މީހުން އަމިއްލައަށް ބޭނުންވެގެން، މައްސަލައެއްގެ ތެރެއިން ނުވަތަ ހުކުމެއް ކޮށްގެންކަން ފާހަގަކުރައްވާ ނާހިދު ވިދާޅުވީ، މި މާއްދާގެ ދަށުން ފަރުވާ ދޭނީ، މަސްތުވާތަކެތީގެ ފަރުވާދޭންޖެހޭ މީހެއްކަމަށް ފުލުހުންނަށް ފެންނަ މީހުންނަށް ކަމަށެވެ.
މިފަދަ މީހުންނަށް ފަރުވާދޭ ރިމާންޑް ސެންޓަރު ގާއިމްކޮށްފައި ވަނީ ކ. ހިންމަފުއްޓާއި ހުޅުމާލޭގައެވެ.
މިއަދުގެ ނޫސްވެރިންގެ ބައްދަލުވުމުގައި އެންޑީއޭގެ ޗެއާޕާސަން ލުބްނާ ޒާހިރު ވިދާޅުވީ، މިއީ ވަރަށް މުހިންމު މަސައްކަތެއް ކަމުގައި ގަބޫލުކުރައްވާ ކަމަށެވެ.
ފުރަތަމަ ރިމާންޑް ސެންޓަރު ހިންގީ ހިންމަފުށީގައިކަން ފާހަގަކުރައްވާ އޭނާ ވިދާޅުވީ، ހުޅުމާލޭގެ ރިމާންޑް ސެންޓަރު ހުޅުވައި ފަރުވާ ދޭންފެށީ ދާދި ފަހުންކަމަށެވެ.