އިޓާލިއަން ސެރީއާގެ އެއްވަނައިގައި އޮތް ނަޕޯލީން ލީގަށް ވާދަކުރަމުން އަންނަ އެޓަލާންޓާ ބަލިކޮށްފިއެވެ.
އެޓަލާންޓާގެ ދަނޑުގައި ކުޅުނު މި މެޗު ނަޕޯލީން ކާމިޔާބުކޮށްފައިވަނީ ފަހަތުން އަރައި 3-2 އިންނެވެ.
މެޗުގެ ފުރަތަމަ ލަނޑު މެޗުގެ 16 ވަނަ މިނެޓުގައި ކާމިޔާބުކޮށް މެޗުގެ ލީޑު ނަގާފައިވަނީ އެޓަލާންޓާއިންނެވެ. މި ލަނޑު އެ ޓީމަށް ކާމިޔާބުކޮށްދިނީ މެޓިއޯ ރެޓެގޫއެވެ. މެޗުގައި ނަޕޯލީން މެޗުގެ ނަތީޖާ ހަމަހަމަކޮށްފައިވަނީ 27 ވަނަ މިނެޓުގައި މެޓިއޯ ޕޮލިޓާނޯ ކާމިޔާބުކޮށްދިން ލަނޑުންނެވެ. ފުރަތަމަ ހާފު ނިމެން ފަސް މިނެޓަށް ވެފައިވަނިކޮށް ނަޕޯލީއަށް މިމެޗުގެ ލީޑު ނަގައިދިނީ ސްކޮޓް މެކްޓޮމިނޭއެވެ.
ފުރަތަމަ ހާފުގައި 2-1 އިން ނަޕޯލީ ކުރީގައި އޮވެގެން ނިމުނު ނަމަވެސް ދެވަނަ ހާފުގެ ކުޅުން ފެށިތާ 10 މިނެޓްގެ ތެރޭގައި އަޑެމޯލާ ލޫކްމަން ކާމިޔާބުކޮށްދިން ލަނޑުން އެޓަލާންޓާއިން ވަނީ މެޗުގެ ނަތީޖާ ހަމަހަމަކޮށްފައެވެ.
މެޗުން މޮޅުވެވޭތޯ ދެ ޓީމުން ކުރަމުންދިޔަ މަސައްކަތުގައި ކުރި ލިބިގެންދިޔައީ ނަޕޯލީއަށެވެ. މެޗުން ނަޕޯލީ މޮޅުވި ލަނޑު އެ ޓީމަށް މެޗުގެ 78 ވަނަ މިނެޓުގައި ކާމިޔާބުކޮށްދިނީ ރޮމެލޫ ލުކާކޫއެވެ.
މި ކާމިޔާބީއާ އެކު ނަޕޯލީ މިހާރު އޮތީ ކުޅުނު 21 މެޗުން ލިބިފައިވާ 50 ޕޮއިންޓާ އެކު އެއްވަނައިގައެވެ. ދެވަނައިގައި އޮތް އެންމެ ފަހުގެ ޗެމްޕިއަން އިންޓާ މިލާންގެ މައްޗަށް ހަ ޕޮއިންޓްގެ ލީޑެއް އެބައޮތެވެ. ނަމަވެސް އިންޓާއިން އަދި ނުކުޅެ ދެ މެޗު އޮތުމާ އެކު ނަޕޯލީއާ ޕޮއިންޓްގެ ގޮތުން އަރާ ހަމަކުރުމަކީ ގާތް ކަމެކެވެ.
އެޓަލާންޓާ އޮތީ 43 ޕޮއިންޓާ އެކު ތިންވަނައިގައެވެ.
މި މުބާރާތުގައި ޔުވެންޓަސްއާއި އޭސީ މިލާން ބައްދަލުކުރި މެޗު އަމިއްލަ ދަނޑުގައި 2-0 އިން ކާމިޔާބުކޮށްފައިވަނީ ޔޫވޭއެވެ. މެޗުގައި ޔޫވޭއިން ކާމިޔާބުކުރި ދެ ލަނޑު އެ ޓީމަށް ކާމިޔާބުކޮށްދީފައިވަނީ ސެމިއުލް އެމްބަންގޫލާއާއި ޓިމޮތީ ވެއާއެވެ.
މި ކާމިޔާބީއާ އެކު ޔޫވޭ މިހާރު އޮތީ 37 ޕޮއިންޓާ އެކު ހަތަރުވަނައިގައެވެ. މިލާން އޮތީ 31 ޕޮއިންޓާ އެކު އަށްވަނައިގައެވެ.