މި ވަގުތު ހޮލީވުޑްގައި ހުރި އެންމެ ޑިމާންޑު ބޮޑު ތަރީންގެ ތެރޭގައި ހިމެނޭ ޒުވާން އެކްޓަރު ޓިމޮތީ ޝަލަމޭ ރެޑް ކާޕެޓް އިވެންޓަކަށް ބައިސްކަލެއްގައި ދިޔުމުން އޭނާ ޖޫރިމަނާކޮށްފިއެވެ.
ޓިމޮތީގެ އެންމެ ފަހުގެ ފިލްމު ކަމަށްވާ "އަ ކޮމްޕްލީޓް އަންނޯން"ގެ ޕްރިމިއާ އިވެންޓު ވަނީ ދާދި ފަހުން އިނގިރޭސިވިލާތުގައި ބާއްވާފައެވެ. މި ރެޑްކާޕެޓް އިވެންޓަށް ޓިމޮތީ ގޮސްފައި ވަނީ ލައިމް ލައިންގެ ބައިސްކަލެއްގައެވެ.
ނަމަވެސް ރެޑްކާޕެޓް އިވެންޓް ނިމެންވި އިރު ލައިމްއިން ވަނީ ޓިމޮތީ ޖޫރިމަނާ ކޮށްފައެވެ. ދާދި ފަހުން ދިން އިންޓަވިއުއެއްގައި އޭނާ ބުނެފައި ވަނީ ލައިމްއިން އޭނާ ޖޫރިމަނާ ކުރީ 79.53 ޑޮލަރުން ކަމަށެވެ.
އޭނާ ޖޫރިމަނާ ކޮށްފައި ވަނީ ރަނގަޅަށް ބައިސްކަލު ޕާކު ނުކުރުމުގެ ސަބަބުން ކަމަށް ވެސް އޭނާ ބުނެއެވެ.
ލައިމްގެ ބައިސްކަލުތައް ޖެހޭނީ ވަކި ގޮތަކަށް ޕާކު ކުރާށެވެ. އެހެންނޫނީ އެ ފެންނާނީ ދުވަމުން ދާ އުޅަނދެއްގެ ގޮތުގައެވެ. ނަތީޖާއެއްގެ ގޮތުން އޭގެ ފީ ހިނގަމުންދާނެއެވެ.
ލައިމަކީ އިނގިރޭސިވިލާތުގެ ޕަބްލިކް ޓްރާސްޕޯޓް ލައިންގެ ތެރެއިން ހިމެނޭ އެއް ބައެވެ. އޫބާގެ ދަށުން ހިންގާ ލައިމަކީ އިލެކްޓްރިކް ބައިސްކަލާއި ސްކޫޓަރު ހުންނަ ބްރޭންޑެކެވެ. ކުޑަ ފީއެއް ދައްކައިގެން އިނގިރޭސިވިލާތުގެ އެކި ކަންކޮޅުތަކުގައި ދުއްލާވެލޭއިރު މިއީ އަވަހަށް ތަނަކަށް ދާން ބޭނުންވާ މީހުންނަށް އޮތް ހަރަދުކުޑަ ގޮތެކެވެ. އިނގިރޭސިވިލާތުގެ އިތުރުން ޔޫރަޕްގެ އެކި ގައުމުތަކުގައި ވެސް ލައިމް މިހާރު ބޭނުން ކުރެއެވެ.
ޓިމޮތީ އިވެންޓަށް ގޮސްފައިވަނީ ލައިމްގެ އިލެކްޓްރިކް ބައިސްކަލެއްގައި ސޫޓަކާއި ފަޓުލޫނެއް ލައިގެންނެވެ. އޭނާ އިވެންޓަށް ގޮސްފައި ވަނީ އެކަންޏެވެ.