މަޝްހޫރު ޑިރެކްޓަރު އަދި ފިރިމީހާ ޖެފް ބައީނާގެ މަރާ ގުޅިގެން އާންމުންގެ ފަރާތުން ދައްކަމުން ދިޔަ ވާހަކަތާ އެކު މަޝްހޫރު ތަރި އޯބްރީ ޕްލާޒާގެ ސޯޝަލް މީޑިއާތައް ޑިލީޓްކޮށްލައިފިއެވެ.
ގިނަ ބައެއްގެ މެދުގައި މަގުބޫލުކަން ހޯދާފައިވާ އެކްޓަރު އޯބްރީގެ ފިރިމީހާ މަރުވެފައިވަނީ މި މަހު ކުރީކޮޅެވެ. އޭނާ މަރުވެފައި އޮއްވާ ފެނުނީ ލޮސް އެންޖެލެސްގައި ހުންނަ ގޭތެރެއިންނެވެ.
ބައީނާގެ މަރާ ގުޅިގެން އިންޓަނެޓުގައި އަންނަނީ ތަފާތު ވާހަކަތައް ދައްކަމުންނެވެ. އެގޮތުން، އެންމެ ގިނަ ބަޔަކު ދައްކަމުން އައީ އޯބްރީ ސިންގަލް ކަމަށް ބުނާ ވާހަކައެވެ. މިހާރު އަނެއްކާ އޯބްރީ އާ "ޑޭޓް" ކޮށްލަން ފުރުސަތު އޮތް ކަމަށް ބުނެ އެތައް ބަޔަކު ފާޑުފާޑުގެ ވާހަކަތައް އައީ ސޯޝަލް މީޑިއާގައި ދައްކަމުންނެވެ.
މިފަދަ ނާޒުކު ދަނޑިވަޅެއްގައި ވެސް އޯބްރީގެ ޑޭޓިން ލައިފަށް ސަމާލުކަން ދޭތީ އެ ކަމާ ގުޅިގެން ބައެއް މީހުންގެ ފަރާތުން ވަނީ އެކަމާ ކަންބޮޑުވުން ފާޅުކޮށްފައެވެ.
މި ވާހަކަތައް ސޯޝަލްމީޑިއާގައި ދެއްކުމުގެ ކުރީން އޯބްރީ ބުނެފައިވަނީ އޭނާގެ ފިރިމީހާގެ މަރާ އެކު އާންމުންގެ ފަރާތުން އޭނާގެ ޕްރައިވެސީއަށް އިހުތިރާމު ކުރުމަށެވެ. ނަމަވެސް، އާންމުންގެ ފަރާތުން އިވިގެން ދިޔައީ އެހެން ވާހަކައެކެވެ.
އެއާ ގުޅިގެން ދާދި ފަހުން އޯބްރީ ވަނީ އޭނާގެ ސޯޝަލް މީޑިއާ އެކައުންޓްތައް ޑީއެކްޓިވޭޓް ކޮށްލާފައެވެ. އެ އަލުން އެކްޓިވޭޓް ކުރާނެ ދުވަހެއް ނޭނގެއެވެ. މިކަމާ ގުޅިގެން އިތުރު މައުލޫމާތެއް އޭނާ އަދި އޭނާގެ އޭޖެންޓް ހިއްސާކޮށްފައެއް ނުވެއެވެ.
އޯބްރީ އެންމެ ފަހުން ފެނިގެން ގޮސްފައިވަނީ ޑިޒްނީ ޕްލަސްގެ މާވެލް، އެގެތާ އޯލް އެލޯންގް ޝޯއިން ސަޕޯޓިން ރޯލަކުންނެވެ. މިއީ އޯބްރީ މާވެލް އާ ގުޅުން ފުރަތަމަ އުފެއްދުމެވެ. ކުރިއަށް އޮތް ތަނުގައި އިތުރު ޝޯތަކުން އަދި ފިލްމުތަކުން އޭނާ ފެނިގެންދާނެ ކަމަށް ޑިޒްނީން ވަނީ އިޝާރާތްކޮށްފައެވެ.