ނުކުޅެދުންތެރިކަން ހުރި ދަރިވަރަކަށް ޓީޗަރަކު އަނިޔާކުރި މައްސަލައެއް އެޑިއުކޭޝަން މިނިސްޓްރީން ޕޮލިހަށް ހުށަހަޅައިފިއެވެ.
މިކަމާ ގުޅިގެން މިނިސްޓްރީން ބުނީ، މާލެ ސަރަހައްދުގެ ސްކޫލެއްގެ ޕްރައިމަރީ ގްރޭޑްގައި ތައުލީމު ހާސިލްކުރާ ހާއްސަ އެހީއަށް ބޭނުންވާ ކުއްޖަކަށް ޖިސްމާނީ އަނިޔާ ކުރިކަމަށް ސްކޫލްގެ ފަރާތުން އެ މިނިސްޓްރީގެ ސަމާލު ކަމަށް ގެނެސްފައި ވާކަމަށެވެ. އެއާއެކު އެ މައްސަލަ ފުލުހަށް ހުށަހަޅާފައި ވާކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
ނުކުޅެދުންތެރިކަން ހުރި، ދަރިވަރަކަށް ދިމާވި ހާދިސާއާ ގުޅިގެން ކަންބޮޑުވުން ފާޅުކުރައްވާ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ ދަރިވަރުންނަށް މިފަދަ އަނިޔާ ދިނުމަކީ ބަލައިގަންނާނެ ކަމެއް ނޫންކަމަށެވެ. އަދި މިފަދަ މައްސަލަތައް މިނިސްޓްރީގެ ފަރާތުން ޒިންމާދާރުކަމާއެކު ކަމާބެހޭ ފަރާތްތަކަށް ހުށަހަޅައި ތަކުރާރު ނުވާނޭހެން ފިޔަވަޅު އަޅަމުންގެންދާނެ ކަމަށް މިނިސްޓަރު ވަނީ ވިދާޅުވެފައެވެ.
ޒިންމާދާރުކަމާއެކު ދަރިވަރުންގެ ހައްގުތައް ހިމާޔަތްކޮށް އުފާވެރި އަމާން މާހައުލެއްގައި ދަރިވަރުން ތައުލީމު ހާސިލްކުރުމަށް ޓީޗަރުން ހާއްސަ ސަމާލުކަމެއް ދެއްވުމަށް މިނިސްޓަރު ވަނީ އެދިވަޑައިގެންފައެވެ.
ކުޑަކުދިންގެ ހައްގުތައް ރައްކާތެރިކުރުމާ ބެހޭ ގާނޫނު ދަށުން ކުއްޖާގެ ވަނަވަރު ހާމަވެދާނެތީ، އެ ކުއްޖާ ތައުލީމު ހާސިލްކުރާ ސްކޫލު އަދި ޓީޗަރުގެ މައުލޫމާތު ހާމަކުރެވެން ނެތްކަމަށް މިނިސްޓްރީން ވަނީ ބުނެފައެވެ.
ޓީޗަރަކު ދަރިވަރުންތަކަކަށް ގްރޫމްކުރި މައްސަލައެއް މީގެ ކުރިން ވަނީ ފެންމަތިވެފައެވެ.