ރައީސް ޑރ. މުޙައްމަދު މުޢިއްޒު މީގެ ކުރިން ވިދާޅުވިގޮތަށް، ރ. އަތޮޅުގެ ފަޅު ރަށެއްކަމަށްވާ "އުނގުލު" އެ އަތޮޅު އުނގޫފާރުގެ އިހްތިޞާސްގެ ތެރޭގައި ހިމެނޭ ރަށެއްގެ ގޮތުގައި މިއަދު ކަނޑައަޅުއްވައިފިއެވެ.
ރައީސުލްޖުމްހޫރިއްޔާގެ އޮފީހުން ބުނި ގޮތުގައި، މި ނިންމެވުން ރައީސް ވަނީ ނިންމަވައިފައެވެ.
މީގެކުރިން އުނގޫފާރު ރައްޔިތުން ވަނީ އެ ރަށުގައި ސިނާޢީ އެކި މަސައްކަތްތައް ކުރުމަށް ޓަކައި ފަޅު ރަށެއް ބޭނުންވާ ކަމަށް ރައީސް އަރިހުގައި ދަންނަވާފައެވެ.
މިކަމާ ގުޅިގެން 2024 ވަނަ އަހަރުގެ މާޗު މަހުގެ ތިންވަނަ ދުވަހު ރައީސް މުޢިއްޒު އުނގޫފާރަށް ކުރެއްވި ދަތުރުފުޅުގައި ވަނީ، އުނގުލަކީ އެއްވެސް ބަޔަކަށް ދީފައިވާ ރަށެއްތޯ ނުވަތަ އެ ރަށާ ގުޅޭ އެއްވެސް މައްސަލައެއް ކޯޓެއްގައި ހިނގަމުންދޭތޯ ބެއްލެވުމަށްފަހު، އެފަދަ ކަމެއް ނެތް ނަމަ އެ ރަށް އުނގޫފާރު ކައުންސިލާ ޙަވާލުކޮށްދެއްވާނެ ކަމަށް ވަޢުދުވެވަޑައިގެންފައެވެ.
އުނގޫފާރަކީ މި ސަރުކާރުން ތަރައްގީކުރާ އާބަން ސެންޓަރުތަކުގެ ތެރެއިން އެއް ސެންޓަރުގެ ގޮތުގައި ތަރައްގީކުރާނެ ރަށެއްކަމަށް ވެސް ރައީސް ވިދާޅުވިއެވެ.