ރަޝިޔާ-ޔޫކްރެއިން ހަނގުރާމައިގައި ރާއްޖޭން ޔޫކްރެއިނަށް ތާއީދުކުރި ކަމަށް ދެކެވޭ ވާހަކަތައް ފޮރިން މިނިސްޓަރު ޑރ. އަބްދުﷲ ޚަލީލް މިއަދު ދޮގުކުރައްވައިފިއެވެ.
ރައީސް ޑރ. މުހައްމަދު މުއިއްޒު އެސްޓޯނިޔާއަށް ކުރައްވަމުން ގެންދަވާ ދަތުފުޅުގެ ތެރެއިން އެ ގައުމުގެ ގާނޫނު ހަދާ މަޖިލީހުގެ އިސްވެރިންނާ އެކު ބޭއްވެވި ބައްދަލު ކުރެއްވުންތަކަށް ފަހު، އެ ތަނުން ކުރި ޕޯސްޓެއްގައިވަނީ ބައިނަލްއަގުވާމީ ގާނޫނުތައް ދިފާއުކޮށް ރާއްޖޭން ޔޫކްރެއިނަށް ތާއީދުކުރާތީ ޝުކުރު އަދާކުރާ ކަމަށް ބުނެފައެވެ.
މި ކަމާ ގުޅިގެން ރަޝިޔާ-ޔޫކްރެއިން ހަނގުރާމައިގައި ރާއްޖެއިން ޔޫކްރެއިނަށް ތާއީދުކުރީތޯ ގިނަ ބަޔަކު ސުވާލު އުފައްދަމުންދަނިކޮށް، ޚަލީލް މިއަދު އެކްސްގައި ކުރެއްވި ޕޯސްޓެއްގައިވަނީ ރާއްޖޭން ޔޫކްރޭނަށް ތާއީދުކުރި ވާހަކަ ދޮގު ކުރައްވައިފައެވެ.
ފޮރިން މިނިސްޓަރު ވިދާޅުވީ، ބައިނަލްއަގުވާމީ މައިދާނުގައި ރާއްޖޭން ގެންގުޅޭ ސިޔާސަތުތައް ބަަދަލުނުވާ ކަމަށާއި، އދ. ގައި ރާއްޖެއިން ވޯޓު ދެމުންދާ ގޮތަށް ބައްލަވައިލެއްވުމުން އެކަން ސާފުވާނެ ކަމަށެވެ.
ދިވެހިރާއްޖޭގެ ޚާރިޖީ ސިޔާސަތު ބިނާވެގެންވަނީ އެއްވެސް ގައުމަކާ މެދު ހަތުރުވެރިނުވެ، ރައްޔިތުންނަށް މަންފާ ލިބި، އަދި ރާއްޖޭގެ މިނިވަންކަމަށް ބުރޫ ނާރާހެން ހުރިހާ ގައުމުތަކާ އެކުގައި ވެސް ގާތް ގުޅުން ބޭއްވުމުގެ މައްޗަށް ކަމަށް އޭނާ ވިދާޅުވިއެވެ.
ކުދި ގައުމުތަކުގެ މިނިވަންކަމާއި ސިޔާދަތާއި އިސްތިގުލާލަށް ބުރޫއަރާފަދަ ހާލަތްތަކުގައި ރާއްޖެއިން އަބަދު ވެސް ނަގަނީ ޕްރިންސިޕަލް ސްޓޭންޑެއް ކަމަށް މިނިސްޓަރު ވިދާޅުވެފައިވެއެވެ.
"ދިވެހިރާއްޖޭގެ ޚާރިޖީ ސިޔާސަތު ބިނާވެގެންވަނީ އެއްވެސް ޤައުމަކާ ހަތުރުވެރިނުވެ ދިވެހި ރައްޔިތުންނަށް ލާބައާއި މަންފާ ލިބޭ ގޮތަށް އަދި ރާއްޖޭގެ މިނިވަންކަމާއި ސިޔާދަތަށް ބުރޫ ނާރާގޮތަށް ހުރިހާ ޤައުމަކާ އެކީ ވެސް ގާތް ގުޅުން ބޭއްވުމުގު މައްޗަށް،" ޚަލީލް ވިދާޅުވިއެވެ.
އެސްޓޯނިއާއިންދަނީ ރަޝިޔާ-ޔޫކްރެއިން ހަނގުރާމައިގައި ޔޫކްރެއިނަށް އެހީތެރިކަން ފޯރުކޮށްދެމުންނެވެ.
ރާއްޖޭގެ އިގުތިސާދު ފަތުރުވެރިކަމަށް ބަރޯސާވެފައި އޮތްއިރު، މި އަހަރުގެ މިހާތަނަށް އެންމެ ގިނަ އަދަދެއްގެ ފަތުރުވެރިން ޒިޔާރަތްކުރީ ރަޝިޔާއިންނެވެ. އެ ގޮތުން 12،900 އަށްވުރެ ގިނަ ފަތުރުވެރިން އެ ގައުމުން ޒިޔާރަތްކޮށްފައިވެއެވެ.