ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރު)ގެ ޑާޓާބޭސް ބޭނުންކޮށްގެން ޕީއެންސީއަށް މެމްބަރުން އިތުރުކުރަން ވަގު ފޯމު ހުށަހެޅިކަމަށް ބުނާ މައްސަލައިގައި ހޯމްލޭންޑް މިނިސްޓަރު އަލީ އިހުސާން މަގާމުން ދުރުކޮށް، އޭނާގެ މައްޗަށް ތަހުގީގެއް ހިންގަން ދަ ޑިމޮކްރެޓްސްއިން ވެސް ގޮވާލައިފިއެވެ.
ސަރުކާރު ހިންގާ ޕީއެންސީން މި ފަހުން ހިންގި މެންބަޝިޕް ޑްރައިވްގެ ތެރެއިން، 82،000 އަށްވުރެ މެމްބަރުން އެ ޕާޓީއަށް ވައްދާފައިވާ ކަމަށް އެ ޕާޓީން ބުނެފައިވެއެވެ. އޭގެ ތެރޭގައި ވަގަށް އެ ޕާޓީއަށް ވައްދާފައިވާ މީހުން ވެސް ހިމެނެއެވެ. ބައެއް ފަރާތްތަކުން އެ މައްސަލަ ފުލުހަށް ހުށަހަޅަމުންދާއިރު، ސޯޝަލް މީޑިއާގައި ވަނީ މި ކަމާގުޅުންހުރި ކަމަށް ބެލެވޭ ފޮޓޯތަކެއް ވެސް އާންމުވެފައެވެ.
މި މައްސަލައާ ގުޅިގެން ސަރުކާރަށާއި، ހޯމްލޭންޑް މިނިސްޓަރު އިހުސާނަށް ބޮޑެތި ތުހުމަތުތަކެއް ދަނީ ކުރެވެމުންނެވެ.
މި ކަމާ ގުޅިގެން ޑިމޮކްރެޓުން މިރޭ ނެރުނު ބަޔާނުގައިވަނީ އިހުސާނުގެ އަޚްލާގީ ފެންވަރު ގެއްލިފައިވާ ކަމަށްބުނެ، އޭނާ މަގާމުން ދުރުކޮށް ސީރިއަސް ތަހުގީގެއް ހިންގުމަށް ގޮވާލައިފައެވެ.
ޕީއެންސީއަށް ވަގަށް މީހުން ވައްދާފައި ވަނީ މިނިސްޓަރަކަށް އެނގިގެން ވިޔަސް، ނޭނގި ވިޔަސް، އޭނާ މަގާމުން އިސްތިއުފާ ދެއްވަންޖެހޭ ކަމަށް ޑިމޮކްރެޓްސްއިން ވަނީ ބުނެފައެވެ.
"ދައުލަތުން މުސާރަ ލިބޭ ސިޔާސީ މުވައްޒަފުން، ސަރުކާރުގެ ރަސްމީ މަސައްކަތު ގަޑީގައި، ދާޚިލީ ވުޒާރާގެ ދަށުން ހިންގާ ޑީއެންއާރުގައި ހުރި އާންމު ރައްޔިތުންގެ ޒާތީ މައުލޫމާތު ވަގަށް ނަގައިގެން، އަމިއްލަ ޒާތީ ސިޔާސީ މަންފާއަށް ބޭނުން ކުރުމަކީ ފައިސާތަކެއް ވަގަށް ނެގުމަށްވުރެ، މި ޒަމާނަށް ބަލާއިރު ނުރައްކާތެރިކަން ބޮޑު ޚިޔާނާތެއް..." ޑިމޮކްރެޓްސްގެ ބަޔާނުގައިވެއެވެ.
އެ ޕާޓީން ބުނީ، ރައްޔިތުންގެ އެންމެ އަސާސީ ޒާތީ މައުލޫމާތު ބަލަހައްޓާ ފަރާތުގެ އަމާނާތްތެރިކަމާއި އިތުބާރު ގެއްލިގެން ދިއުމަކީ ނިޒާމު ފޫދިއުން ކަމަށެވެ. ޑިމޮކްރެޓުން ތުހުމަތުކުރާ ގޮތުގައި، ވަގު ފޯމު ފުރުމުގެ ކަންކަން ކުރިޔަށް ދިޔައީ އިހުސާނަށް އެނގިގެންކަން ދަނީ ހާމަވަމުންނެވެ.
އިދިކޮޅު އެމްޑީޕީން ވެސް ވަނީ މި މައްސަލައިގައި އިހުސާން މަގާމުން ދުރުކުރުމަށް ގޮވާލައިފައެވެ.
އައިޑެންޓިޓީ ފޯޖު ކުރުމާއި ސައްހަ ނޫން ލިޔެކިޔުން ދައުލަތުގެ އިދާރާއަކަށް ގަސްދުގައި އޮޅުވާލައިގެން ހުށަހެޅުމަކީ ޖިނާއީ ކުށެކެވެ. މި މައްސަލައިގައި ހޯމްލޭންޑް މިނިސްޓަރަށް ތުހުމަތު ކުރެވެނީ، ހޯމްލޭންޑް މިނިސްޓްރީއަކީ ޑީއެންއާރުގެ އިތުރުން، ކޮމިއުކޭޝަން އޮތޯރިޓީ އޮފް މޯލްޑިވްސް (ކޭމް)، ފުލުހުން އަދި މޯލްޑިވްސް ކަރެކްޝަނަލް ސާވިސް (އެމްސީއެސް)ގެ ބެލެނިވެރި ފަރާތް ކަމުގައިވާތީއެވެ.
މިކަމާ ގުޅިގެން މިނިސްޓަރު އިހުސާނު އިސްތިއުފާ ދިނުމަށް އެންމެ ބޮޑު އިދިކޮޅު ސިޔާސީ ޕާތި އެމްޑީޕީން ވެސް ވަނީ ގޮވައިލައިފައެވެ.