މި ސަރުކާރުގެ "ބޯހިޔާވަހިކަން އެންމެނަށް" ސްކީމްގެ ދަށުން، އަދިވެސް ކުރިއަށްދަނީ ގޯއްޗާއި ފުލެޓަށް އެދި ހުށަހަޅާފައިވާ ފޯމުތަކުގެ ސައްހަކަން ކަށަވަރުކުރުމަށް ކުރަންޖެހޭ 'ކްރޮސް ވެރިފިކޭޝަން'ގެ މަސައްކަތް ކަމަށާއި އެ މަސައްކަތް ނިމޭނެ ވަކި ތާރީޚެއް އަދި ނޭނގޭ ކަމަށް ހައުސިން މިނިސްޓްރީއިން މިއަދު ބުނެފިއެވެ.
"ބޯހިޔާވަހިކަން އެންމެނަށް" ސިޔާސަތުގެ ދަށުން މާލެ ސަރަހައްދުން ގޯއްޗާއި ފްލެޓަށް އެދި ހުށަހަޅަން ހުޅުވާލި މުއްދަތު ހަމަވިއިރު، ޖުމްލަ 58,505 ފޯމު ވަނީ ހުށަހަޅާފައެވެ. އެ ފޯމުތަކުގެ ސައްހަކަން ކަށަވަރުކުރުމަށް ކުރަންޖެހޭ 'ކްރޮސް ވެރިފިކޭޝަން'ގެ މަސައްކަތް ކުރަމުން އަންނަ ކަމަށް ހައުސިން މިނިސްޓްރީން ބުނީ ނިމުނު ޖޫން މަހުގެ މެދުތެރޭގައެވެ.
އެ މަސަައްކަތާ ގުޅޭ ގޮތުން 'ސަން' އިން މިއަދު ސުވާލުކުރުުމުން މިނިސްޓްރީން ބުނީ، އަދިވެސް ކުރިއަށްދަނީ ކްރޮސް ވެރިފިކޭޝަންގެ މަސައްކަތްތައް ކަަމަށެވެ. އަދި މިނިސްޓްރީގެ ކޯލް ސެންޓަރާއި ހެލްޕް ޑެސްކް މި ދުވަސްކޮޅު ވެސް ހުޅުވިފައި ހުންނާނެ ކަމަށް މިނިސްޓްރީން ވަނީ މައުލޫމާތު ދީފައެވެ.
އެޕްލިކޭޝަންތައް ވެރިފައިކުރުމުގެ މަރުހަލާގައި ފޮނުވާ ނޯޓިސްތަކަށް ޖަވާބުދާރީވާން ފުރަތަމަ މިނިސްޓްރީން ދިނީ ހަތް ދުވަހުގެ މުއްދަތެކެވެ. އެއަށްފަހު އެ މުއްދަތު 21 ދުވަހަށް އިތުރުކޮށްދީފައެވެ. ނަމަވެސް، އެކި ސަބަބުތަކާހުރެ ޖަވާބުދާރީ ނުވެވިފައިވާ މީހުންނަށް އިތުރު ފުރުސަތެއް ދިނުމާމެދު މިހާތަނަށް ގޮތެއް ނިންމާފައިނުވާ ކަމަށް އެ ހައުސިން މިނިސްޓްރީން ބުންޏެވެ.
"ނޯޓިސްގައިވާނެ 21 ދުވަހުގެ ތެރޭގައި ޖަވާބު ނުދީފިއްޔާ މިނިސްޓްރީން ގޮތެއް ނިންމާނޭ. ޖަވާބު ދޭން އަޅުގަނޑުމެން ފޮނުވަން އެސްއެމްއެސް، އީމެއިލް ވެސް." މިނިސްޓްރީން މައުލޫމާތު ދިނެވެ.
ހައުސިން މިނިސްޓްރީން ވަނީ 'ކްރޮސް ވެރިފިކޭޝަން'ގެ މަސައްކަތް ނިމޭނެ ވަކި ތާރީޚެއް ނޭނގޭ ކަމަށް ބުނެފައެވެ. އަދި މިހާތަނަށް ވެރިފައި ކޮށްފައިވަނީ ކިތައް ފޯމު ކަމެއް ވެސް ސީދާ ބުނަން ނޭނގޭ ކަމަށް މީޑިއާ އޮފިޝަލް ވަނީ ވިދާޅުވެފައެވެ.
މި ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުގެ ދަށުން 7,900 ފްލެޓާއި 15,000 ގޯތި ދޫކުރުމަށް ވަނީ ނިންމާފައެވެ. މީގެ ތެރޭގައި މާލޭގެ ރަށްވެހިންނަށް ޚާއްސަ 4,000 ފްލެޓާއި، މާލޭގައި ދިރިއުޅޭ ނަމަވެސް ރަށްވެހިވެފައި ނުވާ ފަރާތްތަކަށް 1,500 ފްލެޓާއި ޚާއްސަ ކެޓަގަރީތަކަށް 2,400 ފްލެޓް ހިމެނެއެވެ.
މީގެ އިތުރުން ރަސްމާލެއިން 25,000 ގޯތި ދޫކުރަން ނިންމާފައިވާއިރު، ފުރަތަމަ ބުރުގައި އެ ތަނުން 15,000 ގޯތި ދޫކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފައެވެ.
މިނިސްޓްރީން މީގެ ކުރިން ބުނެފައިވާ ގޮތުގައި، މިހާރު ފަށާފައިވާ ފްލެޓް މަޝްރޫއުތަކުގެ މަސައްކަތް މި ދައުރުގެ ބާކީ އޮތް ދެ އަހަރުގެ ތެރޭގައި އެއްކޮށް ނިންމައި ހަވާލުކުރެވޭނެއެވެ.
މި ދައުރުގެ ތެރޭގައި ބޯހިޔާވަހިކަން އެންމެނަށް ކަށަވަރުކުރުމަކީ ރައީސް މުއިއްޒުގެ މުހިންމު ވަޢުދުފުޅެކެވެ.