މިދިޔަ އަހަރު ސައުދީގެ ރައްޔިތުންގެ އިތުރުން 18.5 މިލިއަނަށްވުރެ ގިނަ މީހުން ހައްޖާއި އުމްރާގެ އަޅުކަން އަދާކުރި ކަމަށް ސައުދީ އަރަބިއްޔާގެ މިނިސްޓާ އޮފް ހައްޖު އެންޑް އުމްރާ, ތައުފީގު އަލް ރަބިއާ ވިދާޅުވެއްޖެއެވެ.
ޖިއްދާގައި ބޭއްވި ހައްޖާއި އުމްރާ ކޮންފަރެންސް އެންޑް އެގްޒިބިޝަންގެ ހަތަރުވަނަ އެޑިޝަންގައި ވާހަކަ ދައްކަވަމުން އަލް ރަބިޔާ ވަނީ މި ކާމިޔާބީއަކީ ސަލްމާން ރަސްގެފާނުގެ އިރުޝާދާއި ވަލީއަހުދު މުޙައްމަދު ބިން ސަލްމާންގެ މަސައްކަތްޕުޅުން ލިބުނު ކާމިޔާބީއެއް ކަމަށް ވިދާޅުވެފައެވެ.
އޭނާ ވަނީ ފަހުގެ ކުރިއެރުންތަކެއްގެ މައްޗަށް ވާހަކަދައްކަވައި، ޚާއްސަކޮށް ކީރިތި ރަސޫލާގެ މިސްކިތުގައި ހުންނަ އަލް ރައުދާލް ޝަރީފާއަށް ކުރާ ދަތުރުތައް އިތުރުކުރުމުގައި އަލިއަޅުވާލައްވާފައެވެ. އެގޮތުން، އޮންލައިން ބުކިން ޕްރޮސެސް ސްޓްރީމްލައިންކޮށް، ޕްރޮފެޝަނަލް ކްރައުޑް މެނޭޖްމަންޓް ސިސްޓަމެއް ގާއިމުކުރުމުގެ މަސައްކަތްކުރާނެކަމަށް ވެސް އަލް ރަބިޔާ ވިދާޅުވިއެވެ.
ދެހާސް ބާވީސްވަނަ އަހަރު ހަތަރު މިލިއަން މީހުން ހައްޖާއި އުމްރާގެ އަޅުކަން އަދާކޮށްފައިވާއިރު، އެ އަދަދު މިދިޔަ އަހަރު ވަނީ 13 މިލިއަނަށްވުރެ މައްޗަށް އަރާފައެވެ.
މީގެ އިތުރުން މިނިސްޓަރު ވަނީ ހައްޖުގެ އަޅުކަން ފުރިހަމައަށް އަދާކުރުމަށް ފޯރުކޮށްދޭ ޚިދުމަތްތަކަށް އެދޭ "ނުސޫކް" އެޕްގެ އާ ވާޝަނެއް ވެސް ދައްކާލާފައެވެ. އެ އެޕުން މިހާރު އިތުރު 100 ޚިދުމަތް ފޯރުކޮށްދެއެވެ.
"އެއް ޒަމާނެއްގައި ދަތިތަކާއި ވަރުބަލިކަމުން ފުރިފައިވާ ހައްޖު ދަތުރު މިހާރު ވަނީ ފަސޭހަކަމާއި ޔަގީންކަމުގެ ދަތުރަކަށް ބަދަލުވެ، ހުރިހާ ހައްޖުވެރިންނަށް ވެސް ފުރިހަމަ ޚިދުމަތްތަކެއް ލިބިގެންދާނެ،" އަލް ރާބިއާ ވިދާޅުވިއެވެ.