މިއުޒިކާ ގުޅޭ ވާހަކަތައް އެންމެ ގިނަ ދުވަސް ވަންދެއް ގެނެސްދިން އެއް ޕްލެޓްފޯމް ކަމަށްވާ "ރޯލިންސްޓޯން"އިން 21 ވަނަ ގަރުނުގެ އެންމެ މޮޅު އަލްބަމް ކަނޑައަޅައިފިއެވެ.
ރޯލިންސްޓޯންއިން 21 ވަނަ ގަރުނުގެ އެންމެ މޮޅު އަލްބަމް ކަމުގައި ކަނޑައަޅާފައިވަނީ ބިޔޯންސޭ 2016 ވަނަ އަހަރުގައި ނެރުނު އަލްބަމް "ލެމަނޭޑް"އެވެ. ވިޝުއަލް އަލްބަމެއްގެ ގޮތުގައި ނެރުނު ލެމަނޭޑްއިން ބިޔޯންސޭ މަންޒަރުތަކާ އެކު ގިނަ ވާހަކަތަކެއް ކިޔައިދިނެވެ.
އަލްބަމްގެ މަގުބޫލުކަން އަދި އަދަށް ދާންދެން ވެސް ފަނޑުވެފައި ނުވުމަކީ އަލްބަމްގެ ނުފޫޒު ގަދަކަން އެނގޭ އެއް ކަމެވެ. އަދި، އަލްބަމާ އެކު ހޮލީވުޑްގެ ޕޮޕް ކަލްޗާއަށް ބޮޑު ބަދަލެއް ގެނައިރު، މި އަލްބަމާ އެކު ވިޝުއަލް އަލްބަމްގެ މަގުބޫލުކަން ވެސް ވަރަށް ބޮޑަށް އިތުރުވިއެވެ.
ލެމަނޭޑަކީ ޗާޓުތަކުގައި ވެސް ބޮޑު މަގުބޫލުކަމެއް ހޯދާފައިވާ އަލްބަމެކެވެ. އެގޮތުން، ބިލްބޯޑުގެ ލިސްޓުތަކުގެ އެއްވަނައިގައި އެތައް މަހެއް ވަންދެއް މި އަލްބަމް އޮތެވެ.
ރޯލިންސްޓޯންގެ 21 ވަނަ ގަރުނުގެ އެންމެ މޮޅު އަލްބަމް ގޮތުގައި ލެމަނޭޑް ހޮވާފައިވާއިރު މި ލިސްޓުގައި ޖުމްލަ 500 އަލްބަމް ހިމަނާފައިވެއެވެ. އޭގެ ތެރޭގައި މިއުޒިކް އިންޑަސްޓްރީގެ ލެޖެންޑުންނާއި މިހާރުގެ އައިކޮންތަކުގެ އަލްބަމްތައް ހިމެނެއެވެ.
ލިސްޓުގެ ގަދަ ތިނެއްގައި އެޑެލްގެ "21" އާއި ކްރިސްޓީނާ އަގުއިލޭރާގެ "ސްޓްރިޕްޑް" ހިމެނެއެވެ. އޭގެ އިތުރުން، މަރާޔާ ކޭރީގެ "އިމެންސެޕޭޝަން އޮފް މީމީ" އަދި ބްރޭންޑީގެ "ފުލްމޫން"ގެ އިތުރުން އޭމީ ވައިންހައުސްގެ "ބެކް ޓު ބްލެކް" އަކީ އެންމެ ވަރުގަދަ އަލްބަމްތަކުގެ ތެރޭގައި ރޯލިންސްޓޯން ފާހަގަކޮށްފައިވާ އަލްބަމްތަކެވެ.