ނެޓްފްލިކްސްގެ އެންމެ ކާމިޔާބު ޝޯ "ސްކުއިޑް ގޭމް"ގެ ދެވަނަ ސީޒަން ބޮއިކޮޓު ކުރަން ގޮވާލައިފިއެވެ.
ދެކުނު ކޮރިއަން ޝޯ ސްކުއިޑް ގޭމްގެ ފުރަތަމަ ސީޒަނެއް 2021ވަނަ އަހަރު ނެރުމާ އެކު އެ ޝޯ ވެގެން ގޮސްފައިވަނީ މުޅި ސްޓްރީމިން ސާވިސްއިން އެޅުވި އެންމެ ކާމިޔާބު އެއް ޝޯއަށެވެ. އެންމެ ގިނަ ބަޔަކު ބެލި ޝޯތަކުގެ ކުރީގައި ވެސް މި ޝޯ ހިމެނެއެވެ.
ދިގު އިންތިޒާރަކަށް ފަހު ޝޯގެ ދެވަނަ ސީޒަން އެންމެ ފަހުން ޕްލެޓްފޯމަށް އައިސްފައި ވަނީ މިދިޔަ ޑިސެމްބަރު މަހުގެ ތެރޭގައެވެ. އެއާއެކު ޝޯ ވަނީ ދުނިޔޭގެ ހުރިހާ ޗާޓުތަކެއްގެ އެއްވަނައަށް އަރާފައެވެ.
ނަމަވެސް އާ ސީޒަނަށް ވަނީ ފާޑު ކިޔުންތަކެއް ވެސް ރައްދުވެފައެވެ. އެގޮތުން ވިއެޓްނާމްގައި އެތައް ބަޔަކު އަންނަނީ ޝޯ ބޮއިކޮޓު ކުރުމަށް ގޮވާލަމުންނެވެ. މި ޝޯގެ އާ ސީޒަންގައި ވިއެޓްނާމް ހަނގުރާމަ ސިފަކޮށްފައިވަނީ ތާރީހާ ގޯސްކޮށް ކަމަށާއި ކޮރިއާ ހަގީގަތާ ހިލާފަށް ސިފަކޮށްދީފައި ކަމަށް އެތައް ބަޔަކު އަންނަނީ ބުނަމުންނެވެ.
އެއާއެކު ވިއެޓްނާމްގައި ޝޯ ދެއްކުން މަނާ ކުރުމަށް ސަރުކާރަށް ހުށަހެޅުމަށް ވެސް އަންނަނީ މަސައްކަތް ކުރަމުންނެވެ.
ޖުމްލަ ހަތް އެޕިސޯޑް ހިމެނޭ އާ ސީޒަން ރިލީޒް ކުރުމާއެކު އެތައް ބަޔަކު ޝޯ އެއްކޮށް ބިންޖުކޮށް ނިންމާލައިފިއެވެ. ބޮޑު ސަސްޕެންސް ގަނޑަކާއެކު އާ ސީޒަން ނިމޭއިރު މިކަމާ އެތައް ފޭނުންނެއް ތިބީ ހިތްހަމަ ނުޖެހިފައެވެ. ނަމަވެސް މިއަހަރުގެ ތެރޭގައި ތިންވަނަ ސީޒަން އާންމުންނަށް ފެނިގެންދާނެއެވެ. ތިންވަނަ ސީޒަނަކީ ޝޯގެ ފަހު ސީޒަނެވެ.