ދަ ޑިމޮކްރެޓްސްގެ ރައީސްގެ މަގާމު ހުސްވުމާ ގުޅިގެން, އެ މަގާމު އެ ޕާޓީގެ ނައިބު ރައީސްގެ މަގާމުގައި ހުންނެވި ހުސައިން ފިރުޝާނާ މިރޭ ވަގުތީ ގޮތުން ހަވާލުކޮށްފިއެވެ.
ޑިމޮކްރެޓްސްގެ ރައީސްގެ މަގާމު ހުސްވީ، އެ މަގާމުގައި ހުންނެވި ހަސަން ލަތީފް އެ ޕާޓީ ދޫ ކުރައްވައި އެމްޑީޕީއާ ގުޅިވަޑައިގަތުމުންނެވެ. ޑިމޮކްރެޓްސް ދޫކުރައްވައި އެމްޑީޕީއަށް ވަޑައިގަތް ބޭފުޅުންގެ ތެރޭގައި އެ ޕާޓީގެ ކުރީގެ ނައިބު ރައީސް މުހައްމަދު ޝިފާޒު (ޝިއްޕެ)އާއި މެދުހެންވޭރު ދާއިރާގެ ކުރީގެ މެންބަރު އަލީ އާޒިމްގެ އިތުރުން، އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރު ހިމެނެއެވެ.
"ސަން"އަށް މައުލޫމާތު ދެއްވަމުން ޑިމޮކްރެޓްސްގެ ތަރުޖަމާން، އިމްތިޔާޒް ފަހުމީ (އިންތި) ވިދާޅުވީ، އެ ޕާޓީގެ ރައީސްގެ މަގާމު ހުސްވުމާ ގުޅިގެން، އެ މަގާމުގެ މަސްއޫލިއްޔަތު އަދާކުރާނެ ބޭފުޅެއް ކަނޑައެޅުމަށް ގައުމީ މަޖިލީހުން ވޯޓު ނެގީ، އެ ޕާޓީގެ ދެ ނައިބުން ކަމަށްވާ އާއިޝަތު އަލައިކާ އަދުނާނާއި ހުސައިން ފިރުޝާނާ ދެ ބޭފުޅުންގެ މެދުގައި ކަމަށެވެ.
ވަގުތީ ގޮތުން ޕާޓީގެ ރައީސްގެ މަސްއޫލިއްޔަތު އަދާކުރާނެ ބޭފުޅަކު ކަނޑައެޅުމަށް، ގައުމީ މަޖިލީހުން ނެގި ސިއްރު ވޯޓު ފިރުޝާން ކާމިޔާބު ކުރައްވާފައިވަނީ 29 ވޯޓުންނެވެ. އަލައިކާއަށް ލިބިފައިވަނީ 14 ވޯޓެވެ.
އިންތި ވިދާޅުވި ގޮތުގައި ޑިމޮކްރެޓްސްގެ ގައުމީ މަޖިލީހުން ވަނީ ކުރިޔަށް އޮތް 40 ދުވަހުގެ ތެރޭގައި އެ ޕާޓީއަށް ރައީސަކު އިންތިޚާބު ކުރުމަށް ނިންމައިފައެވެ. އަދި ކުރިޔަށް އޮތް 10 ދުވަހުގެ ތެރޭގައި އެ މަގާމަށް ޝައުގުވެރިވާ ޕާޓީގެ ބޭފުޅުންނަށް ނަން ހުށަހެޅުމުގެ ފުރުސަތު ވެސް ހުޅުވާލާފައިވާ ކަމަށް އިންތި ވިދާޅުވިއެވެ.
ޑިމޮކްރެޓްސްގެ އިސް ބޭފުޅުންތަކެއް އެ ޕާޓީން ވަކިވުމަކީ ދެރަ ކަމެއްކަން ފާހަގަކުރައްވައި އިިންތި މީގެ ކުރިން ވިދާޅުވީ އެއީ ޕާޓީ ކުރިއަށް ނުގޮސް ހުއްޓޭނެ ކަމެއް ނޫން ކަމަށެވެ. އަދި ކުރިއަށް އޮތް ތަނުގައި ވެސް ސިޔާސީ ލީޑަރުން އަދިވެސް އެ ޕާޓީއާ ގުޅިވަޑައިގަންނަވާނެ ކަމަށް އުންމީދުކުރައްވާ ކަމަށް އޭނާ ވިދާޅުވެފައިވެއެވެ.
ފާހަގަކޮށްލެވޭ ގޮތުގައި، އެމްޑީޕީ ޓިކެޓުގައި ވާދަކުރައްވައިގެން ފިރުޝާން 19 ވަނަ މަޖިލީހުގައި މަޑަވެލީ ދާއިރާގެ މެންބަރުކަން ކުރެއްވިއެވެ. އަދި ކުރީގެ ރައީސް މުޙައްމަދު ނަޝީދަށް ތާއިދުކުރައްވާ މެންބަރުންނާއެކު ޑިމޮކްރެޓްސްއާ ގުޅިވަޑައިގަތުމަށް ފަހު، އެ ޕާޓީގެ ޓިކެޓުގައި އޭނާ މިދިޔަ އަހަރުގެ މަޖިލިސް އިންތިޚާބުގައި ހުޅުމާލޭ ދެކުނު ދާއިރާއަށް ވާދަކުރެއްވިއެވެ. ނަމަވެސް އެ ގޮނޑި ކާމިޔާބުކުރެއްވީ އެމްޑީޕީގެ ކެންޑިޑޭޓް ޑރ. އަޙްމަދު ޝަމްހީދެވެ.