ރާއްޖެއާއި އަޒަރުބައިޖާނާ ދެމެދު އިންވެސްޓްމެންޓާއި ފަތުރުވެރިކަން އިތުރުކުރަން މަޝްވަރާކޮށްފިއެވެ.
ފޮރިން މިނިސްޓްރީން މިއަދުވަނީ، އެ މިނިސްޓްރީއާއި އަޒަރުބައިޖާންގެ ފޮރިން މިނިސްޓްރީއާ ދެމެދު ބައިލެޓަރަލް ކޮންސަލްޓޭޝަންސްގެ ފުރަތަމަ ބައްދަލުވުން މިއަދު ބާއްވައިފައިވާ ކަމަށް ބުނެފައެވެ.
އެ މިނިސްޓްރީން ބުނީ މިއަދު ބޭއްވި ބައްދަލުވުމުގައި ރާއްޖޭގެ ވަފުދުގައި އިސްކޮށް ހުންނެވީ ފޮރިން ސެކްރެޓަރީ ފާތިމަތު އިނާޔާ ކަމަށެވެ. އަދި އަޒަރުބައިޖާންގެ ވަފުދުގައި އިސްކޮށް ހުންނެވީ އަޒަރުބައިޖާންގެ މިނިސްޓާ އޮފް ފޮރިން އެފެއާޒްގެ ނައިބު އެލްނޫރު މަމަދޮވް ކަމަށް މިނިސްޓްރީން ވަނީ ބުނެފައެވެ.
މިނިސްޓްރީން ބުނީ އިނާޔާ އާއި މަމަދޯވް ރާއްޖެއާއި އަޒަރުބައިޖާންގެ ގުޅުމުގެ ތެރެއިން ކުރިއަށްދާ ހުރިހާ ޕްރޮގްރާމްތަކާއި ވެފައިވާ މުހިންމު އެއްބަސްވުންތަކުގެ މަސައްކަތް ކުރިއަށްދާ ގޮތް ބައްލަވާފައި ވާކަމަށެވެ.
މީގެ އިތުރުން އިންވެސްޓްމަންޓް ކުރިއެރުވުމާއި، ތަޢުލީމާއި، ސަގާފަތާއި، ފަތުރުވެރިކަމާއި، ކަނެކްޓިވިޓީގެ ދާއިރާއިން ގުޅުން ބަދަހިކުރުމަށް މަޝްވަރާ ކުރި ކަމަށް މިނިސްޓްރީން ބުންޏެވެ. އަދި ރައްޔިތުންގެ މެދުގައި ގުޅުން ބަދަހިކުރުމާއި، މަލްޓިލޭޓަރަލް ކޯޕަރޭޝަންގެ އިތުރުން، ދެ ގައުމުގެ މަސްލަހަތު ހިމެނޭ މުހިންމު ކަންކަމާ ގުޅޭގޮތުން މަޝްވަރާ ކުރެއްވި ކަމަށް މިނިސްޓްރީން ވަނީ ބުނެފައެވެ.
މި ބައްދަލުވުމުގައި އިނާޔާ އާއި މަމަދޯވް ވަނީ ދެ ގައުމުގެ މަސްލަހަތު ހިމެނޭ ކަންކަމުގައި އެއްބާރުލުން ދިނުމަށާއި ދެ ގައުމުގެ ދެމެދުގައި އޮތް ގާތް ރަހުމަތްތެރިކަމުގެ ގުޅުން އިތުރަށް ބަދަހިކުރައްވާނެ ކަމުގެ ޔަގީންކަން ދެއްވާފައެވެ.
މަމަދޯވް އިސްކޮށް ހުންނަވައިގެން ރާއްޖެއަށް ކުރައްވާ ރަސްމީ ދަތުރުފުޅުގައި، އަޒަރުބައިޖާން ސަރުކާރުގެ ކަމާބެހޭ ވުޒާރާތަކުގެ އިސް ބޭފުޅުންނާއި، އަޒަރުބައިޖާންގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޯމޯ)ގެ އިސްވެރިންނާއި ޕްރައިވެޓް ސެކްޓާގެ މަންދޫބުން ހިމެނެއެވެ.
މި ވަފުދުގެ ދަތުރުފުޅުގައި ދިވެހި ސަރުކާރުގެ ކަމާބެހޭ ވުޒާރާތަކާ މަޝްވަރާކޮށް، ރާއްޖޭގައި ހުރި އިންވެސްޓްމަންޓްގެ ފުރުސަތުތައް ދެނެގަތުމަށްވެސް ވަނީ ހަމަޖެހިފައެވެ.