ވިއްސާރާގައި ލިބޭ ގެއްލުންތައް ކުޑަކުރަން އިދާރާތައް ގުޅިގެން މުޅި ރާއްޖޭގައި މިއަދު އޮޕަރޭޝަނެއް ފަށައިފިއެވެ.
އެ އޮޕަރޭޝަނާ ގުޅުވައި މިއަދު ބޭއްވި ނޫސްވެރިންގެ ބައްދަލުވުމުގައި ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވީ، ކުރިއަށް އޮތް ފަސް ދުވަހު އެކި ހިސާބުތަކަށް ވިއްސާރަ ކުރާނެ ކަމަށް ލަފާކޮށްފައިވާތީ ލިބިދާނެ ގެއްލުންތަކުން ރައްކާތެރިވާން ރައީސް ޑރ. މުޙައްމަދު މުއިއްޒު ޓާސްކްފޯހެއް އެކުލަވާލާފައިވާ ކަމަށެވެ.
މިގޮތުން، ރައްޔިތުންނަށް އެހީތެރިކަން ފޯރުކޮށްދިނުމުގައި އިސް ދައުރެއް އަދާކުރާނީ ނެޝަނަލް ޑިޒާސްޓާ މެނޭޖްމަންޓް އޮތޯރިޓީއާއި ފުލުހުންނާއި މޯލްޑިވްސް ޑިފެންސް ފޯސް ގުޅިގެން ކަމަށް ހިލްމީ ވިދާޅުވިއެވެ.
އެކަމަށް ޚާއްސަކޮށް، ސިފައިންގެ މައި މަރުކަޒު ބަންޑާރަކޮށީގައި ޖޮއިންޓް އޮޕަރޭޝަން ސެންޓަރެއް ގާއިމުކޮށްފައިވާކަން ހިލްމީ ފާހަގަކުރެއްވިއެވެ.
ޕޮލިސް ކޮމިޝަނަރު އަލީ ޝުޖާއު: އިދާރާތައް ގުޅިގެން މުޅި ރާއްޖޭގައި އޮޕަރޭޝަނެއް ފަށާފައި -- ފޮޓޯ/ ފުލުހުން
ހަތަރު ސަރަހައްދެއް ސިފައިން ގާއިމުވެ ތިބެގެން، މުޅި ރާއްޖެއަށް އެހީތެރިކަން ފޯރުކޮށްދިނުމަށް ކަންކަން ތަރުތީބު ކުރެވިފައިވާކަން ފާހަގަކުރައްވައި ހިލްމީ ވިދާޅުވީ، މިހާރު ވެސް މާލޭގެ ތިން ދިމާލެއްގައި ވެލި ބަސްތާ ލިބޭނެ އިންތިޒާމު ހަމަޖައްސާދެވިފައިވާ ކަމަށެވެ.
މި އޮޕަރޭޝަން ވަރަށް ގާތުން ރައީސުލްޖުމްހޫރިއްޔާ ގެންދަވަނީ ބައްލަވަމުން. އަދި ރައްޔިތުންނަށް އެހީތެރިކަން ފޯރުކޮށްދިނުމަށް ޓަކައި ކަމާ ގުޅުން ހުރި ހުރިހާ އިދާރާތަކަށް ރައީސުލްޖުމްހޫރިއްޔާ ވަނީ އިރުޝާދު ދެއްވާފައިޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ
މީގެއިތުރުން، ރައީސް މުއިއްޒުގެ އިރުޝާދު ފުޅާ އެއްގޮތަށް 24 ގަޑިއިރު ސިފައިން ރައްޔިތުންގެ ޚިދުމަތުގައި ތިބޭނެކަން ހިލްމީ ވަނީ ފާހަގަކުރައްވާފައެވެ،
މި ބައްދަލުވުމުގައި ޕޮލިސް ކޮމިޝަނަރު (ސީޕީ) އަލީ ޝުޖާއު ވިދާޅުވީ، ވިއްސާރަވެގެން ދިމާވެދާނެ ގެއްލުން ކުޑަކުރުމަށް ރައްޔިތުންނަށް ކޮށްދޭން ޖެހޭ ހުރިހާ ކަމަކަށް ފުލުހުން ތައްޔާރުވެފައިވާ ކަމަށެވެ.
މާލޭ އަމީނީ މަގުގައި ފެންބޮޑުވެފައި: އިދާރާތައް ގުޅިގެން މުޅި ރާއްޖޭގައި އޮޕަރޭޝަނެއް ފަށާފައި -- ފޮޓޯ: ސަން/ މުޙައްމަދު ނާއިލް ޙަފީޒް
ފުލުހުންގެ ޚިދުމަތް ނުދޭ ރަށްރަށަށް ވެސް ދިމާވެދާނެ ގެއްލުންތައް ކުޑަކުރުމަށް އެކި ޕްލޭންތައް ހަދައި، ކައުންސިލްތަކާ އެއްކޮށް މަސައްކަތް ކުރުމަށް އިރުޝާދުދީގެން އެ މަސައްކަތް މިހާރު ފެށިފައިވާ ކަމަށް ސީޕީ ވަނީ ވިދާޅުވެފައެވެ.
އޭގެއިތުރުން، ސީޕީވަނީ މި ކާރިސާގައި އިދާރާތަކުން ދޭ އިރުޝާދުތަކަށް ބޯލެނބުމަށް ރައްޔިތުންނަށް ގޮވައިލައްވާފައެވެ.
ޝުޖާއު ވިދާޅުވީ، މާލޭގައި ފެންބޮޑުވާ ސަރަހައްދުތަކުގައި އުޅޭ މީހުންނަށް އެހީތެރިކަން ފޯރުކޮށްދީ، ގެއްލުން ލިބޭ ގެތަކުން މީހުންނާ އެއްކޮށް 24 ގަޑިއިރު ފުލުހުން ހަރަކާތްތެރިވުމަށް އިންތިޒާމުތައް ހަމަޖެހިފައިވާ ކަމަށެވެ.
މޫސުން ގޯސްވެ، އާންމުކޮށް ފެންބޮޑުވާ 72 ރަށަކަށް ފެން ހިންދުމަށް ބޭނުންކުރާނެ ޕަންޕާއި އެއާ ގުޅޭ ވަސީލަތްތައް ފޯރުކޮށްދީފައިވާ ކަމަށް, ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން މިއަދު ވަނީ ބުނެފައެވެ.
ފާހަގަކޮށްލެވޭ ގޮތުގައި، މާލޭ ސިޓީ ކައުންސިލުން ވަނީ ރެއިން ފެށިގެން މި ވިއްސާރައަށް ތައްޔާރުވާން ފަށާފައެވެ. އެގޮތުން، ޚާއްސަ ކާރިސާ ކޮމިޓީއެއް އުފައްދައި، މިހާތަނަށް މާލޭގެ އެކި ސަރަހައްދުތަކުގައި ވަނީ 800 އަށް ވުރެ ގިނަ ވެލި ބަސްތާ ޖަހާފައެވެ.