ފަހި ދިރިއުޅުން ކޯޕަރޭޝަން (އެފްޑީސީ)ގެ ތެރޭގައި ޚިޔާނާތުގެ އެއްވެސް ކަމެއް ނުހިނގާނެ ކަމަށާއި އެ ކުންފުނީގެ އެތެރޭގެ ކަންކަން ރާވާފައި ހުންނާނީ ދެފުށްފެންނަ ގޮތަށް ކަމަށް އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވެއްޖެއެވެ.
ސަން އޮންލައިންގެ 'އެޑިޓަރުގެ ސުވާލު' ޕްރޮގްރާމްގައި ވާހަކަދައްކަވަމުން ހަމްދާން ވިދާޅުވީ، ކޮރަޕްޝަނަކީ މި ޒަމާނުގައި ފޮރުވައިގެން ކުރެވޭނެކަމެއް ނޫން ކަމަށާއި ރައްޔިތުން މިހާރު މާ ބޮޑަށް ހޭލުންތެރިވެފައިވާ ކަމަށެވެ.
އަދި ކޮރަޕްޝަންގެ އަމަލުތަކުގައި މަތި އަޅައި ފޮރުވައިގެން އުޅެވޭނެ ޒަމާން ނިމިފައި ވާކަމަށް އޭނާ ވިދާޅުވިއެވެ.
އެހެންކަމުން އެފްޑީސީގެ ތެރޭގައި ކަމެއް ހިނގަންޏާ އެފަދަ އަޑުތައް އިވޭނެ ކަމަށާއި މިހާތަނަށް އެއްވެސް މައްސަލައެއް ފެންމަތިވެފައި ނުވާކަމަށް އޭނާ ވިދާޅުވިއެވެ.
ހަމްދާން ވަނީ އެޗްޑީސީގެ ދަށަށް އެފްޑީސީ ބަދަލުކުރުމުގެ މަސައްކަތް ދާގޮތާ ގުޅިގެން ވެސް ވާހަކަ ދައްކަވާދައެވެ.
"އެޗްޑީސީން އެފްޑީސީއަށް ބަދަލުކުރުމަކީ ވަރަށް ބޮޑު މަސައްކަތެއް. ގާނޫނީ ވަރަށް ބޮޑު މަސައްކަތެއް. ކަންކަން ހަގީގަތުގައި މިދަނީ އެންމެ ސްމޫތްކޮށް މައްސަލައެއް ނުޖެހި އެންމެ ފަސޭހައިން ކުރިޔަށް ދެވޭނެގޮތަށް މަސައްކަތްކުރަމުން" ހަމްދާން ވިދާޅުވިއެވެ.
މި މަސައްކަތް ނިމޭނެ ވަކި ތާރީޚެއް އޭނާ ފާހަގަކުރައްވާފައެއް ނުވެއެވެ.
"އަޅުގަނޑު ދަންނަވާލާނަން އަޅުގަނޑު އެޗްޑީސީއާއެކީ ބައްދަލު ކުރުމަށްފަހު މި ވަނީ ވޯކިން ސެޝަންތަކެއް ހިންގަން ނިންމާފަ. ދެކުންފުނި ދެމެދު ކިހިނެއްތޯ ކުރިޔަށް ދާންވީ ދާނެ އެންމެ ރަނގަޅު މަގަކީ ކޮބާކަން ހޯދުމުގެ މަސައްކަތް މިދަނީކުރަމުން." ހަމްދާން ޝަކީލް ވިދާޅުވިއެވެ.
އެޗްޑީސީގެ ދަށަށް އެފްޑީސީ ބަދަލުކުރުމުގެ މަސައްކަތް ކުރާއިރު، މިދިޔަ ސަރުކާރުން ހިންގި ބިންވެރިޔާ ސްކީމުގެ ދަށުން ނުހައްގުން ގޯތި ދިން މައްސަލައެއް ވަނީ ފެންމަތިވެފައެވެ. މި މައްސަލައިގައި އެންމެ ބޮޑު ތުހުމަތެއް ކުރަނީ އެޗްޑީސީގެ މެނޭޖިން ޑިރެކްޓަރަކަށް ކުރިން ހުންނެވި ފަޒުލް ރަޝީދަށެވެ.
ނުގަވައިދުން ގޯތި ލިބުނު މީހުންގެ ތެރޭގައި އޭނާގެ ބޭބެ، އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރަކަށް އޭރު ހުންނެވި މުޙައްމަދު ފަޒީލް ރަޝީދުގެ ނަން އޮތެވެ.
މި މައްސަލަ ފުލުހުން މިހާރު ގެންދަނީ ތަހުގީގު ކުރަމުންނެވެ.
ސަރުކާރުގެ ގިނަ ކުންފުނިތަކެއް އެއްކޮށްލަން ވަޒީރުންގެ މަޖިލީހުގައި މަޝްވަރާކުރައްވާނެ ކަމަށް ރައީސް ޑރ. މުޙައްމަދު މުއިއްޒު މިީގެ ކުރިން ވަނީ ވިދާޅުވެފައެވެ.
މިއީ ސަރުކާރުގެ ޚަރަދު ކުދަކުރުމަށް އަޅާ ފިޔަވަޅެކެވެ.