އަހަރުދުވަހުގެ ތެރޭގައި، ރާއްޖޭގައި ގާއިމްކޮށްފައިވާ އިޔާދަކުރަނިވި ހަކަތައަށް 17 މެގަވޮޓް އިތުރު ކުރެވިފައިވާ ކަމަށް އެންވަޔަރަމެންޓް މިނިސްޓަރު އިބްރާހީމް ތޯރިގު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، މިހާރު ކުރިއަށްދާ އިންޓަނޭޝަނަލް ރިނިއުވަބަލް އެނާޖީ އޭޖެންސީ (އައިރީނާ) އެސެމްބްލީގެ 15 ވަނަ ޖަލްސާގައި ދެއްވި ދެއްވި ބަޔާނެއްގައެވެ.
މިނިސްޓަރުގެ ބަޔާނުގައިވަނީ، އެންމެ އަހަރެއްހާ ދުވަހުގެ ތެރޭގައި ރާއްޖޭގައި ގާއިމްކުރެވިފައިވާ އިއާދަކުރަނިވި ހަކަތައިގެ މިންވަރު، 53 މެގަވޮޓުން 70 މެގަވޮޓަށް އިތުރުވެފައިވާކަން ހާމަ ކުރައްވައިފައެވެ.
އައިރީނާ އެސެމްބްލީގައި އެންވަޔަމެންޓް މިނިސްޓަރު ތޯރިގު އިބްރާހީމް -- ފޮޓޯ/ އެންވަޔަމެންޓް މިނިސްޓްރީ
މިދިޔަ 2023ވަނަ އަހަރުގެ ޑިސެންބަރުގައި ޔުނައިޓެޑް އަރަބް އެމިރޭޓްސް (ޔޫއޭއީ)ގެ ދުބާއީގައި ބޭއްވި ކޮޕް 28ގައި، ރައީސް ޑރ. މުޙައްމަދު މުއިއްޒުވަނީ، 2028 ވަނަ އަހަރާ ހަމައަށް ކަރަންޓުގެ 33 ޕަސަންޓު އިޔާދަކުރަނިވި ހަކަތައިން އުފެއްދުމުގެ އަމާޒު ހާމަ ކުރައްވައިފައެވެ. މިކަން ފާހަގަ ކުރައްވައި މިނިސްޓަރު ވިދާޅުވީ، އެ އަމާޒަށް ވާސިލްވުމަށް މިހާރު ދިވެހިރާއްޖެ ވަނީ އިތުރު 170 މެގަވޮޓުގެ އިއާދަކުރަނިވި ހަކަތަ ތަންފީޒުކުރުމުގެ އެކި މަރުޙަލާތަކުގައި ކަމަށެވެ.
މޫސުމަށް އަންނަ ބަދަލުތަކަކީ ދިވެހިރާއްޖެ ފަދަ ކުދި ޖަޒީރާ ގައުމުތަކަށް ދިމާވެފައިވާ އެންމެ ނުރައްކާތެރި މައްސަލަތަކުގެ ތެރެއިން އެއް މައްސަލަ ކަމުގައި މިނިސްޓަރު ފާހަގަ ކުރެއްވިއެވެ.
މިނިސްޓަރު ގޮވާލެއްވީ އެއްބަސްވެފައިވާ 1.5 ޑިގްރީގެ ލަނޑުދަނޑިއަށް ވާސިލުވުމަށް ވަގުތުން ހަރުދަނާ ފިޔަވަޅުތަކެއް އެޅުމަށެވެ.
"ބައިނަލްއަގުވާމީ މުޖުތަމަޢުން މިހާރުން މިހާރަށް ޢަމަލުކުރަން ޖެހޭ، އަދި ރައްޔިތުންނާއި މި ދުނިޔޭގެ މުސްތަގުބަލު ރައްކާތެރިކުރަން ޖެހޭ،" ތޯރިގު ވިދާޅުވިއެވެ.
އެމިރޭޓްސްގައި ބޭއްވޭ އައިރީނާ އެސެމްބްލީގައި މިނިސްޓަރު ތޯރިގާއެކު ބައިވެރިވެވަޑައިގަންނަވަނީ އެމިރޭޓްސްގައި ހުންނަވާ ދިވެހިރާއްޖޭގެ ސަފީރު މުހައްމަދު ހުސައިން ޝަރީފް (މުންދު)އާއި އެންވަޔަރަމެންޓް މިނިސްޓްރީގެ ޑިރެކްޓަރު ޖެނެރަލް އަހްމަދު އަލީއެވެ.