ހުޅުމާލޭ ދެވަނަ ފިޔަވަހީގައި ހުރި ހިޔާ ފުލެޓުތަކުގެ ތެރެއިން ފުލެޓަކުން މިއަދު މީހަކު ވެއްޓިއްޖެއެވެ.
ފުލުހުން ބުނީ، މީހަކު ވެއްޓުވީ ހިޔާ ޓަވަރު ތިނެއްގެ ދެވަނަ ފަންގިފިލާއިން ކަމަށެވެ.
ވެއްޓުނު މީހާއަށް އަނިޔާވެގެން، ހުޅުމާލޭ ހޮސްޕިޓަލުގައި ފަރުވާދެމުން އަންނަ ކަމަށް ފުލުހުން ބުންޏެވެ. އެކަމަކު، ލިބުނު އަނިޔާތަކާ ގުޅޭ އެއްވެސް ތަފުސީލެއް ވެސް އަދި، ހާދިސާ ހިނގަން މެދުވެރިވި ގޮތުގެ ތަފުސީލެއް ވެސް ދީފައެއް ނުވެއެވެ.
ފުލުހުން އަންނަނީ މި މައްސަލަ ތަހުގީގުކުރަމުންނެވެ.
ފާހަގަކޮށްލެވޭ ގޮތުގައި، ހިޔާ ފުލެޓުތަކަކީ ރާއްޖޭގައި މީހުން ދިރިއުޅެން މިހާތަނަށް އިމާރާތްކުރި އެންމެ އުސް އިމާރާތްތަކެވެ. އެ 16 ޓަވަރަކީ 25 ބުރިއަށް އިމާރާތްކޮށްފައިވާ ތަނެކެވެ. އެ ތަނުގައި އެތައް ހާސް ރައްޔިތުންނެއް އުޅެއެވެ.
މީގެ ކުރިން ވެސް ހިޔާ ފުލެޓުތަކުން މީހުން ވެއްޓި ހިތާމަވެރި ހާދިސާތައް ހިނގާފައި އެބަހުއްޓެވެ. ބައެއް ހާދިސާތަކުގައި މީހުންގެ ފުރާނަ ވެސް ގެއްލިފައި އެބަހުއްޓެވެ.