ހުޅުމާލޭ ދެވަނަ ފިޔަވަހީގެ ހިޔާ ފްލެޓްތަކުގެ ބައެއް ޓަވަރުތަކަށް ފެނުގެ ޚިދުމަތް ކެނޑިއްޖެއެވެ.
"ސަން"އަށް މައުލޫމާތު ދެމުން ހިޔާގައި ދިރިއުޅޭ ބައެއް ފަރާތްތަކުން ބުނީ ހިޔާގެ ބައެއް ޓަވަރުތަކުން ފެނުގެ ޚިދުމަތް ކެނޑިފައި ހުންނަތާ މިހާރު ގަޑިއިރެއް ވެފައި ވާކަމަށެވެ.
އެމްޑަބްލިއުއެސްސީއިން ވަނީ މި މައްސަލަ މިހާރު ބަލަމުން ދާކަމަށް ބުނެފައެވެ.
ހިޔާ ޓަވަރުތަކުގައި ދިރިއުޅޭ ފަރާތްތަކަށް މިރޭ އެޗްޑީސީން ފޮނުވާފައިވާ މެސެޖެއްގައި ވަނީ ހިޔާ ޓަވަރުތަކައް ފެން ދޫކުރުމަށް ބަހައްޓާފައިވާ ބޫސްޓާ ޕަމްޕަށް ދިމާވި ޓެކްނިކަލް މައްސަލައަކާ ގުޅިގެން ހިޔާ ޓަވަރު ތަކުން ފެނުގެ ހިދުމަތް މެދުކެނޑިފައި ވާކަމަށެވެ.
އަދި މިމައްސަލަ ހައްލު ކުރުމުގެ މަސައްކަތް ސްތެލްކޯއާއި އެމްޑަބްލިއުއެސްސީ ގުޅިގެން ކުރަމުން ދާކަމަށާއި މައްސަލަ ހައްލު ކުރެވުނު އެންމެ އަވަހަށް ފެން ދޫކުރެވޭނެ ވަނީ ބުނެފައެވެ
އެހެންކަމުން ފުލެޓުގައި ދިރިއުޅެމުންދާ އަދި ފުލެޓުގައި މަސައްކަތް ކުރައްވާ ފަރާތްތަކަށް ދިމާވެދާނެ ދަތިތަކަށް އެ ކުންފުނިން ވަނީ މާފަށް އެދިފައެވެ.
ހުޅުމާލޭގެ ފުރަތަމަ ފިޔަވަހިން މިރޭ ވަނީ ކަރަންޓު ވެސް ކެނޑިފައެވެ.
ކަރަންޓު ކެނޑެން ދިމާވި ސީދާ މައްސަލަ ހިއްސާ ނުކުރި ނަމަވެސް ސްޓެލްކޯއިން ވަނީ މިހާރު އެ މައްސަލަ ހައްލުކޮށްފައި ވާކަމަށް ބުނެފައެވެ.
ހުޅުމާލޭ ދެވަނަ ފިޔަވަހީގެ ފެން ހޮޅިއެއް ފަޅައިގެން ގޮސް، އިއްޔެ ވެސް ވަނީ ހިޔާ ޓަވަރުތަކަށް ފެން ލިބުން މެދުކެނޑިފައެވެ.