އެސްއެސް މީޑިއާއިން އުފައްދާފައިވާ ފުރަތަމަ ޑުރާމާ ސިލްސިލާ، "ރައިހާ" މިޑް ސީޒަން ބްރޭކަކަށް ގޮސްފިއެވެ.
ސްޓްރީމިން ސާވިސް ބައިސްކޯފުން މިދިޔަ ނޮވެމްބަރު މަހު ފަހުކޮޅު ދައްކަން ފަށާފައިވާ ރައިހާ މިހާރު ވަނީ މިޑް ސީޒަން ބްރޭކަކަށް ގޮސްފައެވެ. އެއާއެކު ޝޯގެ ފުރަތަމަ ހަ އެޕިސޯޑު މިހާރު އެކީ ބިންޖުކޮށްލެވޭނެއެވެ.
ރައިހާއަކީ ޖުމްލަ 12 އެޕިސޯޑްގެ ޑްރާމާ ޝޯއެކެވެ. މި ޝޯ ދެން އެނބުރި އަންނާނީ މި މަހުގެ 15 ވަނަ ދުވަހުގެ ރެއެވެ. އެއަށް ފަހު ބާކީ ހަ އެޕިސޯޑު ކޮންމެ ހަފުތާއެއްގައި ރިލީޒްކުރާނެއެވެ.
ރައިހާ ޑުރާމާ ސިލްސިލާގެ އިސް ރޯލުތައް އަދާކުރާ އެކްޓަރުންގެ ތެރޭގައި އަލީ އާޒިމް (ދޮން އައްޔަ)އާއި އާމިނަތު ނޫރާ ހިމެނެއެވެ. ޝޯގެ ސަޕޯޓިން ރޯލުތަކުން އަލީ އުސާމް (ދޮނާ)އާއި ލައިޝާ ލަތީފު ފެނެއެވެ.
މި ސިލްސިލާ ޑައިރެކްޓްކޮށް ޕޯސްޓް ޕްރޮޑަކްޝަންގެ މަސައްކަތްކުރީ ރާއްޖޭގައި މަޝްހޫރު އެތައް ފިލްމަކާއި ޑުރާމާ ސިލްސިލާތަކާއި ވީޑިއޯ ލަވަތައް އުފައްދާފައިވާ އަލީ ރަޝީދު (ގޮޅާ އައްޔަ)އެވެ.
ލޯބީގެ ތަފާތު އިހުސާސްތައް ދައްކުވައިދޭ މި ސިލްސިލާގެ ސިނަމެޓޯގްރަޕީ މަސައްކަތްކުރީ އެސްއެސްޓީވީގެ ސީނިއާ ކެމެރާމަން، މުހައްމަދު ޝާނެވެ. މީގެ ސްކްރީންޕްލޭ ތައްޔާރުކޮށްފައިވަނީ އާމިނަތު ރިނާޒާ (ރިނާ)އެވެ.
މި ޑުރާމާ ޝޫޓުކޮށްފައިވަނީ މ. މުލަކުގައެވެ. އަދި މި ޝޯގެ އިތުރު ރޯލުތަކުން ފެންނަ ކާސްޓުންގެ އެކްޓަރުންނަކީ މުލަކު ރައްޔިތުންނެވެ. މި ޝޯ އުފެއްދުމުގެ މަސައްކަތުގައި މުލަކުން ވަރަށް ބޮޑު އެހީތެރިކަމެއް ލިބިފައިވެއެވެ.