ބޮޑު މަގުބޫލުކަމެއް ލިބުނު ކަންނާޑާ ފިލްމު "ކޭޖީއެފް" ސީރީސްގެ އެކްޓަރު ޔަޝްގެ އާ ފިލްމު "ޓޮކްސިކް"ގެ ފުރަތަމަ ޓީޒާ ދައްކާލައިފިއެވެ.
މިއީ މި ފިލްމު އިއުލާނު ކުރުމަށް ފަހު ފިލްމަށް އިންތިޒާރު ކުރަމުން އަންނަ ވަރަށް ގިނަ ބަޔަކަށް ލިބުނު ބޮޑު ހިތްހަމަޖެހުމެކެވެ. ފިލްމު "ޓޮކްސިކް"ގެ ވާހަކަ ދޭތެރެ ދޭތެރެއިން ޚަބަރުތަކުން ފެނުނު ނަމަވެސް ފިލްމުގައި ޔަޝް ފެންނާނެ ކޮންކަހަލަ ރޯލަކުންތޯ ބަލަން ސަޕޯޓަރުން ތިބީ ކެތްމަދުވެފައެވެ.
ފިލްމު "ޓޮކްސިކް"ގެ ފުރަތަމަ ޓީޒާ އާއްމުންނަށް ދައްކާލާފައި މިވަނީ ކަންނާޑާ އެކްޓަރު ޔަޝްގެ 39ވަނަ އުފަންދުވަހާ ގުޅުވައިގެންނެވެ. ފިލްމުގެ ޓީޒާ ދައްކާލިއިރު އެއް މިނެޓުގެ އެ ޓީޒާއިން ފެންނަނީ ހަމައެކަނި ޔަޝްއެވެ. މި ޓީޒާއިން ޔަޝް ފެންނަނީ ފިލްމު "ކޭޖީއެފް"ގައި އެކްޓަރު ފެންނަ ކަހަލަ ކެރެކްޓާ އަކާ ދާދި އެއްކަހަލަ ގޮތަކަށެވެ.
ފިލްމު "ޓޮކްސިކް"ގެ ޓީޒާ މަންޒަރެއްގައި ޔަޝް--ފޮޓޯ/ފިލްމުފެއަ
ފިލްމުން ދެން ފެންނަ އިތުރު އެހެން އެއްވެސް ތަރިއެއް ޓީޒާއިން ނުފެންނާތީ ފިލްމުގެ ކާސްޓުންގެ ގޮތުގައި ފެންނާނެ ތަރިންގެ މައުލޫމާތު ވަނީ ސާފުނުވެފައެވެ.
ފިލްމީ ޚަބަރުތައް ބުނާގޮތުން ޔަޝްއާ އެކު ފިލްމުގެ ކާސްޓުގައި ހިމެނޭ ބައެއް ތަރިންގެތެރޭ ބޮލީވުޑްގެ ބަތަލާއިން ކަމަށްވާ ހުމާ ގުރޭޝީ، ތާރާ ސުތާރިއާ އަދި ކިއާރާ އަދުވާނީ ހިމެނެއެވެ. މީގެއިތުރުން ސައުތު ބަތަލާ ނަޔަންތާރާ އަދި ޒުވާން އެކްޓަރު އަކްޝޭ އޮބޮރޯއި ފިލްމުގެ މުހިއްމު ރޯލް ކުޅެން ހަމަޖެހިފައިވާ ކަމަށް ރިޕޯޓުތައް ބުނެއެވެ.
މި ފިލްމު މި އަހަރުގެ އޭޕްރިލް މަހުގެ 10 ގައި ސިނަމާތަކަށް ގެންނަން ތާވަލު ކުރެވިފައިވީ ނަމަވެސް އެކި ސަބަބުތަކާ ހެދި ފިލްމު ރިލީޒްކުރުން މި އަހަރުގެ ޑިސެމްބަރު މަހަށް ވަނީ ލަސްކުރެވިފައެވެ.