މިދިޔަ ސަރުކާރުން ކުރިއަށް ގެންދިޔަ ބިންވެރިޔާ ސްކީމުގެ ދަށުން ސައްހަ ނޫން ލިޔެކިޔުންތަކެއް ހުށަހަޅައިގެން ގޯތި ދިން މައްސަލައިގެ ތަހުގީގުގައި ފުލުހުން އަމަލުކުރި ގޮތުގެ މައްސަލަ ބަލައިދިނުމަށް އެދި، ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން، ނޭޝަނަލް އިންޓެގްރިޓީ ކޮމިޝަން (އެންއައިސީ)އަށް މައްސަލަ ހުށަހަޅުއްވައިފިއެވެ.
ލިސްޓުގައި ނެތް ބަޔަކަށް ގޯތި ދިން މައްސަލަ ފެންމަތިވީ މިދިޔަ ޑިސެމްބަރު މަހުގެ 18ވަނަ ދުވަހުއެވެ. މި މައްސަލައިގައި އެންމެ ބޮޑު ތުހުމަތެއް އިދިކޮޅުން ކުރީ އޭރުގެ އެޗްޑީސީގެ މެނޭޖިން ޑިރެކްޓަރަކަށް ހުންނެވި ފަޒުލް ރަޝީދުގެ މައްޗަށެވެ.
ނުގަވައިދުން ގޯތި ލިބުނު މީހުންގެ ތެރޭގައި އޭނާގެ ބޭބެ، އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރަކަށް އޭރު ހުންނެވި މުޙައްމަދު ފަޒީލް ރަޝީދުގެ ނަން އޮތެވެ.
ގޯތި މައްސަލައިގެ ތަހުގީގާ ގުޅިގެން މިދިޔަ ޑިސެންބަރު 19ގައި ފުލުހުން ބޭއްވި ނޫސްވެރިންގެ ބައްދަލުވުމުގައި، ތަހުގީގަށް ސުވާލުކުރި މީހުންނާ ހަވާލާދީ ފުލުހުން ބުނީ، ސައްހަ ނޫން ލިޔުންތައް ދޫކޮށްފައި ވަނީ ކުރީ ސަރުކާރުގެ ހައުސިން މިނިސްޓްރީން ކަމަށެވެ.
އަދި ގޯއްޗަށް ޝަރުތު ހަމަނުވި މައްސަލައިގައި ފަޒީލް ގޮސް، އަކްރަމާ ބައްދަލުކުރި ކަމަށް ވެސް ފުލުހުން ވަނީ އެ ނޫސްވެރިންގެ ބައްދަލުވުމުގައި ފަޒީލާ ހަވާލާދީ ބުނެފައެވެ.
މިކަމާ ގުޅިގެން އިއްޔެ އަކްރަމް އެންއައިސީއަށް ހުށަހެޅުއްވި މައްސަލައިގައި ވަނީ، ތަހުގީގުކުރާ މައްސަލައެއްގައި، ކުރީ ސަރުކާރަށް ތުހުމަތެއް ނުކުރެވެނީސް، އެ ފަރާތްތަކުގެ ނަން ހިއްސާކުރުމަކީ ނަން ކިލަނބުކޮށްލަން ކުރި ކަމެއް ކަމަށެވެ. އަދި އެއީ ކުރީ ސަރުކާރަށް ނިސްބަވްތާ ފަރާތްތަކާމެދު ނުރަނގަޅު ތަސައްވުރެއް އުފެއްދުމަށް ކުރި ކަމެއް ކަމަށް މައްސަލައިގައިވެއެވެ.
އޭނާ މިކަން ސިފަ ކުރައްވާފައިވަނީ، ފުލުހުންގެ ފަރާތުން ފެނުނު ވަރަށް ޒިންމާދާރުކަން ކުރަ އަމަލެއްގެ ގޮތުގައެވެ. އަދި ފުލުހުންގެ އިސްވެރިޔަކު ނަމަވެސް، ގާނޫނާ ޚިލާފު ކަމެއްކޮށްފިނަމަ ފިޔަވަޅު އެޅެން ޖެހޭނެކަން ފާހަގަ ކުރައްވާފައިވެއެވެ.
އޭނާ ހުށަހެޅުއްވި މައްސަލައިގައި ފާހަގަ ކުރައްވާފައިވާ ކަންކަމުގެ ތެރޭގައި އޭނާގެ ހައްގަށް އުނިކަން ލިބި، މުޖުތަމައުގެ ތެރޭގައި ކުށްވެރިއެއްގެ ގޮތުގައި ސިފަވެގެންދިއުމުގެ ފުރުސަތު އޮތްކަން ފާހަގަ ކުރައްވާފައިވެއެވެ.
އަކްރަމް ވިދާޅުވި ގޮތުގައި ފަޒީލް ވަނީ އަކްރަމާ ބައްދަލުކުރި ކަމަށް ބުނެ ވާހަކަ ދައްކައިފައެވެ. އަދި އެ ބައްދަލުވުމުގެ ފޮޓޯ ހުރި ކަމަށް ވެސް ބުނެފައެވެ. އެހެން ނަމަވެސް އެއީ ހަގީގަތާ ޚިލާފު ވާހަކަތަކެއް ކަމަށް އަކްރަމް ވިދާޅުވިއެވެ. އޭނާ ތުހުމަތު ކުރެއްވި ގޮތުގައި މި މައްސަލައިގައި އޭނާގެ މައްޗަށް ތުހުމަތުކޮށްފައި ވަނީ އޭނާ ފްރޭމް ކުރުމުގެ ބޭނުމުގައެވެ.
"އަޅުގަނޑު ނޯންނާނެ ގޯސްކޮށް ކަމެއް ކޮށްފައެއް. ކިތަންމެ ވަރަކަށް ފްރޭމް ކުރަން އުޅުނަސް ފްރޭމެއް ނުކުރެވޭނެ. ކުޑަކުދީން ކައިރީގައި ދައްކާ ކަހަލަ ވާހަކަ އެ ދައްކަނީ. މިއީ ސާފުކޮށް އެނގެން އޮތް ކަމެއް" އަކްރަމް "ސަން"އަށް ވިދާޅުވިއެވެ.
މި މައްސަލައިގައި އަކްރަމް، ފަޒުލް އަދި ފަޒީލް ހިމެނޭހެން ގިނަ ބައެއްގެ ޕާސްޕޯޓު ވެސް ފުލުހުން ވަނީ ހިފަހައްޓާފައެވެ.