ދިވެހިން އުމްރާއަށް ފޮނުވަން ކަމަށް ބުނެ އަލް މަޝްއަރު ޓުއާސްއިން ފޮނުވި ޗެކްތަކެއް ބައުންސްވި މައްސަލަ ތަހުގީގު ކުރުމަށް ފަހު، އަލް މަޝްއަރު ޓުއާސްގެ ވެރިންނަށް ދައުވާކުރުމަށް ޕްރޮސެކިއުޓާ ޖެނެރަލް ޕީޖީ އޮފީހަށް ފޮނުވާފައި ވާކަމަށް ފުލުހުން މިއަދު ބުނެފިއެވެ.
މީޑިއާއަށް މައުލޫމާތުދެމުން ފުލުހުން ބުނީ މަޝްއަރު ޓުއާސްއިން އުމްރާވެރިން އުމްރާއަށް ފޮނުވަން ކަމަށް ބުނެ ފޮނުވި ޗެކްތަކެއް ބައުންސް ވެފައިވާ މައްސަލަ ރިޕޯޓުކުރީ މިދިޔަ އަހަރުގެ އޭޕްރިލް މަހުގެ 13ވަނަ ދުވަހު ކަމަށެވެ.
އަދި މި މައްސަލައިގެ ތަހުގީގު ނިންމުމަށްފަހު ދައުވާކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވީ މިދިޔަ ޑިސެމްބަރު މަހުގެ ދެވަނަ ދުވަހު ކަމަށް ފުލުހުން ވަނީ ބުނެފައެވެ.
ޓިކެޓަށްވާ ފައިސާއަށް ދިން ޗެކް ބައުންސްވެގެން މަޝްއަރު ޓުއާސްގެ ފަރާތުން މިދިޔަ ރޯދަމަހު ޢުމްރާއަށް ގެންދިޔަ 50 އެއްހައި ޢުމްރާވެރިން ސައުދީގައި ތާށިވިއެވެ.
މިކަމާ ގުޅިގެން މަޝްއަރު ޓުއާސްގެ މައްސަލަ ފުލުހަށް ހުށަހެޅީ އިސްލާމިކް މިނިސްޓްރީގެ ފަރާތުންނެވެ.