ކަރަބާއޮ ކަޕްގައި ޓޮޓްނަމް ހޮޓްސްޕާއާއި ލިވަޕޫލްގެ މެދުގައި ކުޅުނު ސެމީ ފައިނަލްގެ ފުރަތަމަ ލެގު ސްޕާސްއިން ވަރަށް ހަނިގޮތަކަށް ކާމިޔާބުކޮށްފިއެވެ.
ސްޕާސްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 1-0 އިންނެވެ.
ޓީމުގެ ޖުމުލަ 10 ކުޅުންތެރިން އަނިޔާގައި ތިބުމުން ސްޕާސްއިން މެޗަށް ނެރުނީ ގިނަ ޒުވާން ކުޅުންތެރިން ހިމެނޭ ޓީމެކެވެ. އެ މީހުން ލިވަޕޫލް ކޮޅަށް ޖެހި، މެޗުގެ ހަމައެކަނި ލަނޑު ޖެހީ މެޗު ނިމެން ހަތަރު މިނެޓަށްވެފައިވަނިކޮށް 18 އަހަރުގެ ލޫކަސް ބާގްވާލެވެ.
އޭނާ އެ ލަނޑު ޖެހުމާ އެކު ލިވަޕޫލްގެ ކޯޗު އާން ސްލޮޓް ވަނީ ވަރަށް ބޮޑަށް ނުރުހުން ފާޅުކޮށްފައެވެ. ސަބަބަކީ، މެޗުގައި އެ ކުޅުންތެރިޔާއަށް ރީނދޫ ކާޑެއް ދައްކާފައިވަނިކޮށް، ލަނޑު ޖެހުމުގެ ކުޑަ އިރުކޮޅެއް ކުރިން ލިވަޕޫލްގެ ޑިފެންޑަރު ކޮސްޓާސް ސިމިކާސްއަށް ކުރި ފައުލަކާ ގުޅިގެންނެވެ. އެކަމަކު، އެ ފައުލް ރެފްރީގެ ލޮލުގައި އަޅައެއް ނުގަތެވެ.
މެޗުގައި ލިވަޕޫލުން ވެސް ނުރައްކާތެރި ހަމަލާތަކެއް އުފެއްދިއެވެ. ޚާއްސަކޮށް، ޓްރެންޓް އެލެގްޒެންޑާ އާނޯލްޑް ފޮނުވާލި ހަމަލާ ފާހަގަކޮށްލެވެއެވެ. އެކަމަކު، އެ ބޯޅަ ގޯލަށް ވަދެވަދެ އޮއްވައި ރާޑޫ ޑްރަގުސެން ވަނީ ދިފާއުކޮށްފައެވެ.
އަނިޔާގެ މައްސަލަތައް ބޮޑު ސްޕާސްގެ ރޮޑްރިގޯ ބެންޓަކޫ ވެސް މި މެޗުގައި ވަނީ އަނިޔާވެގެން ބާލަން ޖެހިފައެވެ.
މި ސެމީ ފައިނަލްގެ ދެވަނަ ލެގު އޮންނާނީ އަންނަ މަހު ހަވަނަ ދުވަހެވެ. އެ މެޗު ކުޅޭނީ ލިވަޕޫލްގެ ދަނޑުގައެވެ.
މި މުބާރާތުގައި ނިއުކާސްލް ޔުނައިޓެޑާއި އާސެނަލްގެ މެދުގައި ކުޅޭ ސެމީފައިނަލްގެ ފުރަތަމަ ލެގު، ރަށުން ބޭރުގައި 2-0 އިން ކާމިޔާބުކުރީ ނިއުކާސަލުންނެވެ.