އެމެރިކާގެ މަޝްހޫރު ތަރިން ޖެނިފާ ލޮޕޭޒް (ޖޭލޯ)އާއި ބެން އެފްލެކްގެ ކައިވެންޏަށް ދެ އަހަރު ވިއިރަށް ވަރިވާން ހުށަހަޅައި ކޯޓު ކޭސްތަކަކަށް ފަހު އެންމެ ފަހުން ދެ މީހުންގެ ވަރި ފައިނަލްވެއްޖެއެވެ.
ހޮލީވުޑްގެ ބޮޑު ޖޯޑެއް ކަމަށްވާ ޖޭލޯއާއި އެފްލެކްގެ ވަރި މި ހަފުތާގެ ތެރޭގައި ފައިނަލްވެފައިވާއިރު އެއް އިރެއްގެ ހޮލީވުޑް "އިޓް ކަޕަލް" ކަމަށްވާ އެންޖެލީނާ ޖޯލީއާއި ބްރެޑް ޕިޓްގެ ވަރި ވެސް ވަނީ މިދިޔަ ހަފުތާގެ ތެރޭގައި ފައިނަލްވެފައެވެ. މިއީ ހޮލީވުޑްގެ ތާރީޚުގައި ވެސް އެންމެ ދިގު ދެމިގެން ދިޔަ ވަރީގެ ކޭހެވެ.
މި ވާހަކައަށް ފަހު މާ ގިނަ ދުވަސްތަކެއް ވެސް ނުވަނީސް މި ފަހަރު އިވުނީ ޖޭލޯއާއި އެފްލެކްގެ ވަރި ވެސް ފައިނަލްވި ކަމެވެ. ދެ މީހުން ވަރިވާން ނިންމި ކޭހުގައި އެއްވެސް މީހެއްގެ ފަރާތުން މާލީ އެހީއެއް ހޯދުމަށް ކޯޓުގައި އެދިފައެއް ނުވެއެވެ. އެހެންވީމާ ކޭސް ނިމިގެން ދިޔައީ ފައިސާއާ ގުޅޭ އެއްވެސް މުއާމަލާތެއް ކުރިއަށް އޮތްތަނުގައި އެކަކު ވެސް ކުރަން ނުޖެހޭނެ ގޮތަށެވެ.
އެފްލެކް ގާތުން ވަރިވުމަށް ޖޭލޯ ލޮސް އެންޖެލެސް ކައުންޓީ ސުޕީރިއާ ކޯޓަށް މައްސަލަ ހުށަހަޅާފައިވަނީ މިދިޔަ އަހަރުގެ އޭޕްރިލް މަހުގެ ތެރޭގައެވެ. ކައިވެންޏަށް ދެ އަހަރު ފަހުން ދެ މީހުން ވަރިވާން އުޅޭކަން އާންމުންނާ ހިއްސާކުރީ މިދިޔަ އޯގަސްޓް މަހުގެ ތެރޭގައެވެ.
އެކީގައި ލޯބިން އުޅެ އެންގޭޖުވުމަށް ފަހު، އެ ރޫޅި ދެ މީހުން އެތައް އަހަރެއްގެ ފަހުން ދިމާވެ، އަލުން ކައިވެނިކުރީ 2022 ވަނަ އަހަރެވެ. އެއާއެކު ޖޭލޯ ބުނަމުން ދިޔައީ ދެ މީހުން ދިމާވީ ވަރަށް ވަރުން އުޅެމުން ކަމަށެވެ. އަދި، އެތައް އަހަރެއް ވަންދެން، ކާމިޔާބުނުވެ އޮތް ލޯތްބަށް އުފާވެރި ނިމުމެއް ލިބި އާ ފެށުމެއް ފެށޭތީ ދުވަހަކު ނުވާ ފަދަ އުފަލެއްވެފައިވާ ކަމަށް ޖޭލޯ މީގެ ކުރީން ބުނަމުން ދިޔައެވެ.
ދެ މީހުންގެ ކައިވެންޏަށް އެއް އަހަރު ފުރުމުން ދެ މީހުންގެ ކައިވެނީގެ ހުވާތައް އާކޮށް އަލުން ކައިވެންޏެއް ކޮށްފައިވަނީ މިދިޔަ އަހަރެވެ. މިއީ 17 ވަރަކަށް އަރު ފަހުން ދެ މީހުން ދިމާވެ، ލޯބި އަލުން ފެށުމުގެ ހެއްކެއް ކަމުގައި ދެމަފިރިން ބުނަމުން ދިޔައެވެ.