ރާއްޖެއަށް ނާދެވި މައްކާގައި ހާލުގައިޖެހިފައިވާ ދިވެހި އުމްރާވެރިންނަށް ހައްޖު ކޯޕަރޭޝަން މެދުވެރިކޮށް އެހީވުމުގެ މަސައްކަތް ފަށައިފައެވެ.
އަލް ހިޖްރަ ޢުމްރާ ގްރޫޕުގެ ހަވާލުގައި އުމްރާއަށް ދިޔަ ދިވެހީންތަކަކަށް ރާއްޖެ ނާދެވި ސައުދީ އަރަބިއްޔާގައިވަނީ ތާށިވެފައެވެ.
"ސަން"އަށް މައުލޫމާތު ލިބޭ ގޮތުގައި ރާއްޖެ ނާދެވި، ސައުދީގައި ތާށިވެފައި ތިބީ އެ ގްރޫޕަށް ފައިސާ ދައްކައިގެން އުމްރާއަށް ދިޔަ 24 މީހެކެވެ. އޭގެ ތެރޭގައި ކުޑަކުދީން ވެސް ހިމެނެއެވެ.
މި ކަމާ ގުޅިގެން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ މައްކާގައި މިވަގުތުގައި އޮތް މޯލްޑިވްސް ޙައްޖު ކޯޕަރޭޝަންގެ މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމުގެ މަސައްކަތް ކުރަމުން އަންނަ ކަމަށެވެ. އެ ގޮތުން މި ކަމާ ގުޅޭ އިރުޝާދު ހައްޖު ކޯޕަރޭޝަންގެ މެނޭޖިން ޑިރެކްޓަރު މުހައްމަދު ޝަކީލަށް ދެއްވާފައިވާނެ ކަމަށް މިނިސްޓަރު ވަނީ ވިދާޅުވެފައެވެ.
ދިވެހި އެއްވެސް ރައްޔިތަކަށް ދިމާވާ ދަތިކަމެއްގައި އެހީ ނުވެ ނުތިބޭނެ ކަމަށާއި، ރައީސް ޑރ. މުޙައްމަދު މުއިއްޒު އަބަދު ވެސް އިރުޝާދު ދެއްވަނީ ރައްޔިތުންނާ ގާތުން މަސައްކަތްކުރުމަށް ކަމަށް މިނިސްޓަރު ވިދާޅުވެފައިވެއެވެ.
"ހާލުގައި ޖެހުނު އުމްރާވެރިން މި މަހު 10 ގައި މާލެ ގެނެވޭތޯ މަސައްކުރަމުން ދަނީ، އެމީހުން ތިބިހޮޓަލުން ނިކުންނަން ޖެހޭތީވެ އެމީހުން ފުރަންވަންދެން ހައްޖު ކޯޕަރޭޝަނުގެ އެހީތެރިކަމުގައި ތިބޭނެ. ކެއުމާއި ބުއިމުގެ އިންތިޒާމް ހަމަޖައްސައިދެވޭނެ. އުމްރާވެރިންގެ ތެރޭގައި 12 އަހަރުގެ 3 ކުދިން ހިމެނޭ،" މިނިސްޓަރު ވިދާޅުވިއެވެ.
އަލް ހިޖްރަ ޢުމްރާ ގްރޫޕުގެ ހަވާލުގައި އުމްރާއަށް ދިޔަ 24 މީހުންގެ އެ ގްރޫޕު މައްކާއަށް ގެންދިޔައީ ވެސް ތިންބައި ކޮށް، ތިން ފްލައިޓެއްގައި ކަމަށާއި، ހުރުމުގެ އިންތިޒާމުތަކެއް ވެސް ހަމަޖެހިފައި ނެތް ކަމަށްވަނީ މައުލޫމާތު ލިބިފައެވެ. އެގޮތުން ދަތުރުގެ ތެރެއިން އެއް ރެއަކު، ހޮޓަލުން ވެސް ނިކުންނަށް ޖެހުނު ކަމަށް ވަނީ ބުނެފައެވެ.
މިހާރު އުމްރާގެ އަޅުކަން ނިމިފައިވާއިރު، ދަތުރުގައި ދިޔަ އެންމެން ވެސް ތިބީ ރާއްޖެ ނާދެވިފައެވެ. އަދި މިހާތަނަށް އެއްވެސް މީހަކަށް ރިޓާން ޓިކެޓު ވެސް ހަމަނުޖެހޭކަމަށް އުމްރާވެރިންނާ ހަވާލާދީ، މައުލޫމާތު ހިއްސާކުރި ފަރާތުން ބުންޏެވެ.
މި ކަމާ ގުޅިގެން އެ ޖަމާއަތުގެ ބަހެއް ހޯދަން މަސައްކަތްކުރި ނަމަވެސް، ފޯނަށް ޖަވާބު ނުދޭތީ، ލިބޭ ގޮތެއް ނުވެއެވެ.
ކުދިކުދި އުމްރާ ގްރޫޕުތަކުން މީހުން ސައުދީއަށް ގެންގޮސް، ހާލުގައި ޖެހިގެން މީގެ ކުރިން ވެސް މައްސަލަތައް ފެންމަތިވެފައި އެބަހުއްޓެވެ.
އަދި އުމްރާއަށް ގެންދިއުމުގެ ނަމުގައި ފައިސާ ހޯދުމަށްފަހު ބޮޑެތި ސްކޭމްތައް ވެސް ހިންގައިފައި އެބަހުއްޓެވެ.