ރައްޔިތުންގެ ބޯހިޔާވަހިކަމާ ގުޅޭ މައްސަލަތައް ރައްޔިތުންގެ މަޖިލީހުގެ ގެދޮރުވެރިކަމުގެ ކޮމިޓީއިން ބަލައިދީ އަވަސްކޮށްދިނުމަށް އެދި މަޖިލީހުގެ ރައީސް އަބްދުއްރަހީމް އަބްދުﷲއަށް ސިޓީއެއް ފޮނުއްވައިފިއެވެ.
މި ސިޓީ އެ މަނިކުފާނަށް ފޮނުއްވީ މަޖިލީހުގެ ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހީމް (ކުޑޫ)އެވެ.
ކުރީ ސަރުކާރުގެ ބިންވެރިޔާ ސްކީމުން ނުހައްގުން ގޯތި ދިން މައްސަލަ އޮތީ ވަރަށް ބޮޑަށް ހޫނުވެފައެވެ. އެ މައްސަލައާ ގުޅޭ ގޮތުން ފުލުހުން އަންނަނީ ތަހުގީގު ކުރަމުންނެވެ. އަދި މައްސަލައިގައި ހިމެނޭ ހުރިހާ އެންމެންގެ އިލްޓްރޯނިކް އައިޓަމްތައް ކޯޓު އަމުރެއްގެ ދަށުން ވަނީ ހިފަހައްޓާފައެވެ. ހަމައެއާއެކު ފުލެޓު ލިސްޓު ކަނޑައެޅި ތާރީޚުތަކަށް އަދިވެސް ނެރެފައި ނުވާތީ އާންމުން ކަންބޮޑުވުން ފާޅުކުރެއެވެ.
އެ މައްސަލައާ ގުޅިގެން މަޖިލީހުގެ ރައީސަށް ފޮނުއްވި ސިޓީގައި މެންބަރު ވިދާޅުވެފައި ވަނީ މި ސަރުކާރު ވެރިކަމާ ހަވާލުވުމަށްފަހު ގޯއްޗާއި ފުލެޓު ދޫކުރުމުގެ ކަންކަމުގައި އަމަލުކުރަން ފެށި ގޮތުންނާއި، ސަރުކާރުގެ ކަމާބެހޭ ވުޒާރާގެ ކަންކަން ހުރި ގޮތުން އެކަމާ މެދު ރައްޔިތުންގެ އިތުބާރު ގެއްލިފައިވާ ކަމަށެވެ. އަދި އިންސާފުވެރި އުސޫލެއްގެ ތެރެއިން ބޯހިޔާވަހިކަން ލިބޭނެކަމުގެ ޔަގީންކަން ވަރަށް ކުޑަވެފައިވާ ކަމަށް ފާހަގަކޮށްފައިވެއެވެ.
ސިޓީގައި ފާހަގަކުރައްވާފައިވާ ކަންތައްތައް:
- ގޯތި ލިބޭނެ ކަމަށް ކަނޑައަޅައި، ލިޔުން ދީފައިވާ ފަރާތްތަކަށް މި ސަރުކާރަށް އަހަރެއް ވީއިރުވެސް ގޯތި ހަވާލުކޮށްފައި ނުވާކަން.
- ގޯތި ދޫކުރުމަށްޓަކައި ހިއްކުމަށް ހަމަޖެހިފައިވާ ތަންތަން ހިއްކުމުގެ މަސައްކަތް ހުއްޓިފައިވާކަމާއި، ގުޅީފަޅުގެ ލޭންޑް ޔޫސް ޕްލޭން މި ސަރުކާރުން ބަދަލުކުރުމާ ގުޅިގެން އެތަން ހިއްކޭނޭ ދުވަހެއް ނުވަތަ ހިއްކޭނެ ގޮތެއް ވެސް ސަރުކާރަށް ހޯދިފައި ނުވުން.
- 4،000 ފުލެޓު ލިބޭނެކަމަށް ކަނޑައަޅައި އެގްރީމަންޓުގައި ސޮއިކުރި ފަރާތްތަކަށް ފުލެޓު ހަވާލުކޮށްފައި ނުވުން.
- 4،000 ފުލެޓު ލިބޭ މީހުންގެ ލިސްޓަކީ ގެޒެޓުގައި ޝާއިއުކޮށްފައިވާ ލިސްޓެއް ނަމަވެސް ލިސްޓު ބަދަލުކުރަން ނިންމާފައިވުން.
- ފުރަތަމަ ކަނޑައަޅާފައިވާ ފުލެޓު ލިބޭ މީހުންގެ ލިސްޓު ބަދަލުކޮށް، މި ސަރުކާރުން ބޭނުން ބަޔަކަށް ފުލެޓުތައް ދޭން އުޅޭކަމަށް ދެކެވޭ ވާހަކައާ ގުޅިގެން އާންމުންގެ މެދުގައި ކަންބޮޑުވުން އިތުރުވާކަން.
މެންބަރު މުހައްމަދު އިބްރާހީމް ވިދާޅުވީ އެއީ ހައްސާސް މައްސަލައެއް ނަމަވެސް ރައްޔިތުންގެ މަޖިލީހުގެ ގެދޮރުވެރިކަމުގެ ކޮމިޓީ ޖުލައި 31، 2024ގައި އުފެއްދި ފަހުން ބޭއްވި ދެ ބައްދަލުވުމުގައި ވެސް އެ މައްސަލައާ ގުޅޭގޮތުން ރައްޔިތުންގެ ހިތްތަކަށް ތަސައްލީއެއް ލިބިދޭފަދަ އެއްވެސް މަސައްކަތެއް ކޮށްފައި ނުވާ ކަމަށެވެ.
އެހެންކަމުން ބޯހިޔާވަހިކަމަކީ ރައްޔިތުންގެ އަސާސީ ހައްގަކަށް ވެފައި، އެއީ ވަރަށް ގިނަ ރައްޔިތުންގެ އާންމު ދިރިއުޅުމާ ގުޅިފައިވާ ކަމަކަށް ވާތީ އެ މައްސަލައިގައި ރައްޔިތުންނަށް ބޭނުންވާނެ މައުލޫމާތު ސާފުކުރުމާއި، ސީދާ ޖަވާބެއް ސަރުކާރުގެ ކަމާ ބެހޭ ވުޒާރާތައް މެދުވެރިކޮށް ހޯއްދަވައި ދެއްވުމަށް މަޖިލިސް ރައީސްގެ އަރިހުން ވަނީ އެދިވަޑައިގެންފައެވެ.
އަދި ގެދޮރުވެރިކަމުގެ ކޮމިޓީގެ މަސައްކަތް މިހާރަށްވުރެ ބާރަށް ހިންގޭނެ ގޮތެއް ހައްދަވައި ދެއްވައި، އެ މައްސަލައަށް އަވަސް ހައްލެއް ހޯއްދަވައި ދެއްވުމަށް ވެސް އެ ސިޓީގައި ވަނީ އެދިވަޑައިގެންފައެވެ.