ބިންވެރިޔާ ސްކީމާ ގުޅޭ ގޮތުން ފުލުހުން ތަހުގީގު ކުރަމުން އަންނަ މައްސަލައިގައި ހިމެނޭ ހުރިހާ އެންމެންގެ އިލްޓްރޯނިކް އައިޓަމްތައް ކޯޓު އަމުރެއްގެ ދަށުން ހިފަހައްޓާފައިވާ ކަމަށް ފުލުހުން މިރޭ ބުނެފިއެވެ.
ނުހައްގުން ގޯތި ދިން މައްސަލައިގައި އެންމެ ބޮޑު ތުހުމަތެއް ކުރަނީ އެޗްޑީސީގެ ކުރީގެ މެނޭޖިން ޑިރެކްޓަރަކަށް ހުންނެވި އިބްރާހީމް ފަޒުލް ރަޝީދަށެވެ.
މި މައްސަލައިގައި ނުހައްގުން ގޯތި ލިބުން މީހުންގެ ތެރޭގައި ފަޒުލްގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދުފަޒީލް ރަޝީދު ހިމެނެއެވެ.
މި މައްސަލައިގައި މީގެ ކުރިން 20 މީހެއް ފުރުން މަނާކޮށް ވަނީ އަމުރެއް ނެރެފައެވެ. އެ މީހުންގެ ތެރޭގައި ފަޒުލްގެ އިތުރުން ފަޒީލް ވެސް ހިމެނެއެވެ.
މި މައްސަލައިގައި މިދިޔަ ހޯމަ ދުވަހުގެ ރޭ ފުލުހުންވަނީ، ފަޒުލް ދިރިއުޅުއްވާ ގެ، ކޯޓު އަމުރެއްގެ ދަށުން ބަލައިފާސްކޮށްފައެވެ. އަދި ތަހުގީގަށް ބޭނުންވާ ތަކެތި ފުލުހުންގެ ބެލުމުގެ ދަށަށް ގެނެސްފައެވެ. އަދި އޭނާގެ ބޭބެ، ފަޒީލްގެ ފޯނު ވެސް ކޯޓު އަމުރެއްގެ ދަށުން މިއަދު ވަނީ ހިފަހައްޓައިފައެވެ.
މި މައްސަލައިގައި ފަޒުލްގެ މައްޗަށް ކުރެވުނު ތުހުމަތުތަކާއެކު އޭނާ މަގާމުން ސަސްޕެންޑުކުރިއިރު، ތަހުގީގަށް އެއްބާރުލުން ދިނުމުގެ ގޮތުން މަގާމުން އިސްތިއުފާ ދެއްވީއެވެ.
މި މައްސަލައިގައި އެމްޑަބްލިއުއެސްސީގެ ބޯޑުންވަނީ ފަޒީލް ވެސް ސަސްޕެންޑުކޮށްފައެވެ.
ގޯތި މައްސަލައިގައި ސަސްޕެންޑުކުރި އެޗްޑީސީގެ ބޯޑު މެންބަރުންގެ ސަސްޕެންޝަން އިއްޔެވަނީ އުވާލައިފައެވެ. އަދި މި މައްސަލައިގައި އެޗްޑީސީން ކަނޑައިލި 15 މުވައްޒަފަކަށް މިއަދުވަނީ އަލުން ވަޒީފާ ވެސް ދީފައެވެ. އޭގެ ތެރޭގައި، ޗީފް ފައިނޭންޝަލް އޮފިސަރު އަބްދުﷲ ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން ހިމެނެއެވެ.
ގޯތި މައްސަލައިގެ ތަހުގީގު ފެށިތާ ދުވަސްވަތަކެއް ފަހުން، މި މައްސަލައިގައި ހިމެނޭ މީހުންގެ އިލެކްޓްރޯނިކް އައިޓަމްތައް ހިފަހައްޓާފައިވާއިރު، އެ ކަން ލަސްވެގެން މީގެ ކުރިން ރައްޔިތުން ކަންބޮޑުވުން ފާޅުކޮށްފައިވެއެވެ.
ބިންވެރިޔާ ސްކީމަށް ޝަރުތު ހަމަނުވި ނަމަވެސް ގޯތި ލިބިފައިވާ މީހުންގެ ތެރޭގައި، ފަޒުލްގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުޙައްމަދު ފަޒީލް ރަޝީދު ހިމެނޭ ކަމަށް ބުނާ ލިޔެކިޔުންތަކެއް ވަނީ އާންމުވެފައެވެ. އެ ގޯތީގައި ވަށައިފާރު ވެސް ވަނީ ރާނާފައެވެ.
އެ މައްސަލައާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމެއްގައި ފަޒުލް ވިދާޅުވީ އެކަމުގައި އޭނާގެ މަސްލަހަތެއް ނެތް ކަމަށާއި، އެފަދަ މައްސަލައެއް ފެންމަތިވީ އޭނާގެ ބޭބެއާ ގުޅޭ ގޮތުން ކަމަށް ވުމަކީ އިއްތިފާގެއް ކަމަށެވެ.
ގޯތީގެ މައްސަލަ ފުލުހުންނާއި، އެންޓި ކޮރަޕްޝަން ކޮމިޝަން (އޭސީސީ)އިން އަންނަނީ ބަލަމުންނެވެ.
މި މައްސަަލަ ފެންމަތިވެފައި އޮއްވައި ރައީސް މުއިއްޒުވަނީ ސަރުކާރުގެ އެއްވެސް ވެރިއަކު، ނުވަތަ އިސް މަގާމެއްގައި ހުންނަވާ ބޭފުޅަކު ވިޔަސް ގަވާއިދާ ޚިލާފަށް، ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރިކަމުގެ މައުލޫމާތު ލިބިވަޑައިގެންފިނަމަ އެ ބޭފުޅަކާ މެދު ވަގުތުން ފިޔަވަޅު އަޅުއްވާނެ ކަމަށް ވިދާޅުވެ އިންޒާރު ދެއްވައިފައެވެ.
ނުހައްގުން ގޯތިތަކެއް ދިން މައްސަލަ ފެންމަތިވެފައި އޮއްވައި ފްލެޓު އެޅުމުގެ ނަމުގައި ސީލައިފް ގްލޯބަލްއިން ހިންގި ސްކޭމްގައި ގެއްލުންވި މީހުންނަށް ވިނަރެސް ފުލެޓުތަކެއް ދޭން އެންގުމުން، ސީލައިފަށް ފައިސާ ދެއްކި ކަމުގެ ފޭކު ލިޔުންތަކެއް ހަދައިގެން ވިނަރެސް ފުލެޓުތަކެއް ދީފައިވާކަން ވެސް ވަނީ ހާމަވެފައެވެ.