ޕޮޕް މިއުޒިކްގެ ތާރީޚުގައި ވެސް ފެނުނު އެންމެ ވަރުގަދަ އެއް ތަރި ކަމަށްވާ މައިކަލް ޖެކްސަން ގާއިމުކޮށްފައިވާ ރިކޯޑެއް، އެތައް އަހަރުތަކެއް ފަހުން އާރުއެންބީ ލަވަކިޔުންތެރިޔާ ސިޒާ، މުގުރާލަން ރެޑީ ވެއްޖެއެވެ.
ގިނަ ބައެއްގެ ޕްލޭލިސްޓުގައި މިހާރު އެންމެ ގިނައިން އެއްކުރާ އެއް ލަވަކިޔުންތެރިޔާ ސިޒާ ވަނީ ޖުމްލަ އާ 13 ލަވައާ އެކު އޭނާގެ އަލްބަމް "އެސްއޯއެސް"ގެ ޑިލަކްސް ވާޝަން ދާދި ފަހުން ރިލީޒްކޮށްފައެވެ. މިއީ އޭނާ 2022 ވަނަ އަހަރު ނެރުނު އަލްބަމްގެ ދެވަނަބައެވެ.
އަލަށް ނެރުނު ޑިލަކްސް ވާޝަން، "ލާނާ"ގައި މިހާރު ޖުމްލަ 30 އަށް ވުރެ ގިނަ ލަވަ ހިމެނެއެވެ. މި އަލްބަމް އެންމެ ފުރަތަމަ ރިލީޒްކުރި ހިސާބުން ފެށިގެން ބިލްބޯޑުގެ ރިކޯޑު ލިސްޓުގެ ކުރީގައި އެތައް ހަފުތާއެއް އިނެވެ.
އާ ރިލީޒްއާ އެކު އަނެއްކާ މި އަލްބަމް ޗާޓުގެ ކުރިއަށް ވަނީ ޖައްސާލާފައެވެ. މިއާއެކު މިއުޒިކްގެ ޕޮޕް ކިންގްގެ ނަން ދީފައިވާ މައިކަލް ޖެކްސަންގެ ރިކޯޑު މުގުރާލަން އޭނާ ތައްޔާރުވެއްޖެއެވެ. އެއީ، އަލްބަމް އެއް ބިލްބޯޑުގެ ޗާޓުގެ ގަދަ 10 ގައި އެންމެ ގިނަ ދުވަހު އިން ކަމުގެ ރިކޯޑެވެ.
މި ރިކޯޑު ހޯދާފައިވަނީ މައިކަލް ޖެކްސަންގެ "ތުރިލާ"އެވެ. ތުރިލާ ވަނީ މި އަލްބަމްއާ އެކު ލިސްޓުގެ ގަދަ 10ގައި 50 އަށް ވުރެ ގިނަ ހަފުތާ ހޭދަކޮށްފައެވެ. ސިޒާގެ އާ ރިލީޒްއާ އެކު އޭނާ މި ރިކޯޑު މުގުރާލާނެއެވެ. ނަމަވެސް، މި ރިކޯޑު މުގުރާލަން 10 ހަފުތާ ވާނެއެވެ. ގިނަ ބަޔަކު ގަބޫލުކުރާ ގޮތުގައި ސިޒާގެ އަލްބަމް އެ ރިކޯޑު ފަހަނަ އަޅާ ދާނެއެވެ.