ހޮލީވުޑްގެ އެންމެ މަގުބޫލު އަދި މި ވަގުތު އެންމެ ކޮންޓްރޮވާޝަލް އެއް ތަރި ކަމަށްވާ ކާންޔޭ ވެސްޓް ރާއްޖޭގައި ޗުއްޓީ ހޭދަކުރަމުން އެބަދެއެވެ.
ހޮލީވުޑްގައި ގިނަ ފާޑުތަކެއް ރައްދުވުމުގެ ސަބަބުން ސްޕޮޓްލައިޓުން ދުރަށް ޖެހިލުމަށް ފަހު ކާންޔޭ މި ދުވަސްކޮޅު އުޅެނީ އަމިއްލަ ދިރިއުޅުމައިގެންނެވެ. މީޑިއާތަކަށް ވާހަކަދެއްކުން ވެސް އޭނާ ވަނީ މަދުކޮށްފައެވެ.
ކާންޔޭ ވަނީ އޭނާ ޗުއްޓީ ހޭދަކޮށްލުމަށްޓަކައި ދާދިފަހުން ރާއްޖެ އައިސްފައެވެ. އެގޮތުން، މީގެ ދެވަރަކަށް ދުވަސްކުރީން ރާއްޖެ އައިސް އޭނާ ޗުއްޓީ ހޭދަކުރަމުން އަންނަނީ ވަން އެންޑް އޮންލީ ރީތި ރަށުގައި ކަމަށް މައުލޫމާތު ލިބެއެވެ. މިހާރު ވެސް އޭނާ ރާއްޖޭގައި ހުރިއިރު އޭނާ ޗުއްޓީ ހޭދަކުރަމުން އަންނަނީ އޭނާގެ އަންހެނުން ބިއާންކާ ސެންސޯރީއާ އެކުގައެވެ.
މައުލޫމާތު ލިބޭ ގޮތުގައި ޗުއްޓީ ހޭދަކޮށްލުމަށް ރާއްޖެ އައިސްފައިވަނީ ބިއާންކާގެ އުފަންދުވަސް ފާހަގަކުރުމަށެވެ.
ކާންޔޭ ރާއްޖޭގައި ޗުއްޓީ ހޭދަކުރަމުން އަންނަނިކޮށް ދާދި ފަހުން ސޯޝަލްމީޑިއާއަށް ވަނީ ވީޑިއޯއެއް އާންމުވެފައެވެ. މި ވީޑިއޯއިން ފެންނަނީ ބޮޑުބެރަށް އޭނާ ނަށާ މަންޒަރެވެ. ބޮޑުބެރަށް ނަށަމުން ދިޔައިރު އޭނާގެ އަންހެނުން ވެސް ބައިވެރިކުރާ މަންޒަރު ވީޑިއޯއިން ފެނެއެވެ.
ދެ މީހުންގެ ޗުއްޓީ ދަތުރަށް ފަހު އެނބުރި އެމެރިކާއަށް ދާނެ ދުވަހެއް ނޭނގެއެވެ. ނަމަވެސް، ހޮލީވުޑްގެ ތަރީން އާންމުކޮށް ރާއްޖެ އައިސް އުޅޭއިރު ހަފުތާއެއް ނުވަތަ އެއަށް ވުރެ ގިނަ ދުވަހު ރާއްޖޭގައި މަޑުކޮށްހަދައެވެ.
މަޝްހޫރު ސޯޝަލައިޓް ކިމް ކާޑޭޝިއަން އާ ވަރިވުމަށް ފަހު ކާންޔޭ ބިއާންކާއާ އެކުގައި ފެނުމުން ގިނަ ބައެއްގެ ފާޑު ކިޔުން ރައްދުވިއެވެ. އެގޮތުން ބިއާންކާ، ކާންޔޭގެ ކުރީގެ އަންހެނުންނާ ވައްތަރުވުމުން ގިނަ ބަޔަކަށް އެކަން ވެގެން ދިޔައީ ވަރަށް އައިބު ކަމަކަށެވެ. ނަމަވެސް، އާންމުންގެ ފާޑު ކިޔުމާއެކު ވެސް ކާންޔޭ ވަނީ 2022 ވަނަ އަހަރުގައި ބިއާންކާ އާ ކައިވެނިކޮށްފައެވެ. މިހާރު ކާންޔޭ ބޭރަށް ނުކުންނަ ނަމަ ހަމައެކަނި ފެންނާނީ ބިއާންކާއާ އެކުގައެވެ.