ޚިޔާނާތުގެ ތުހުމަތު ކުރެވޭ ކަސްޓަމްސް އޮފިސަރުންނަކީ މިހާރު ވެސް ކަސްޓަސްމްގެ ވަޒީފާގައި ތިބި, ރިޓަޔާ ނުކުރާ އޮފިސަރުންތަކެއް ކަމަށް އެ އިދާރާއިން ބުނެފިއެވެ.
ކަސްޓަމްސް އޮފިސަރުންތަކެއްގެ މައްޗަށް ތުހުމަތުކުރެވޭ ބޮޑު ޚިޔާނާތުގެ މައްސަލައެއް ފުލުހުން ތަހުގީގުކުރަން ފެށިކަން ހާމަވީ އިއްޔެއެވެ.
މި ކަމާ ގުޅިގެން ކަސްޓަމްސްއިން ބުނީ އެ އިދާރާގެ ބައެއް އޮފިސަރުންނަށް ތުހުމަތު ކުރެވޭ، މަނީ ލޯންޑްރިންއާއި، ޚިޔާނާތާއި، ރިޝްވަތާ ގުޅޭ މައްސަލަތަކެއް ފުލުހުން ތަހުގީގު ކުރަމުން ގެންދާކަމަށް އެ އިދާރާއަށް އަންގައިފައިވާ ކަމަށެވެ.
އެ ތުހުމަތުކުރެވޭ އޮފިސަރުންކަމަށް ފުލުހުންގެ ޚިދުމަތުން މައުލޫމާތު ދިން އެއްވެސް އޮފިސަރެއް އެ ޚިދުމަތުން ރިޓަޔާކޮށްފައި ނުވާކަމަށް ވެސް ކަސްޓަމްސްއިން ބުންޏެވެ.
ފުލުހުން ބުނީ، އެ މުއައްސަސާގެ ސަމާލުކަމަށް މި މައްސަލަ އައީ މިދިޔަ އޮގަސްޓު މަހުގެ 19 ވަނަ ދުވަހު ކަމަށެވެ.
އެ މައްސަލަ ފުލުހުން ތަހުގީގުކުރަމުން އަންނަ ކަމަށް ބުނި ނަމަވެސް މައްސަލައާ ގުޅޭ އިތުރު އެއްވެސް ތަފުސީލެއް ފުލުހުން ހިއްސާކޮށްފައެއް ނުވެއެވެ.
ފާހަގަކޮށްލެވޭ ގޮތުގައި ކަރެކްޝަންސްގެ މުވައްޒަފުންތަކަކަށް ތުހުމަތުކުރެވޭ މި ފަދަ ޚިޔާނާތުގެ މައްސަލައެއް ވެސް މީގެ ކުރިން ފެންމަތިވެފައިވެއެވެ. އެ މައްސަލައިގައި 18 އޮފިސަރުން ހިމެނޭ ކަމަށް ފުލުހުން އޭރު ބުންޏެވެ.