ހޮލީވުޑްގެ މި ވަގުތުގެ އެންމެ މަގުބޫލު ޖޯޑު ނުވަޔަ "އިޓް ކަޕަލް" ކަމަށްވާ ޒެންޑެޔާ އަދި ޓޮމް ހޮލެންޑް އެންގޭޖުވެއްޖެ ކަމަށް އެމެރިކާގެ ނޫސްތަކުން ރިޕޯޓުކޮށްފިއެވެ.
ޒުވާން އެކްޓަރުން އެކީގައި އުޅެ އެންގޭޖުވެގެން އުޅޭ ކަމަށް ބުނެ ވާހަކަދެކެވޭތާ މިހާރު ދުވަސްތަކެއް ވެއްޖެއެވެ. ނަމަވެސް, އެންމެ ފަހުން މި ވާހަކަތަކަށް ވަނީ އާ ބަރުދަނެއް ލިބިފައެވެ.
ދާދި ފަހުން ބޭއްވި ގޯލްޑެން ގްލޯބް އެވޯޑު ހަފުލާގައި ޒެންޑެޔާ ވަނީ ރެޑް ކާޕެޓުން ފެނިފައެވެ. ޒެންޑެޔާގެ އައުޓްފިޓް އެހެން އިވެންޓުތަކާ އެއްގޮތަށް ހަމަ އެންމެންގެ ސަމާލުކަން ހޯދިއެވެ. ނަމަވެސް, ގިނަ ބަޔަކު ހައިރާން ކޮށްލާފައިވަނީ އޭނާ އިނގިލީގައި އިން އަނގޮޓިއާ ގުޅިގެންނެވެ. ޒެންޑެޔާގެ ކަށިއިނގިލީގައި އެންގޭޖްމެންޓް އަނގޮޓިއަކަށް އިޝާރާތް ކުރާ އެއްޗެއް ފެނިގެން ގޮސްފައިވެއެވެ.
މި ކަމާ ގުޅޭގޮތުން އޭނާ ވަކި އެއްޗެއް ހާމަކޮށްފައެއް ނުވެއެވެ. ނަމަވެސް, މި އަނގޮޓި ފެނިފައިވަނީ ޓޮމް އާއިލާއެއް ފެށުމަށް ރެޑީ ކަމަށް ބުނެ އިންޓަވިއުއެއް ދީފައިވާ ދަނޑިވަޅެއްގައެވެ.
އެތައް ބަޔަކު ބުނަނީ ދެ މީހުންގެ ކައިވެނީގެ ވާހަކަ ވަރަށް އަވަހަށް އިއުލާނުކުރުން އެކަށީގެންވާ ކަމަށެވެ.
ޓޮމްގެ ކެރިއަރުގައި އެންމެ ބޮޑު ޕްރޮޖެކްޓަކަށް ދެން އޮތީ ސްޕައިޑާމޭންގެ ހަތަރުވަނަ ފިލްމު ކަމަށް ބުނެއެވެ. މި ފިލްމަކީގެ އޭނާގެ ފަހު ފިލްމަށްވުން ވެސް އެކަށީގެންވެއެވެ.
ޓޮމާއި ޒެންޑެޔާ ދިމާވެފައިވަނީ ސްޕައިޑާމޭންގެ ޝޫޓިންތަކުގެ ތެރެއިންނެވެ. ޒެންޑެޔާއަކީ ޓޮމް ވަރަށް ކުރީން ފެށިގެން އޭނާގެ ސެލެބްރިޓީ ކްރަޝްއެވެ. ދެ މީހުން އެކީގައި ފެނުމުން ފޭނުންނަށް ލިބިފައިވަނީ ވަރަށް ބޮޑު އުފަލެކެވެ.