އިހުސާން ފިހާރަ ހިންގާ ގ. އުފުރިޔާ ގޭގެ ހަަވަނަ ފަންގިފިލާގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފުން ބުނީ އެ ސަރަހައްދުގައި މިހާރު ފަޔާ ރެސްކިއު ޓީމުން ހަރަކާތްތެރިވަމުން އަންނަ ކަމަށެވެ. ފުލުހުން މައުލޫމާތު ދިން ގޮތުގައި އަލިފާނުގެ ހާދިސާ ހިނގައިގެން ރިޕޯޓުކުރީ މިރޭ 11:27 ހާއިރެވެ.
މައުލޫމާތު ލިބޭ ގޮތުގައި އެ ސަރަހައްދުގެ ހާލަތު ނުރައްކާތެރި މިންވަރަކަށް ގޯސްވެފައެއް ނުވެއެވެ. އެގޮތުން މިހާރު ދުންގަނޑު ވެސް ފިލަމުން އަންނަކަމަށް މައުލޫމާތު ލިބެއެވެ. އެއާއެކު އަލިފާނުގެ ހާދިސާ 00:01 ގައި ކޮންޓްރޯލްކޮށްފައިވާ ކަމަށް ވެސް އެމްއެންޑީއެފުން ވަނީ ބުނެފައެވެ.
ގ. އުފުރިޔާ ގޭގެ ހަަވަނަ ފަންގިފިލާގައި އަލިފާނުގެ ހާދިސާއެއް ހިނގައިގެން ފަޔާ އެންޑް ރެސްކިއުއިން ހަރަކާތްތެރިވުން -- ސަން ފޮޓޯ/ ޝާމިން
ފަޔާ ރެސްކިއުޓީމުން އެ ގެއަށް ވަދެ، އެ ތަން ބެލުމުގެ މަސައްކަތް ވެސް ވަނީ ކޮށްފައެވެ.
މަންޒަރުތަކުން ފެންނަ ގޮތުގައި، ރޯވި ފަންގިފިލާގެ އެޕާޓްމަންޓުގެ ބެލްކަނީގައި ދުންބޯވެ، ބެލްކަނި އޮތީ ވަރަށް ބޮޑަށް ކަޅުވެފައެވެ.
ގ. އުފުރިޔާ ގޭގެ ހަަވަނަ ފަންގިފިލާގައި އަލިފާނުގެ ހާދިސާއެއް ހިނގައިގެން ފަޔާ އެންޑް ރެސްކިއުއިން ހަރަކާތްތެރިވުން -- ފޮޓޯ: އެމްއެންޑީއެފް
ހާދިސާއާ ގުޅިގެން މީހަކަށް އަނިޔާއެއްވީ ކަމުގެ އެއްވެސް ރިޕޯޓެއް އަދި ނުލިބެއެވެ.
އެ ސަރަހައްދުގައި މާލޭގެ މޭޔަރު އާދަމް އާޒިމްގެ އިތުރުން ބައެއް ކައުންސިލަރުން ވެސް ހަރަކާތްތެރިވެވަޑައިގެންފައިވެއެވެ.
މިދިޔަ އަހަރު ވެސް ނުރައްކާތެރި، ބޮޑެތި އަލިފާނުގެ ހަދިސާތަކެއް ވަނީ ހިނގައިފައެވެ. އޭގެ ތެރޭގައި ތިން މިނިސްޓްރީއެއް މުޅިން އެނދި އަލިފާނުގެ ހާދިސާ ހިމެނެއެވެ.