ވެރިކަން ކުރާ ޕާޓީ، ޕީއެންސީއަށް އެކި ޕާޓީތަކުން ވަގަށް މެންބަރުން ވައްދާކަމަށް ތުހުމަތުކޮށް، އެ ފޯމުތައް ސައްހަތޯ އަލުން ބަލައިދިނުމަށް އިލެކްޝަންސް ކޮމިޝަން (އީސީ)ގައި އެދިފައިވާނެ ކަމަށް އިދިކޮޅު އެމްޑީޕީން ބުނެފިއެވެ.
މިދިޔަ ނޮވެމްބަރު މަހު ޕީއެންސީން ވަނީ އެ ޕާޓީއަށް އެހާތަނަށް 97،000 ފޯމު ލިބިފައިވާ ކަމަށާއި އެއް ލައްކަ ހަމަކުރާ ފުރަތަމަ ޕާޓީއަކަށް އެ ޕާޓީ ވާނެ ކަމަށް ބުނެފައެވެ.
އެކަމާ ގުޅިގެން އެމްޑީޕީން ވަނީ ކަންބޮޑުވުން ފާޅުކޮށްފައެވެ. އެ ޕާޓީން ތުހުމަތުކުރާ ގޮތުގައި ޕީއެންސީއަށް ވަނުމަށް ފޯމު ފުރާފައިނުވާ އެ ޕާޓީގެ ބައެއް އާންމު މެންބަރުންނާއި ގައުމީ މަޖިލީހުގެ މެންބަރުން ވެސް އެމްޑީޕީގެ ދަފުތަރުން އުނިކޮށް، ޕީއެންސީގެ ހިމަނާފައިވެއެވެ.
އަދި އެ ޕާޓީން ވަނީ، ޕީއެންސީއަށް އެއް ލައްކަ މެންބަރުން ހަމަކުރަން ކަމަށް ބުނެ، މީހުންގެ ސޮއި ފޯޖުކޮށްގެން ފޯމު ހުށަހަޅާ ކަމަށާއި ދައުލަތުގެ ހުރިހާ އިދާރާއަކަށް ނުފޫޒު ފޯރުވައި އެކަން ފޮރުވުމަށް ސަރުކާރުން މަސައްކަތް ކުރާ ކަމަށް ވެސް ތުހުމަތުކޮށްފައެވެ.
"ސަން" އާ ވާހަކަދައްކަވަމުން އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވީ އެ ކަންބޮޑުވުންތައް އީސީއާ އެ ޕާޓީން ހިއްސާކޮށްފައިވާނެ ކަމަށެވެ. އަދި ޕީއެންސީން ހުށަހަޅާފައިވާ ފޯމުތައް ސައްހަތޯ އަލުން ބަލައިދިނުމަށް އެ ޕާޓީން އެދިފައިވާނެ ކަމަށް ވެސް އަނަސް ވިދާޅުވިއެވެ.
އަނަސް ވިދާޅުވީ ޕާޓީތަކަށް މެންބަރުން ވައްދަން ޖެހޭނީ ދައުލަތުގެ ވަސީލަތްތައް ނަހަމަ ގޮތުގައި ބޭނުން ކޮށްގެން ނޫން ކަމަށެވެ. ނަމަވެސް އެމްޑީޕީން ބެލި ބެލުމުން އެނގުނު ކަމަކީ ޕީއެންސީން ނަހަމަ ގޮތުގައި އެ ވަސީލަތްތައް ބޭނުންކޮށްފައިވާކަން ކަމަށާއި، އެ ފޯމުތަކަކީ "ފްރޯޑް" އެއް ކަމަށް އަނަސް ވިދާޅުވިއެވެ.
މިސާލެއްގެ ގޮތުގައި އަނަސް ނެންގެވީ ސަގާފަތާ ބެހޭ މިނިސްޓްރީގެ ކުރީގެ ސްޓޭޓު މިނިސްޓަރު މުހައްމަދު ތާރިގު (މަނަދޫ ތާރިގު) އޭނާއަށް ނޭނގި ޕީއެންސީއަށް ވެއްދީ ކަމަށް ބުނާ މައްސަލައެވެ. އެ މައްސަލަ ވަނީ ފުލުހަށް ވެސް ހުށަހަޅައިފައެވެ.
އެކަމާ ގުޅިގެން ޕީއެންސީގެ ޕީޖީ ގްރޫޕުގެ ޑެޕިއުޓީ ލީޑަރު އަދި ވިލިމާލެ ދާއިރާގެ މެންބަރު މުހައްމަދު އެކްސްގައި ކުރެއްވި ޕޯސްޓެއްގައި ވަނީ އެ ތުހުމަތުތައް ދޮގުކުރައްވައިފައެވެ.
އޭނާ ވިދާޅުވީ ޕީއެންސީއަށް މެންބަރުން އިތުރުކުރުމުގެ މަސައްކަތް ކުރިއަށްދަނީ ސީދާ އޭނާގެ ބެއްލެވުމުގެ ދަށުން ކަމަށް ވިދާޅުވެފައެވެ. އެގޮތުން ފޯމް ފުރައިފައި ހުންނާނީ ވެސް އާންމު މީހާ ގާތަށް ގޮސްގެން ކަމަށް މުޙައްމަދު ވިދާޅުވިއެވެ.
މިދިޔަ ނޮވެމްބަރު މަހު ޕީއެންސީން ވަނީ އެ ޕާޓީއަށް އެހާތަނަށް 97،000 ފޯމު ލިބިފައިވާ ކަމަށާއި އެއް ލައްކަ ހަމަކުރާ ފުރަތަމަ ޕާޓީއަކަށް އެ ޕާޓީ ވާނެ ކަމަށް ބުނެފައެވެ.
އިލެކްޝަންސް ކޮމިޝަންގެ ދަފުތަރުން ދައްކާ ގޮތުގައި މެންބަރުން އެންމެ ގިނަ ޕާޓީއަކީ އަދިވެސް އެމްޑީޕީއެވެ. އެގޮތުން، ސެޕްޓެމަބަރު 19އާ ހަމައަށް އެ ޕާޓީގައި ތިބި މީހުންގެ އަދަދު 50،851އަށް އަރާއިރު، އެ ތާރީޚަށް ޕީއެންސީގައި ތިބީ 28،983 މެންބަރުންނެވެ.